مدونة اللتان

عندما كتبت في البوست الاول BlackBerry -1 ان اللى ينصح الاخرين بالبلاك بيري عدو ، هذا ليس حقيقة 100% ، ولكن كان سبب الكتابة اني لو كتبت ان البلاك بيري شئ جميل راح يهاجمني الملايين وانا راح اهاجم نفسي لهذا السبب حبيت اكتب بأسلوب اخر حتى اجذب الزوار + اشوف تعليقاتكم وقلت اذا هاجمت راح توقفون كلكم ضدي وتدافعون عن البلاك بيري << قلت اجرب سياسة جديدة   ..

في كل شئ بالحياة له اجابيات وسلبيات ولكن اذكر في بوست للأخ بدر  وياسر  في بودكاست شات شرقي عن البلاك بيري والايفون وان البلاك بيري لو مافية خدمة البيبي ماسنجر كان ما يسوى 10 ريالات .. كنت احس انه مبالغ بالسعر اللى تم تحديده بس اذا كنت شخص تهتم بالتقنيات وتحب الاجهزة راح تشوف ان هالشئ صحيح ..

اكثر البرامج اللى احملها بالبلاك بيري تكون مضروبة وماتشتغل واذا اشتغلت يكون بعد جهد وتعب ، وفي حركة لازم تعرفونها [ أول ماتحمل البرنامج بالبلاك بيري لازم تقفل الجوال وتفتحة من جديد على شان تمشي امور البرنامج معاك تمام التمام  ، طبعا مو كل البرامج بس اكثرها كذا ] ..

|| فاصل لحد يقولي لية اشتريتي البلاك بيري بما انك ضده ، انا بالبداية كنت متحمسة له مرة بس بعدين لما عرفت عنه زين كنسلت الفكرة من بالي بنسبة كبيرة وفجأة جاني هدية الجوال ، بس ما اقول لكم انها ما كانت تجربة رائعه بالعكس اكتشفت شغلات كثيرة ، وقدرت احكم على رأي الناس ..

راح أبدا اتكلم عن الاجابيات :-  ” لان دائماً نذكر سلبيات الاشياء خلونا نكتب الاجابيات “

مميزات البلاك بيري من وجهة نظري :-

1- التواصل مع الناس اللى ماتدري عنهم الا من مناسبة لين مناسبة تصير بتواصل معاهم 24 على 24  ( الكل كان يقول لي بالانترنت تواصلي معاهم على طول ، انا احس ان دخول الناس للانترنت مو كثير ) ..

2- توصل لك رسايلك الايميل اول بأول  ( لا تقولون لي اخذتي كونكنت واشبكي فية بالانترنت بصراحة الاب توب حقي ثقيل )

3- يقلل من استخدامك للاب توب ( لان تقدر تفتح الماسنجر – الايميل – الفيس بوك – التويتر ) وكثير من المواقع وتوصلك الاخبار بدري ..

4- سهولة استخدامة .. ( لا يحتاج انك تفهم بالتقنيات ولا يحتاج انك تعرف انجليزي او عربي كل اللغات موجوده )

5- تقدر تخلي ماسنجرك مفتوح على طول ( طبعاً هذا لعشاق الماسنجر )

6- وزنة خفيف ..

- بصراحة هذي الاجابيات اللى اتذكرها ..

السلبيات اللى في البلاك بيري :-

1- اول سلبية كل محد شاف البلاك بيري بيدك قال لك (عطني pin )

2- نايم او صاحي الناس ماتفهم هالشئ بيجلسون يسون لك ( ping!! ping!! ) >> البنق هذا يخلي الجوال يهتز على الطاولة او بيدك وينبهك ان في شخص يتكلم ، حتى لو تحط الحالة ( نايم ) ماي فهمون ..

3- اربع وعشرين ساعه تستقبل مسجات .. [ طبعا المسج الواحد ترسلة فلانة وتسوي لة " برودكاست " ويوصلك 26 مرة شئ جداً طبيعي ] ..

4- يعلق !!!! [ انا انسانه جوالي من الجوالات اللى تعلق كثير قالوا لي جوالاتهم ماتعلق وسوي له فورمات صديقااتي واللى حولي يعلق وتجلس الساعه تدور فية >> مستخدمين البلاك بيري يعرفون الساعه المزعجة تبع التعليق اللى تدور ..

5- البرامج فية جدااااااااااااااااا رديئة .. كثير ناس مكتفين بالـ BBM ومايحملون برامج انا انسانه احب احمل برامج واجرب واكتشف اكثر البرامج ماتشتغل او مضروبة او استخدامها سيئ الى اخر درجة او  او او او من السلبيات ..

6- اكثر اللى عندهم بلاك بيري مايفهمون بالتقنيات او بزران او ماخذينه من باب ماجاء في الفشخرة ، الا نسبة 35% مشترين البلاك بيري لان عملي بالاستخدام وحق اعمالهم اليومية ..

** الضجة اللى مسوينها الناس على البلاك بيري ترى اكبر من حجمة بكثيييييييييييير     ،، ويضايقني جداً لما احد يقابلني ويقول لي وععععع بلاك بيري سيئ ، هو صحيح سيئ بس مو كل اللى ماسكين بلاك بيري يسولفون بالبيبي ماسنجر ، انا وحده على ايميل انزل مقالات او موضوع ولما اطلع في اي مكان اجلس اقرأ لان ما يكون عندي وقت في البيت ممكن في اماكن الانتظار ،وانا انسانة استخدمة في الانترنت اكثر من السواليف البيبي ماسنجر  … لا تحكم على كل الناس بنظرة وحده ترى مو كل اللى يستخدمون الانترنت نفس الشئ ”

::

  اللى كتبته رأي الشخصي وليس بالضروري كل الناس يوافقوني الرأي بس ممكن اسمع رايكم  ..

- احد قريباتي قالت : البلاك بيري قرب البعيد وبعد القريب >> كلامها صحيح اللى جالسين جمبك ماتسولف معاهم لانك مشغول بالبلاك بيري تسولف مع شخص ساكن باخر الدنيا 

1 person likes this post.

Unlike