مدونة اللتان

احلى صداقه واحلى صدفه بالحياة  هو تعرفي بالانسانه الرائعه الي اسمها  ” مضيعه بيتهم ”

بجد بقرب هذه الانسانه الواحد ما يحس ان مافي الحياة امل او ما يحس ان في الحياة ملل

قبل اي شي بقول ما شا الله ما شا الله ما شا الله …. الله يحفظ هل البنت لأهلها

ليش ” لنكن كلنا مضيعه ” لان مضيعه

1- عمري بحياتي ما سمعتها تقول طفشانه .. دائم مو لاقيه وقت تنجز اعمالها بدل ما يكون لها وقت فاضي ما تدري وش تسوي فيه .

2- يومها منظم و مرتبه ساعاتها وكل ساعه ودقيقه عارفه ايش بتسوي فيها يعني انسانه مو عائشه على البركه اذا جت الساعه تفكر وش تسوي .. ولكن هي قبل الساعه تجي تكون عارفه وش تسوي بهذه الساعه

3- رئيسة فريق وجهه للبنات

4- ما تفقد الامل في شي متفائلة دائماً و تنتظر بكره يجي وكلها امل وايمان صادق ان بكره اجمل يوم بالحياة …

5- ما تعرف تسهر وتضيع وقتها بالنت او بفلم او اي شي ثاني الا اذا كانت مخصصه وقت من يومها لنفسها.. يعني مثلا الحين الساعه 1 بالليل ما شا الله تبارك الله البنت ناااايمه من زمان و تنتظر يوم الثاني يجي لتنجز اعمالها  … ” والحين اجازه مين ينام هل الحزه ”

6- دبلوماسيه بالتعامل بدرجه ما شاء الله  يعني تصلح تكون رئيسة دوله .. لو يمسكونها بس شركة اتوقع الشركة توصل للعالمية على طول ولو تمسك دوله بتصير هل الدوله من الدول العظمى و احد اعضاء الخمسه الرئيسين في مجلس الامن و كل شوي تقول فيتو للمسخره الي صايره في العالم

7- تبرد الكبد … اذا مسكت شغل تسويه على اصوله وترده على اصوله << تبرد كبدي في اصنع مهاره 

8- مستحيل الواحد يعرف ايش هي تفكر .. يعني الي يسولف معاها يعجز يعرف هي تكره هي تحبه اتحدى واحد يعرف

9- دائم حولها دفتر و قلم تكتب وش تسوي وايش بتسوي

10- طيبه..

11- نشمية يعني كفو يعني وقت الحاجه تلقاها اول الناس

12- مرتبة بشكل كل شي في مكانه ينحط

13- ما نحتاج نقول انجازاتها في عالم التدوين لان ما شا الله مضيعه بيتهم نار على علم ما شا الله

14- عندها روح تعلم وتجربة  كل جديد .. مثلا البنت ما خلت موقع بالحياة الا سوت لها بروفايل فيه على شان تعرف وش سالفته ..

15- اعمال الخير الي تسويها للناس وللايتام و الفقراء لا تعد ولا تحصى ومدونتها خير دليل على كلامي ..

16 – عظيمه عظيمه ..

17- …

لو هل الارقام وصلت الى مليون ما وفيت حقها… لان الى الان ما حكيت عن مضيعه شي ابد << كل شوي وانا اكتب البوست ارجع  ازيد عدد

انا ما كتبت هذه التدوينه مدحاً في مضيعه  ..!! لا ..

طيب الحين تقولون ايش الهدف منها..!!

الهدف نكون كلنا مضيعه بتنظيم وقتها و تحقيق الانجازات

لان انا وحده احدى امنياتي يكون جدولي مليان او منظم بالانجازات مثل مضيعه … ما شا الله تبارك الله

المفروض يصير كلنا سوينا انجازات كثيره بفترة شبابنا ..

يعني لو تخرجنا و ولا لقينا وظيفه يعني انتهت الحياة ..!! لا طبعاً

بالعكس الحياة بدت وبدت الاهداف و الانجازات << هذا مو كلام مثالية هذا كلام ممكن يصير لان مضيعه خير دليل

المفروض نمسك دفتر وقلم ونكتب فيه ايش نبي نسوي و صدقوني من تمسكون الورقه و القلم بتكتبون اشياء كثيره تبون تسوونها وانتم مأجلينها حتى لو كانت بسيطه و اول ما تفكرون تنجزونها وتنظمون لإنجازها و تنجزونها   بتحسون بفرحه كبيره و افتخار بانفس مو طبيعي..

هذه الاجازه بدت حاولوا ما تنتهي  هل إجازه الا وانتم منجزين على الاقل 3 اشياء مهمه ..

ممكن اعطي افكار .. مثل مشروع صغير او تعلم حاجه حابين تتعلمونها من زمان رسم تصوير انجليش او حفظ جزء من القران او جدول زيارات للاهل وخاصه لكبار السن بجد زيارتهم فيها اجر كبير وخاصه بفرحتهم اذا دخلتوا عليهم قرائة قائمة كتب مركونه بالرف و امتلت غبار ولا انقرأت << وهذه كلها اشياء ممكن تسوونها بنفسكم بدون ما تقولون ما اقدر ..

للننجز لو القليل ولكنه كثير بالنسبه لنا ..

وقبل اي شي اذكروا الله .. وقولوا ما شا الله تبارك الله

بجد الله يخليك لأهلك يا مضيعه ويخليك لنا يارب و الله يسعد قلبك دائماً ومن انجاز الى انجاز اكبر يارب ..

….

مضيعه انا فخوره لان انتِ صديقتي