مدونة اللتان

كنت طالعه لمشوار امس مع اختي وبنت خالي وفي رجعتنا كان في بقالة صغيرة مررررررررة وعند الباب في مجموعه كبيرة من الجرايد ( وانا محتاجة لجرايد بلغة غير العربية والانجليزية على شان الكولاج )

وقفت واخذت جريده وكان الكتبات كانها ” شخابيط ” او طفل صغير راسم على الجدار

سئلت الهندي اللى يبيع ( ايش هذي الجريده ) ؟؟ >> ايش دخلك انتي من وين هالجريدة اشتريها وانتي ساكته .

الهندي قالي : *$&^^#%@%# >> ما ادري والله وش قال لا لي خلق اقولة ( هاااااه )

عطيته الجريده على شان يحطة لي بكيسة وسئلته بكم هذي ؟؟

قال الهندي : انتي في يشتري ؟؟

انا : ايوة عطني اياها …

الهندي صار وجهة كذا >> وقالي انتي هندية ؟؟

انا : …………!! ( مارديت لان ماله دخل هندية او سعودية )

عيونة طارت الهندي ومستغرب ويبي يعرف وش القصة اناا شتريت هالجريدة الله يستر مايعلم ربعه الهنود وتصير سالفتي سالفة ..

طلعت من البقالة و واقفة مع بنت خالي واختي ننتظر السواق اختي ام عبدالرحمن كانت تكلم بالجوال وانا اضحك اقول حق بنت خالي شوفي ايش اخر اهلنا في الهند >> ابو ثقالة الدم

فتحت الجريدة اللى تحتوي على ( 12 ) صفحة والله لا غير >> جريده خفيفة جداً جداً واحتمال يكون السعودية مشفرين الصفحات الله العالم ..

وكانت الصدمة الخبر الاولى :-

جلست اقول حق بنت خالي وش تتوقعين كاتبين عن السعوديين ؟؟

بنت خالي : ……….!!!!!

انا : اتوقع كاتبين الخبر عن البلدية لما ادخلت احد المطابخ وصادتهم …!!!!

انا : او يمكن كاتبين عن اكبر كبسة سعودية وان السعوديين فاضين >> احلى يالهنود يالمشغولين ..

( عفواً انا لا اجيد اللغة الهندية )

الخبر الثاني :-

بنت خالي : مضيعه شوفي هذي سيارات سعودية وش تتوقعين يقولون مطاردت بنغلاديشي؟؟

انا : لا لا اتوقع اللى على اليمين مجمع العثيم مول لما طاح كاتبين عنه ..

( عفواً الى الان لم نجيد اللغة الهندية ) ..

الخبر الثالث :-

انا وبنت خالي >>>

حاطين الاعلان بالعربي وش يعرفهم وش مكتوب

(( وش يدريكم يمكن يجيدون اللغة العربية احسن مني ومنكم ))

الخبر الرابع :-

ايش هذا الخبر عن يوسف القرضاوي ؟؟

رسم كاركتيري :

(( قلت حق بنت خالي وانا افتح الجريده حسيت نفسي البزر اللى مايعرف يقرأ ويتفرج بس على الصور ويخمن من عنده ،، ترى الطفل نفس الشئ يفتح القصة او المجلة وتسمعه يسولف مع نفسة ويقول اللى يشوفة بالصورة ويجهل الكلام المكتوب )) :book:

انتهى ..!!!

دائماً لما الخدامات يتكلمون بالمطبخ واحسهم يحشون فيني اتمنى انى افهم لو كلمة وحده .. ولكن مع هذا اسئلها وش قلتي لها اكيد قلتي لها عني   >> انواع البلشة .. :seco:

اتوقع ان سبب الصفحات قليلة في الصحيفة الهندية اما انهم يمشون على ( خير الكلام ماقل ودل ) أو ماعندهم صحفين كفاية ؟؟

مو احنا جرايدنا مليون صفحة ولا خبر واحد يخدمك كامواطن في ارض الوطن تتصفح الجريدة وكانك تفتح اوراق بيضاء فاضية :55:

وغير كذا تحس جريدة الاسبوع الماضي نفس جريدة اليوم ، او بالاصحى جريدة قبل سنة نفس جريدة السنة :55:  ولا شئ يتغير فيها ابداً ،، احس في اشياء كثيرة نفتقدها في جرايدنا والخبر في جريدة الرياض موجود في جريدة الحياة ونفسه بجريدة اليوم لا يتغير الخبر في الجرايد غير المقالات والرسم الكاركتيري …

ما راح اقول احنا بحاجة الى اعادة النظر في الجرايد لان اتوقع المواقع الالكترونية خلنا نستغني عن اشتراء الجرايد

( اذا بتشتري جريدة ترى يمدحون الورق الجرايد لتنظيف الزجاج كما ان ورق الجرايد مفيد لتغليف القطع الزجاجية وحفظها من الكسر  واحنا في بيتنا نستخدم الجرايد في فصل الشتاء لأشعال الحطب في المدخنة اللى داخل بيتنا وتفيد ايضا في الاعمال الكولاجية ) >> مجرد وظايف جديده للجرايد ..

الشئ الوحيد اللى فهمته بالجريدة

first malayalam daily puily published outside india