b037

هذا هو محور الحديث الذي دار بيني وبين صديقتي الغالية ” الجوري” على الماسنجر وبعد نقاش طويل ، عن موضوع النظرة الشرعية وعن الحفلات والافراح وعن الافكار والاعتقادات الغريبة عند بعض الناس و الكثير من المواضيع …

الاسلام حلل النظرة الشرعيه وللاسف في مجتمعنا تحول الى ( جلسة شرعيه ) هو قال نظرة صار سواليف لمدة ساعات على شان الطرفين يقتنعون في بعض ” غصب يقتنعون في بعض “، ولم يكتفي الخطيبين بالسواليف بالتحول الموضوع الى نظرة شرعية ثانية بعد اسبوع حتى يتأكد ان البنت اعجبته ما ادري كيف البنت الجريئة اللى تقول انا ماشفته خلة يجي مرة ثانية ,, والنظرتين الشرعية لم تكفي مجتمعنا وصار قبل كتب الكتاب يكلمها بالهاتف لمدة اسبوع واكثر حتى يقتنع ان البنت تصلح لة كا زوجة (( والله لو مشتري سيارة ماخلوك تجربها اكثر من اسبوع )) ..

وجاء المغيرة بن شعبة يستأذن النبي صلى الله عليه وسلم أو يخبره بأنه خطب امرأة فقال: أنظرت إليها ؟ قال: لا . قال انظر إليها، فإنه أحرى أن يؤدم بينكما . أي يحصل بينكما الإدام والائتلاف والوفاق
وقال النبي صلى الله عليه وسلم ما معناه: إذا خطب أحدكم المرأة وأراد أن يتزوجها فلينظر بعض ما يدعوه إلى زواجها،

في كثير من الامهات وبناتهم يخافون يخطبون ” فلانه بنت أم فلان ” وبعدين يرفض الشاب الفتاة (( لان من كثر تشرط الاولاد الامهات توهقوا بعمرهم )) لهذا السبب تقوم أم الولد مشكورة بالسماح لولدها بالنظر الى بنت الناس من خلال ” ثقب الباب ” ولو كانت هذي بنتها كان ماترضى عليها ابداً بس ما ادري كيف يرضون لبنات الناس ” ،، اي والله يا جماعه تخلي الولد يطالع البنت لو عاجبته او مو عاجبته قبل لا يتقدمون للخطبة الرسمية ..

- مو عيب ابداً لو العائلة ارفضوا الولد او الولد رفض البنت بعد النظرة الشرعيه احسن من يعيشون مع بعض مجبورين  ، او يقومون بتصرفات غبية قبل الخطوبة ..

- يزعجني جداً سالفة الناس اللى يدورون صورة ( فلانه بنت فلان الفلاني ) على شان يورونة ولدهم يمكن تعجبة البنت ويتقدم لخطبتها من غير احراج  ولما يتقدم الاهل يرفضونة قبل لا يدخل النظرة الشرعية لان اساسا مو موافقين على الولد ” مساكين مايدرون ان الولد شايف بنتهم من صورة جايبتها لهم جارتهم ام علان ”

المشكلة ان الولد يطمع لان دامة يشوف الصور لية يهتم ليوم النظرة الشرعية ولية يروح يخطبها اهي بالذات راح يطلب صور اكثر واكثر ويتفرج على كل صور بنات الناس بعدين راح يختار وحده منهم ” وبما انه شاف الصور يحس ان البنت رخيصة ويهون ويقول في بنت غيرها ”

* اذا نتكلم عن الدين والأسلام :

مايجوز شرعاً النظر لبنات الناس واهي مش نظرة شرعيه .. (( يعني يجلس يقز فيهم واهو اساسا ما جاء يخطب وبعدين يغير راية ويروح يشوف وحده ثانية )) خيييييييييييير وين جالسين ..

* من ناحية العادات والتقاليد :

والله لو يدري  ابوها او اخوها ان ولد فلان شايف بنتهم قبل لا يخطب بس بيشوفها تعجبة او لا  ؟” كان يودع الحياة وينتقل الى دار الاخرة ” والله يرحمنا برحمته .. وكان فضيحته وصلت لين اخر جار والعالم كلهم دروا عنه انه يشوف بنات الناس قبل لا يتقدم لخطبتهم …

،،

السؤال اللى يتبادل الى ذهني كيف انت ترضى على نفسك تشوف بنات الناس على شان اذا اعجبتك تتقدم الى الخطبة واذا ما اعجبتك مافي مانع تشوف غيرها لين ما تقتنع بوحده منهم .. ؟؟؟

انا مؤمنه بانه ضروري الانسان يتزوج زوجة جميلة بس مش معناته انه ينسى اخلاقها وتربيتها وينسى ابوها وامها واهلها  ، اتوقع الولد يشتري البنت بسمعتها الطيبة بس وين خلوا الاولاد فيها سمعه دامهم يقزون قبل الخطبة ..

سبحان الله الانسان اللى من هذا النوع ربي مايوفقة لانه اساساً يقوم بالنظر لبنات الناس بدون اذن ،، ونفس هذا الشخص لو اي احد يقولة ان في شخص شاف خواته راح يرتكب جريمة بقتلة لانة شاف اخته ولو جيت تقولة وانت بعد شفت بنات الناس بيقول (( عادي انا ولد )) >> يا سبحان الله ..

في مشكلة بمجتمعنا يحللون اللى يبغون ويحرمون اللى يبغون وينسون الكتاب والسنة وكل شئ عادي ..

صحيح لما قالوا التربية لها دور ..

الله يرحم ايام زمان كان الولد يجي يخطب حتى الظاهر مايدخل يشوفها نظرة شرعيه بس مشتري اهلها وتربية البنت واخلاقها وهالايام ايش حال الاولاد والاهل الله المستعان ..

يسئل وش ماركة شنطتها وايش  اسم العطر اللى تستخدمة لان يمكن مايناسبه ويرفض البنت …


(( البوست كان مجرد حوار بيني وبين صديقتي منذ فترة طويلة ومجرد وجهة نظر وابدا ما ازعل لو اي احد يجي ويقولي وجهة نظرة لان لكل شخص بهذي الحياة راي خاص فية وكلام يمكن يقنعني ويقنع غيري ،، واحترم ارائكم دائماً ..  ))

،،،

تم كتابة هذا البوست في 21/10/2008

62 ردود


هل تريد التعليق?

تعليقات RSS and TrackBack Identifier URI ?

من سواليف البنات البايخه في النظرة الشرعيه /

احد الفتيات سئلت الولد اللى جاي يخطبها ( ايش برجك ؟؟؟ ) >> شوفوا التفكير بس

ووحده ثانية اسئلت الولد سؤال مهم ( ايش هوايتك ؟؟ ) >> كارثة لو كان ماعنده هواية الولد ” تخيلوا لو هواية جمع الطوابع وش تسوي فية ترفضة ” ههههههههههههههههههههه :ha:

واحد الفتيات اسئلت الولد ( وين تشتغل ؟؟؟ ) >> يلعن ابو الجرئة بس اول شئ لية تتكلمين وبعدين جاي يخطبك ماسئلتوا عن الولد وين يشتغل وش هالمصخرة :55:

^
^

كنت اعتقد ان مجرد سخافات يكتبونها بالانترانت
والله ياجماعه ترى صحيح البنات نسمع سواليف بالنظرة الشرعية ( قبل كان يقولون ان شاء الله ارتحتي لما دخلتي النظرة الشرعية )

الان يقولون ( ها وش قالك ؟؟ وايش قلتي له ) >> لان مش نظرة شرعية ” صارت جلسة شرعية ”

:15:

12 فبراير 2009 11:06 م

أنا بكل كلمة ,,

إلآ النظرة

أعتقد لآزم يسولفون ولو 5 دقائق علشان يعرفون تفكير بعض مثلا بنت ما تحب الرجال اللي لهجتهم , بدووية مررة يجي شكلة 100% لكن كلامة وأخلاقه زفت أو أن البنت ما ترتاح لبعض الشباب وحركاتهم وأسلوبهم ,, مو مجبورة تبقى طول العمر معه ,

,, لكن بما أنها شرعية أعتقد أنه ما يجوز الخلوة ولا نسوا هذه ,, !

سيكو

12 فبراير 2009 11:21 م

شوفي الحوار اللي دار بينكم كله ينصب ليش الولد يسوي كذا ؟
وليش الأمهات يسوون كذا .؟! ..

خلينا نشوفه من نظرة البنات طيب ..!؟
واحد يقولي رحت اتقدم لعائلة ويوم جاء موعد الشوفة .. ذلوني كل يوم يقولون لي بكره
لين اتفقوا على يوم .. ويوم رحت .. البنت مستحية تعال شفها بالصالة .. قلنا اوكي ..
ويوم راح للصالة .. يكلم البنت ما ترد عليه وكأنها مغصوبه .. بعدها طلع ولا عاد رجع لهم !

زي ما الشباب يتشرطون .. ترى في بنات تتشرط .. !؟
انا فكرت اكتب تدوينة عن موضوع شروط البنات للزواج .. شي عجيب بصراحة ..
لازم ولد مزيون يعني عشان ترضى ..! ولازم تسافر برى .!؟
ما يدرون ان الواحد يقعد يجمع مبالغ له اكثر من سنة وهي تتشرط ..
اذا كان قادر مادياً بيرضيها .. بس اذا كان على قد حاله ومافيه عيوب .. ترضى بالواقع
وتدور الستر ..!

احس اني اسولف واجد ..
بس احب هالموضوع لأنه شاغلني هالأيام :20:

12 فبراير 2009 11:25 م

الفايز /

حلووو يعني عادي تتحول النظرة الشرعية الى ديوانية

ممتاز جداً

اجل لازم البنت تجهز اسئلة وتسئل الولد ( ايش ماركة قلمك ؟؟ ) :00:

يعني خمس دقايق بتقول عجبها او لا ” غريبة ” …!!!!!!!!!!

يقول واحد من اقاربي : ان العريس لما يجي يخطب يكون لبس مليون ” قناع ” وبعد كتب الكتاب يخلع اول قناع وبعد كم شهر يخلع القناع الثاني وبعد وبعد حتى بعد الزواج ويخلع كل الاقنعه ويظهر بشخصيته الحقيقية :15: >> هذا في حالة ان العريس يكون فقع

ايش هو العريس الفقع : العريس الفقع هو اللى يجي من طريق ما ادري مين ما ادري مين مايعرفون ولاشئ عنه غير علاقته بالعمل مع زملائة & عمرة وطولة وحتى للاسف الشديد مايعرفون كم وزنة ( هو اللى يرتدي الاقنعه )

في اختراع ممتاز اسمه الابو يكلم المعرس ويحط اسبكر وتسمع البنت اسلوبة اذا اسلوبة اهم من اخلاقة

>> احس اني بنجلد

حياك الله

وجهة نظرك احترمها :15:

12 فبراير 2009 11:27 م

مشغول ..!!!

- والله مشكلة لو البنت تكلمت واجلست تسولف قالوا البنت جريئة والله من الادب واخلاقها انها تكون مستحية اجل تدخل وعينها قوية ( صحيح مايعجبكم العجب ولا الصيام برجب )

لا تخاف مشغول الرد حقك هذا البوست القادم باذن الله ( لحد الان عندي بوستات محبوسة تناقش مشاكل المجتمع )

بس ما ادري متى بنزلة احس في اشياء كثيرة ما كتبتها على شان كذا تأخرت في تنزيل البوست

- البنت اللى تدور شاب وسيم على قولتك وتبية حلو ” زي مهند زوج نور ” المسلسل التركي >> اسمحلي اقولك هذي بنت ماعندها سالفة ومشكلة للاسف الشديد ان كثيييييييييير بنات يدورن شاب وسيم
وكل ما قالت لي وحده من البنات انها تبي شاب وسيم اسئلها ( لية تبغين شاب وسيم بتصورين معاه والاخلاقة بالطقاق )
تقولي : والله يامضيعه لما اطلع معاه افوشر فية قدام صديقاتي >> هذي البنت مو وجه تفتح بيت …

مشكلة المسلسلات مأثرة في كثير من البنات ولحد الان يفكرون ان الزواج زي المسلسلات :s

نبحث عن حل لسنة 3000 م

قتلك هالموضوع في البوست القادم

ونزل بوست واحنا نكمل كتابة معاك ونتناقش ونحل قضية فلسطين

12 فبراير 2009 11:32 م

لا فض فوك أختي

بارك الله فيكي وجزاكي الله خيرا علي هذا الموضوع الطيب

كيف الحال وحال الغائب لي فترة ما دخلت علي النت وحابب اطمن علي الناس الطيبة

——————-

مضيعه بيتهم /

حياك الله ابو مروان

اجمعين يااارب

شكرا ع السؤال ، الحمدلله انا بخير و ” الوالد ” الحمدلله رب العالمين صحته كويسة ( الله يفرج عليه باقرب وقت يارب )

حياك الله

12 فبراير 2009 11:44 م

ههههههههههههه

لالا انا نزلت مره بوست عن الشوفة الشرعية وكان حافل بالنقاشات ..
بس الحين انا اتناقش كثير مع ربعي عن موضوع شروط البنات !
يعني لو كان واحد عنده مكان في بيت اهله .. ليش البنت تطلب بيت لحالها !
مع العلم انها بكذا تضيق على زوجها من الناحية المادية ..!

:20:

—————

مضيعه بيتهم /

انا كنت اقول بعد لية تطلب شقة لحالها ،، بس الحين ارفض ان فكرة البنت تسكن مع اهل الزوج صديقاتي عندهم مشاكل كثثثثثثثثثيرة علما ان اكثرهم ماخذين اقاربهم وعلاقتهم مرة كويسة معاهم بس سبحان الله لما تزوجة صار مشاكل وشغلات ابدا ما كانت تتوقعها

وكثير ناس يقولوون البنت تطلع برى لحالها احسن

واحسن من ناحيتين ( الولد يتعلم على المسؤولية + البنت تتعلم ان عندها بيت ) اما في بيت اهل زوجها تخلي كل شئ على اهل زوجها

- الى اليوم مافي اي وحده اعرفها ساكنه مع اهل زوجها وماتشتكي ..

12 فبراير 2009 11:46 م

اول اثول شيء
ترى يجوز الواحد ينظر للوحدة اكثر من نظرة شرعية وحدة
يعني ممكن يروح مرة ومرتين زي ما يبغى
ودا موجود في كتاب الفقه في ثالث ثانوي والأستاذ قلنا عليه
بس للأ ب يوافق ولا لأ ;)

ثاني شيء
انا اعرف الشوفة الشرعية تكون آخر شيء بعد ما يتأكدو من انهم متناسبين ( اشغال حريم )

فيعني هيه تكون عارفة اش لهجتو وهو عارف

بس برضو انا احس مافي مشكلة لو اتكلمو ( بس يبالو احد يتأكد من الناحية الشرعية )
طبعاً مو سوالف وحنك !

وحلوة دي هرجة الصور :15:

13 فبراير 2009 12:01 ص

عزيزتي مضيعة انا أختلف معاك في أشياء كثير في نظرتي للموضوع
أنا أصلا ماني مقتنعة نهائيا في سالفة إن نظرة لإنسان هي رح تحدد مصيري وأشدد على كلمة مصيري!
يعني مو معقولة عشان والله “شكل” هذا الإنسان عجبني أو ارتحت له (كمان الشكل) فهذا يعني إنه الإنسان المناسب
ومو عقل إن يجيني واجد ما أعرف عنه ولا شي إلا إلي قالوا عنه الناس وأقول إيه.. خلاص هذا هو إلي ابيه!
زي ما انتي قلتي دام إنه يجيني بستين ألف قناع انا شلون أحكم إنه أوكي أولا؟؟
بعدين الجلسة الشرعية على قولتك موب أنا وهو لحالنا! أنا وهو وشخص من أهلي.. أمي. أبوي .. أخوي
وأنا في كامل حجابي.. ( والحجاب إلي أحكي عنه هو إلي يغطي الشعر مو الوجه)
وما فيها شي لو تكلمنا.. وحتى لو هو حكى عن نفسه وسألني وسألته
مرة ما فيها شي.. ولا هي حرام دام إننا ما نقول كلام مدري وشلون وكمان دام إننا موب لحالنا!
أما سالفة إنهم يتكلمون مع بعض فهذا موضوع ثاني
مضيعه إنتي تقارنين زمان اول يوم إن أقصى شي عندهم الراديو وإلي مرة مرة كشخة عنده تلفزيون أبيض وأسود
الحين كل شي متوفر وكل الناس تتأثر بإلي حولها
ما أبي أطلع عن الموضوع الأساسي
لكن أنا من رأيي إن اختيار الزوج أو الموافقة عليه بالأصح لازم تكون بأسباب مقنعة
الشكل ماهو كل شي.. والنظره حسب ما فهمت منك إنها بس للشكل
والزواج لا يبنى على جمال خارجي أبد!
نقول الولد شاف البنت وعجبته وبعد الزواج صار لها حادث وإلا احترقت بالغاز خلاص يهون؟؟؟
وهذا الشخص إلي تتكلمين عنه.. إلي يشوف البنات قبل لا حتى يخطبهم وهم في كامل زينتهم.. فاسمحيلي هذا الشخص غير متربي
وبس

13 فبراير 2009 12:31 ص

بوست بالصميم مضيعه

اول شي مدري وش اقول ووش اخلي
سالفة ليش الاولاد وليش البنات بيطول شرحها !
اتوقع ان الشوفه الشرعيه لازم تكون مطوله شوي يعني مو شطفه تجي تلمس الكنبه وتطلع ولاهي تمشي يدخلونها بعصير وحركات وكل شوي تقووم تباشر عليه كانه واحد من خوياتها ..
نقدر نقول لا ضرر ولا ضرار
تخش السلام عليكم <– بكذا سمع صوتها
كيف حالك وترد بخير
واتوقع من الذوق والادب انه يتكلم عن نفسه ويسالها من باب فتح سالفه
يعني زي وش ناويه توصلين له بعملك مثلا , هيك شي !

احتتتتتتتتتتتتقر البنات اللي يتطابخون مع اخوهم ويورونه وحده والبنت تكون جايه بيتهم ومأمنه لهم وكاشخه كشخة حفلة بنات يعني اكيد بيكون لبسها “مشخلع” شوي , ويجي أخينا بالله يطلطل من ورا البيبان :@:
مره مره مره مره عيب , واصلا كيف بأرضى فيه وانا داريه انه طال علي ! , يعني اكيد مطلطل على غيري ليين ما وصل لي وقال يله توكلنا على الله !
بعضهم يحسون الزواج تنقاية ماكنتوش :/

وبما ان الموضوع شوفه وقريب للخطبه , عيب بعد على الامهات اللي يدقون بنجي نشوف بنتكم O_o سلاااامات لا يكون قايلين لك اني اتشقلب بطريقه بهلوانيه وانا مدري , والا فاتحين معرض فنون جميله !
وتجي هي وبناتها بعد , وزين اذا ما جابو خالة الولد وجدته <– هنا عزيزتي المتفرج عليها خذي من كل فرد 100 ريال فرجه وخشي عليهم كل شوي بلبس مكسب :seco:

وآآآه يا شروط البنات , وآآهين يا شروط العيال
حدثني واحد من اخواني ان له صديق وصل الآن لـ 31 سنه ورافض يتزوج , يبي وحده تشبه زينب العسكري <– في مرض نفسي اكثر من كذا !
يعني لا استبعد ان في بنت بنفس عمره وترفض الخطاب لانهم ما يشبهون جورج كلوني <– احلى شي بالعالم :$

وحدثتني احد الفتيات ان لها صديقه ترفض الولد بناءا على سيارته , اهم شي لا يكون معه كامري لان ببالها ان كل شخص معه كامري قروي وهي ما تتحمل القراوه <– خلل :ha:
فما استبعد ابدا ان يكون بالمقابل ولد يرفض البنت اللي ما يكون كل لبسها ماركات عالميه لانها بكذا قد تكون قرويه كذالك :/

الناس اشكال وانواع , وارضائهم غايه لا تدرك ..
بالنسبه لي اهم شي الشخصيه ,والدين . والاخلاق , وحب اهله لان اللي ماله خير باهله ماله خير بالناس …

ونجي عاد لسواليف الشوفه
وحده من صاحباتي دخلت على زوجها بالشوفه ومع الربكه حبت راسه :seco:
وحده ثانيه نست سحاب التنوره مفتوح مع العجله :$ ومشت بنص الغرفه وجلست بعدين قامت وطلعت والكل يتفرج الشرهه على اخوها اللي ساكت :44:
وحده ثانيه دخلت قال اهلين بعدين انفجرت وصارت تصيح وتشاهق , بعدين بدت تضحك وتقول آسفه انا مستحيه لا خايفه لا مدري ,, وتحوس بالكلام بعدين مسكت الباب :58: <– مسكينه مره كويس يقرب لها وفاهمها وتزوجو :15:
والكثير الكثير من الحواث اللي احيانا تصير كوارث …

احس اني كثرت الهرجه :46:
براسي كلام بس احس عيب قلت كثير :46:
يله فودتك بعافيه :41:

13 فبراير 2009 12:37 ص

أنا ماشوف فيها شي ان تتكلم مع الولد… بس بحدود ومو تطقها سواليف.. أنا استغرب الزواج الحين والموافقه عليه اسهل من الوحده تختار لها بلوزه ولا بنطلون من السوق..
في حاجة ثانيه… في بعض البنات تاخذ راحتها بالملابس !! وتلبس اللي على بالها ..فجأه بنات يلبسون قصير ولا sleeveless !!! ويالله كل ما جا احد البسي يا بنت وانزلي !!

13 فبراير 2009 12:57 ص

معليش شغلت السواليف في الشوفة والله بايخة .. وحلاة البنت بحيائها

فكرة الشوفة انه الرجال يرتاح للبنت والا لا .. وهي بعد

يعيني فيه ناس اول ماتشوفينهم ما ترتاحين ابد .. وفيه ناس العكس

طبعا الاصل انه سائل عن البنت واذا مقتنع خلاص بس يبقى انها يشوفها وهي تشوفه

والمفروض مايصير فيه خلوة طبعا .. لازم اهلها موجودين

13 فبراير 2009 1:06 ص

انا ما اقول لازم تسكن .. بالعكس عن نفسي مثلاً بطلع لبيت لحالي ..
بس اقصد اللي عندهم بيت كبير وفاضي .. ليش يخسر نفسه ويطلع برا ؟!

البنات لهم شروط تحترم وشروط ممكن تعذب الولد معها .!

13 فبراير 2009 1:08 ص

وكلة كوم ولبس البنت بالشوفة كوم ثاني

أعرف وحدة تقول لابس تنورة قصيرة ووميك أب كاامل وأكسسوريز
ودخلت ودقتها سوالف

وبالأخير مااخذته :s

نحتاج لاعادة بناء شخصية البنات واالاولاد لمواجهة الحياة المستقبلية >>يبي لها بوست :54:

13 فبراير 2009 1:21 ص

هههههه مضيعه تم تدبير مكيده لوضعي في هذه الصوره دون علمي ..

كانت احدى قريباتي مستاجره في الكباين “شاليهات ”

ودعتني وكنت مشغوله واعتذرت عده مرات ولكنها كانت مصّره بشكل حيرني في البدايه !!

ولكن في الاخير ذهبت عيب كم مره تطلبني وماروح !! :15:

<< على نياتي ..

والحمد لله انبسطت وبعد فتــــــره وحده اخبرتني بأنها شوفه من وراء الكواليس !!!

طبعا جدا احرجت وحسيتها حركه ماهي حلووه ابداً ..

بس الحمد لله كنت شويه صغيره “ايام المدرسه ”

فمن جد لازم ننتبه الناس سار عنها كل شي عادي .. اعذريني لاطالتي :)

13 فبراير 2009 1:44 ص

السلام عليكم

شلونك مضيعة من زمان عنك :D

الحوار ذا أتذكره خخخخخخخ

اييه النظرة الشرعية وما أدراك ما النظرة الشرعية :69:

مدري بصراحة بس أحس صارت مصاخة النظرة :20:

يعني تخيلي وحدة تروح كوافيرة وتلبس فستان مدري وش يبي كإنها بعرس وتدخل للنظرة الشرعية قال >> يعني شسمه هو المفروض يشوفها طبيعيه بدون شخابيط :lol:

وللا يجيك الولد ويقول أبي أشوف شعرها وش طوله >> وقسم يبيله كف :44:

بالنسبة للكلام ممكن تتكلم وتقول السلام عليكم ههههههه >> عشان يعرف انها تعرف تتكلم بس لا أكثر :lol:

أما اللي يسرقون النظر من خلف الدرايش والأبواب فذولي بصراحة فيهم نذالة يعني وقلة حيا وأتوقع لو درت البنت انه شافها بذي الطريقة ما توافق عليه :20:

يعني لو صارت لخواتهم والله مايرضون ,, حرام يسوونها ببنات الناس :(

رأيي أنا / ما تصير النظرة الشرعيه غير بعد ما يكون خلاص موافق عليها وأهله قايلين له مثلاً كل شي عنها والبنت نفس الشي موافقة .. وقبل العقد يشوفها :)

13 فبراير 2009 1:56 ص

أما وش برجك حلوة! وش يبي بها ذي؟ مع ان أغلب الكلام صحيح، لكن أعتقد في هذا العالم يوجد الطرف الآخر الجيد، والمهتم بما هو صحيح ويعتقد به!
الأهل جزء مهم في المعادلة لتحقيق صحتها، ولو ينقالي وشو برجك بقولها .. بعد أربعطاشر سنة خدمة فسنوي بتئولي وش برجك! الله يحلل من رباها وياجره! شكرا على النظرة والديوانية الشرعية هنا :)

13 فبراير 2009 2:54 ص

بصراحه أنا خطبت أم لارا قبل ثمان سنوات ولم اراها النظرة الشرعية …
راح يجي من يقول اش هالتخلف وان الاسلام احل النظرة الشرعية … داري والله انه حلال
بس اللي خلاني ما اطلب النظرة عدة أسباب :
1. شاري اهلها وراضي بتربيتها وأخلاقها ودينها .
2. عارفها وهي صغيرة وحافظ شكلها زين وكمان خاطبها وهي صغيرة بعمر 17 سنة يعني ما يمدي شكلها تغير كثير عن قبل تتغطى .
3. لان الشكل ما يفرق معي كثير لان أهم شيء الأدب والأخلاق والدين بالمقام الأول .

*****************
أما حكاية أن النظرة لازم فيها سواليف وتتكرر أكثر من مرة فهو إعتقاد خاطئ …
لان الهدف من النظرة مو تعرف اسلوبه واسلوبها لانهم يقدرون يتصنعون ذلك …
ولكن الحكمة من النظرة هو الشكل الخارجي بمعنى مقبولين وليس فيهم من هو أعرج أو أعور أو من هالقبيل .

13 فبراير 2009 3:52 ص

هالقضيه قد ما هي مهمه قد ماهي شيقه بنفس الوقت ،

صديقتي قالت لي كيف انخطبت || تقول بنت عمها اخذت لها صوره بالموبايل وارسلتها لاهل المعرس وعجبته وخطبوها الحين تزوجت وعندها بيبي ||

طبعا صديقتي قبلت الموضوع بالعكس كانت سعيده جدا بأن بنت عمها سوت هذي الحركه

لـــــــــــــــــــكــــــــــــــــــــن

انا فكرت بيني وبين نفسي اذا الولد رفضها || وعرفت بالموضوع هل بتكون ردة فعلها عاديه جدا نفس ماصار !! نو واااااي طبعا

.
.

انا مؤمنه بشي اسمه كما تدين تدان || ومثل ماتسوي راح يصير لك

يعني الواحد يفكر بهالمنطق مثل مايشوف بنات الناس راح يجي يوم ويشوف حد حرمة بيته

ونقطه انتهيت

13 فبراير 2009 3:59 ص

مرحـبا مـضيعه

هذا الموضوووع رافع ضغطـــي مــــرررره :44: ..
أنــا من الـبنات اللي ما يهمهم الزواج بشكل عام و أكـره الزواج المـبكر..
لكن فيه مجتمعات ما أعرف كيف غصب طيب تحط لك الزواج الشريان الأول للحـياة..

و بــــــصراحة أنا أؤيد أني أكلم خطيبي قبل المـلكة يعني أقـل شيء تعرفينه شوووي شويات, بس ماراح يــصير هالـشيء لأن مجتمعي رافض :55: :55: :55: و الحـقيقة أنـا ما أصــريت :46: ..
لكــن بالتاكــيد المـهم المـهم فترة الملكة تكـلمة وتجلس معه وتعرف تفكيرة ومـستواه العقلي..

بالنــسبة لشروطي لـعريس الـغفلة:
شكـله: مـقبول و خـفيف دم و أهم شيء يكون جـسمه رياضي نوعا ما :15: <<<متعقدة من الدبيين :7r: و النحاف :20:
ــفكـيره: أتمنــى يكون عـقله متـفتح , يتـقبل الآراء و متواضع, يحتـرم المـرأة كـفكـر..
ماديـــا: نـــفس مــستواي لا أقل و لا أعلى..

<<< أوقات أضحكـ :ha: على نـفسي مع أني ما أتــشرط بس دايما ماما تحطمني تـقول : أنتي يبيلكـ واحد مـفـصل.. و الا بتـعنسين و ياخذكـ شايب مـسيار :50: :50:

على فكــرة مـضيعه أنتي جبتي عن الـشوفة و أنـا وصلت الـعرس بقي العيال و الأحـفاد <<< شسوي فيني كبت سوالف من الاختبارات ماحكيت :41: :41:

تحــياتي لكـ و آسـفين عالإطالة..

13 فبراير 2009 5:06 ص

الأخت مضيعة:
ليس كل من هب ودب يصل الى مرحلة النظرة الشرعية ، قبل النظرة الشرعيى يلزم السؤال عن الرجل …دينة و علمة وخلقة و وضعه المالى و عن عائلته و نسبة “مو يتركون الموضوع الى ما بعد الزواج بسنة ونصف بعد يقولون غير متكافئ النسب “……الخ ثم يعطى موعد للنظرة الشرعية بمحرم لا يتركون معا لأن الشيطان خطيييييير
و
س
ل
ا
م
ت
ك

13 فبراير 2009 9:34 ص

اما حفله بجد

لاصور ولاهم يحزنون يتهيألي بعد السؤال عن الخاطب

تكون النظرة الشرعيه وتكون النظره على حسب عادات كل عائله

بس من غير افراط ولا تفريط :)

والنظره الشرعيه والزواج حكايه ماراح تخلص :15:

13 فبراير 2009 10:59 ص

إذا خطب أحدكم المرأة وأراد أن يتزوجها فلينظر بعض ما يدعوه إلى زواجها،

^
^
^
هذا كلام أفضل الخلق عليه الصلاة والسلام مو معناته ينظر بالعين فقط يعني ممكن منطقها يعحبه صح ولا لأ !
إحنا عندنا الشوفه آخر شيء لمن خلاص يكون البنت موافقه والولد موافق لازم شوفه وبين وقت الشوف والملكه والتحاليل وكل دا الكلام عادي لو يتكلموا تلفون .
عن نفسي مستحيل أتزوج رجل وانا ما اعرفه كويس وتكلمت معاه ( وبمعرفة أهلي) لأنو مو بس يطالع فيا وأطالع فيه وخلاص أعرفه في شيء إسمو طبع إسمو توافق فكري ما أعتقد إنو بيجي من النظره والتوافق الفكري دا من أكبر أسباب الطلاق لو ما كان فيه توافق .

هذا والله أعلم .

شكراً مضيعه :6:

13 فبراير 2009 2:14 م

كلامك اكثرها سليم وجميل ويعايش الواقع ..

انا أؤمن بقضية أن المرأة والرجل لابد من رؤية بعضهما ( النظرة الشرعية ) وأن يحدثها فيها مع وجود والدها أو أحد أخوانها .. لابد أن يسمع صوتها وتسمع صوته .. ( طبعاً مو شرط 5 دقائق ولا ربع ساعة ) .. هي كلمتين ورد غطاها .. حتى لو السلام ورده او تسأله عن صحته وأخباره ..

لكن بجد في قصص في النظرة الشرعية يندى لها الجبين ، كم من البنات تقدم لهم شباب وأصبحوا تجارب لعيال مبزرة .. يجي يشوف ويمشي ولا يوافق عليها ودواليك ..

أعرف أحد العوائل تقدم لهم شاب وشاف البنت ، ثم بعد أسبوع رفضها ليش لانها ما اعجبته ( وهذا حقه ) ، بس وين حق البنت !! اهل البنت المفروض يكونون على علم ودراية باللي بيتقدم وهل هو جاد او لا ، والمفروض على العريس انه يسأل عن البنت وعن اهلها وعن شكلها وكل شيء حتى لا يضع نفسه بموقف حرج ..

المشكلة ايضا اعرف شخص سأل عن البنت وعن اهلها وعن شكلها واسمها وكل شيء واعجبه كلام اهله عنها .. لكن يوم وصل وشاف البنت .. تصدقين ان حصل اسمها مختلف عن اللي قالوه له !!

لابد من الشاب او البنت ان يسألون وبكثرة عن بعض قبل النظرة الشرعية .. والا اصبحت البنت سلعة للنظر ( وهذا مرفوض من قبل اهلها ويمكن اهلها ما عاد يقبلون باحد الا يمّلك عليها مباشرة ) وكذلك سمعة سيئة للشاب اللي راح ينتشر خبره انه يدخل بيوت الناس علشان بس يناظر البنات ( وهنا المصيبة !! )

الحمد لله اننا بعيدين عن كل هالاشياء حتى الان .. وتعيش العزوبية :6:

13 فبراير 2009 2:30 م

كلامك سليم.
لا يحتاج إلى تعقيب أو ملاحظات.
(وجه يقول يا هيك المواضيع يا بلا :lol: )

13 فبراير 2009 4:26 م

النظره الشرعيه من اسمها ” شرعيه ” ما فيها كلام
لكن كيف تكون ؟
هل تكون قبل الموافقه المبدئيه من قبل الطرفين ام بعدها ؟
لأننا نسمع في بعض المواقف انها تحولة الا نظرة تسليه
وبصراحه الملام في مثل هذه المواقف ولي امر البنت !!!
لأنه عليه السؤال عن الشخص قبل ان يضع ابنته في هذا الموقف .

13 فبراير 2009 7:19 م

أحلى مقطع عجبني جداً

انا مؤمنه بانه ضروري الانسان يتزوج زوجة جميلة بس مش معناته انه ينسى اخلاقها وتربيتها وينسى ابوها وامها واهلها ، اتوقع الولد يشتري البنت بسمعتها الطيبة بس وين خلوا الاولاد فيها سمعه دامهم يقزون قبل الخطبة ..

—-

بس ملاحظة ماعمري سمعت أو أحد قالي من فئة الشباب

أن فيه قز وصور قبل الخطبة ….!!! وافشيلتاه إذا صارت

14 فبراير 2009 9:15 ص

أتصور أهم نقطة في النظرة الشرعية أن الإنسان مايتكلف ويظهر في زينته العادية مو (شغل كوافير ونحوه) لأن هالزينة العادية هي الي ح تكون موجودة غالب أيام العمر
نقطة ثانية بالنسبة للمكالمات بين المخطوبين فهي ضرورية لكنننننننننننن .
لها ضوابطها ماهي سعة صدر وسواليف ..
والمحتاج لها يرجع لفتوى الشيخ ابن جبرين فيها ..
أما الخلوة والتقهوي وسعة الصدر هذي ما أنزل الله بها من سلـطان
كمان الي يدخلون بحجاباتهم ..خطأ لأن الشعر من زينة المرأة وأنا شخصياً أحس الشعر من أهم شي الأشياء المؤثرة في الشكل العام ..فليش أغطيه..
بشكل عام أتصور أن الغش في هذه الأمور سيء لأنه بيرجع على التجربة (الزواج) بالسوء
يعني غشيتي الرجال وطلعتي بصورة غير صورتك وش استفدت؟
بيتزوجك ويكتشف ويتضايق ..خليك بشكلك الطبيعي وح يتقبله ..

14 فبراير 2009 1:02 م

الاعصار الاحمر :

يا سلاااااااااااام يعني عادي يزورها لمدة اسبوع ويشوفها اسبوع كامل (7 ايام ) يعني ( 7 مرات ) وبعدين يهون ما ياخذها
ياعيييييييييييييييييييييني بس :) خوش خووووووووش

اي ماشاء الله عليك حافظ الكتاب حفظ ” انا اول مرة اسمع انه يشوفها مليون مرة عادي ” >> بدا يزيد العدد

” طبعا بيكون ولي امرها جالس او اي احد من محارمها “

14 فبراير 2009 1:15 م

فــرح :
انتي جبتي العيد في ردك ” بعدين اقولك ” !!!

بخصوص انهم يتكلمون والله يا فرح في سواليف عن سواليف يعني بتسئلة وين تشتغل او وش هوايتك هذي سالفة يرحم والدينك ؟؟

اما بخصوص تقولين بيجي رجال ما اعرف شئ عنه غير الناس اللى قالته ( انا زيك ارفض هذا الشاب واسمية ” فقع ” ) فجاءة يجي انسان ما سمعنا عنه ولا شئ ولا عن اهله ويقولون لنا جاي يخطب لا مستحيل اوافق لازم يكون في احد يعرفة على شان اقتنع اكثر

لان الشخص اللى يجي يخطب من طرف فلانه عن فلانه عن فلانه هذا ما ينفع لانه يرتدي ملايين الاقنعه >> عاجبتني سالفة القناع ” تقولين ماسك ”

- اي اذا احترقت يقولون ان يطلقها هههههههههههههههههههههههههههههه استغفر الله العظيم حسبي على ابلبسك عليك تعليقات ما ادري وش تبغى ” والله اذا يحبها وبينهم عيش وملح مستحيل يطلقها ” في ناس زوجاتهم انشلوا وصاروا مقعدات ماطلقوهم ولا تزوجوا عليها >> هذي الرجاجيل ولا بلاااااااااااااااااش

* اهم شئ غير متربي ( ترى اذا انجلدتي انا ماعرفك )
:)

14 فبراير 2009 1:31 م

العائشة :

هههههههههههههههههههههههه في احد قالك ان دمك مرة خفيف وعسل ههههههههههههههههههه

سلاااامات لا يكون قايلين لك اني اتشقلب بطريقه بهلوانيه وانا مدري , والا فاتحين معرض فنون جميله !

لا انا قالوا لي ان غرفتك حوسة هههههههههههههههههههههههه
على هالتعليق اللى وسعتي صدري فية تكفين لا ترتبين غرفتك سنة كاملة >>> لا تسمعني امك

وشوفي الام اللى تيجي تشوف البنت والله من حقهم احيانا ما تكون شايفتها بس في طريقة اذرب ( تقول ممكن نتعرف وتيجي تزور ام البنت ) انا وحده لو احد يقول جاين نشوف بنتكم لو ينطون ما انزل وش هذا تخيلي نازلة اعرض نفسي لو يدفعون لي مليون مهري افكر انزل >> لاتخافين لو مليون بنزل واجيبك معاي هههههههههههههههه

- صديق اخوك يبي وحده تشبة زينب العسكري هههههههههههههههههههههههه هذا اتوقع عمرة 41 لانه قديم في احلى منها الحمدلله والشكر من جد عقول ما ادري وش تبي ( اجل لحد يلون البنات يبغون واحد زي مهند ) >>>> خارج التغطية من الضحك

- بس عايشة وش دعوة سيارته اهم من اخلاق الولد يختي على قولت فرح لو احترقت البنت انا بقولك لو صدم بالسيارة وفلس الولد واشترى كامري بتطلب الطلاق ( الحمدلله والشكر )

- لا انتظري يومين خليني اوقف ضحك وتعالي علقي مرة ثانية وسعتي صدري يقطع شرك :)

حياك الله منورة بطلتك والله يرزقك بزوج مرتب جدااااااااااا ويطفشك كل شوي يقولك رتبي نظفي غسلي >> امزح والله

14 فبراير 2009 1:41 م

sara

البنت اللى تاخذ راحتها بالملابس الشرها مو عليها على اهلها وهذا يدل على اصلها
بخصوص الملابس واللى نسمع قصص تفك الراس ولما تتكلمين يقولون لك ( عادي وش فيها )

اتذكر في بنت كانت معانا بالثانوي وافقوا على الولد اللى جاي خاطبها وكانت بتدخل النظرة الشرعيه الا اطلبت ام الولد ان البنت تلبس تنورة قصيرة وتيشيرت على شان ولدها يشوف البنت زين (( تم رفض الولد المسكين والسبب امة اللى ما ودي اقول ما ادري كيف تفكر ))

عادي يختي تشوفين العجب بهالزمن

14 فبراير 2009 1:50 م


مسفــــــــــر :

صح انا معاك بنفس الشئ الفكرة ان البنت ترتاح للولد او لا وبعدين من حقة يشوف البنت احسن من بكرة ينصدم فيها بعد الخطوبة ويطلقها ..
واساسا ما بيدخل الشوفة الا بعد ما يسئل عنها واهي اهلها سائلين عن الولد وكل شئ عارفين عنه لية يسولفون (( انا معاك بهالنقطة )) >> واخيرا حصلت احد مؤيد لكلامي :ddd

اكييييييييد مافي خلوة لازم بيكون في احد ابوها او اخوها او جدها .

في بنت كانت معانا في احد الدورات وتسولف انها لما ادخلت النظرة الشرعية اطلبت قبل لا تدخل ان ابوها يطلع على شان تاخذ راحتها وتتكلم مع الولد وابوها وافق واجلست معاه >> في هذي الحالة الموضوع راجع للأهل وللعادات والتقاليد وللخرابيط
:d

14 فبراير 2009 1:58 م


مشغول :

اذا كبير وفاضي هذا حالة ثانية ، بس مهما كان العائلة بتكبر ولازم البنت تطلع في بيت لحالها

اقرب مثال : احيانا يكون مطبخ واحد هو مطبخ البيت والبنت تبي تطبخ وتسوي اشياء على راحتها تستحي والله كل شوي رازة وجهة بالمطبخ

بس مو عيب انها تسكن معاهم بنفس البيت ابدا :)

وخصوصا ان اسعار الشقق في تزايد مو طبيعي :( بس وش نسوي القرار راجع للبنت واهلها وللولد

14 فبراير 2009 1:59 م

ToOoOOP

لا تقولين لي عن الملابس لان الملابس والميك اب هذا يرجع لأهلها اللى وافقوا بنتهم تدخل كذا ..

انا اقول لية ماتدخل البنت بعباية وحجاب >> يعني بس وجهة يطلع

انا جداً مؤيده لهذي الفكرة

” احس انا وانتي بننضرب ” :)

يللة اكتبي بوست وكملي اللى انا ماكملته وعنوان البوست ( سيرة وانفتحت ) >> اووت مضيعه

14 فبراير 2009 2:01 م


B.A.Y.A.N

امانه لما دريتي انه سوت هالحركة ما زعلتي ؟؟؟
لو انا مو بس بزعل كان ادوس ببطنها وحتى لو كانت تقرب لي لان قلت حيا بما تعنية الكلمة ( البيوت لها ابوابها وعندنا اهل يجون يخطبون منهم واذا ادخلوا الشوفة الشرعيه وما عجبناها الباب اللى ادخلوا منه والله يقدرون يطلعون )

- ذكرتيني بصديقتي صار لها هالسالفة مع احد اقاربها ودرت ان اختها خلتها تشوفها تقول الى اليوم ما صارت تدخل بيتهم بس تتكلم معاهم وكل شئ تمام بس ماتدخل بيتهم ابدا >> ما تنلام والله ..

انا اقول اللى يصير معاها زي هالموقف وتدري ان ولد فلان شافها تنادي ابوها واخوانها والله مو يدوسون في بطنة الا يحفرون قبرة ،، لو كانت وحده من خواتها وصاير لها نفس الموقف كان محد يرضى عليها ..

فمن جد لازم ننتبه الناس سار عنها كل شي عادي

^
^
تحتها خطين وعشرة بعد

والمصيبة لما تتكلمين يقولون عادي احنا نوفق راسين بالحلال والولد نيته يبي يتزوج وش قلت الحيا شايف كل بنات الناس ويجلس يختار

مشكلة الناس صايرة تحلل على كيفها

مجتمع غبي الحمدلله والشكر

14 فبراير 2009 2:05 م


الجــــــــــوري :

وعليكم السلام

تماااااااااااااااااااااااااام ، وانتي بعد من زمان عنك ( الله يرحم ايام السهر بالماسنجر معاك انتي وكادبري ) :( اااااااااخ اشغلتنا الحياة
لنا عودة للحديث والحش اخر الليل >> اهم شئ خخخخخخخخخخخ

- الحديث معاك بالماسنجر عن هالموضوع كان طويل وقلت لك شغلات كثيرة وعرفت رايك واشكرك على دعمك لكتابة هذا البوست

اما يبي يشوف طول شعرها ( خليها تستخدم زيت فرامل السيارات كويس يطول الشعر ) الحمدلله والشكر مال اووووووول يبغون شعر طويل وتحط بشعرها حنة بعد >> اسكتي احسن

* وحده ادخلت نظرة شرعية وكانت بتطيح ما انتبهت للسجادة وقالت بسم الله الرحمن الرحيم
قام الولد مسكين قال لها : وعليكم السلام

هههههههههههههههههههههه

>> لاتضحكين من عاب ابتلاء

منووورة دوووووووولي ولنا عودة في وجهة قريب ان شاء الله بس ما ادري متى >> انا وانتي بنتسطر ;)

14 فبراير 2009 2:08 م

مستخدم جديد :

ان شاء الله تصير مستخدم قديم ..!!
لا تستهين بهالمواضيع والله في بنت ارفضت شاب لان برجة ما يناسب برجها >> عقول تافهة لا اكثر ولا اقل

حياك الله

14 فبراير 2009 2:22 م

أبو لارا :

يا ابو لارا انتم جيل نادر من الشباب الان ،، اعرف احد صديقاتي زوجها رفض يدخل نظرة شرعيه قال انا واثق في ذوق اهلي وانا عارف اخلاق البنت واهلها وما دخل نظرة شرعيه بعد ما كتب الكتاب دخل وشافها واهي بعد كانت اول مرة تشوفها ” هذي ناس تفكر صح بالمستقبل ” مو واحد يدور شكل البنت الحمدلله والشكر
(( امي تقول دائما ان البنت تتغير بعد الزواج والجمال مايبقى طول الحياة مجرد ايام وينتهي اللى يبقى هو اخلاق البنت وتربيتها لان راح تعكس تربيتها على اعيالها وهذا المهم ))
بس الشباب مايفكرون بالمستقبل :(

* انا معاك ابو لارا لو احد يقول نظرة شرعيه مرة ثانية هذا دليل ان الولد مش مقتنع في البنت لية نظرة شرعيه ثانية يعني مثلا بيتغير طولها او بيتغير شكلها :/ بس وش تقول اذا الاهل يوافقون الله يهديهم

تعليقك جداً راااااااااااااائع ولو كنت طالب عندي وهذي اجابتك كان اعطيك العلامة الكاملة واخليك تتخرج مع مرتبت الشرف >> وحده كل جالسة مع الطالبات وتسمع ازمة الاختبارات

14 فبراير 2009 2:26 م


مفنوده :-

لا الحركة عادي جداً ان تروي اهل الولد اي معلية لان من حقهم احسن من يجون ويقولون نبي نشوف بنتكم (( بس وش يثبت ان اهل الولد ماخلوا الولد يشوفون صورتها )) ؟؟؟؟؟ هنا السؤال المهم

في احيانا وحده تدور لولدها ” وانا دائما اقول الامهات ابتلشوا في اعيالهم ” تقول لها وحده عندي بنت اختي وترويها الصورة ( تروي الام بس ) وتاخذ الصورة مو تخليها في بيتهم ويمكن تقتنع الام وتوافق وتروح تخطبها حق ولدها

يرحم والدينك الاولاد اي بنت بتجيبنها بيوافقون عليها انا قول الاهل لهم دور لما يجلسون يتناقشون عن البنت قدام الولد

لو يجون يقولون له : بنت فلانه حلوة رشيقة جميلة اخلاق مؤدبة …………….الخ ” الولد راح يوافق اكيد ”

اما يتناقشون قدامة ويقولون كانها شوي سمرة ” اكيد بيقول لا ما ابغاها ”

-

انا مؤمنه بشي اسمه كما تدين تدان || ومثل ماتسوي راح يصير لك

صح انا قلت نفس الكلام ان الدنيا دوارة وبيجي يوم على اخواته او بناته لان هو يوم من الايام شاف بنات الناس

سعيده بتعليقك

14 فبراير 2009 2:32 م


ريم بنت محمد :

ههههههههههههههههههههههههههههههههههه

بتـعنسين و ياخذكـ شايب مـسيار

اذا بتاخذين شايب مسيار اهم شئ عنده فلوس على شان تورثينه >> بتنجلد هذي الثانية

لا بسم الله عليك الله يوفقك يارب ويجيك واحد تفصال من برا >> على شان تفوشرين قدام صديقاتك وتقولين زوجي تفصال من الخارج مافي زية بالبلد ههههههههههههههههههههههه

بعد الملكة يكلمها ” يعني بعد كتب الكتاب ” اييييييييييييي اكيييييييييييييييييد مايبغالها كلام

بعد تسون لنا زي ال××××× ” ماني قايلة ” يقولون لا مايكلمها طول فترة الملكة وبعدين الزواج يحددونة الاهل وتروح معاه واهي ماتعرف شئ عنه هذا الناقص

لا لا ابشرك انا انسانه متفتحة لازم تكلمة بعد ما يكتبون الكتاب ضرووووووووووري

اما تبين واحد جسمة رياضي عليك تشرط ما ادري وش يبي انتي زي البنت اللى تسئل ” وش برجه ؟؟” وش رايك تروحين نادي الرياضي وتشوفين اللى يلعبون هناك وتعليقن ورقة فيها مواصفاتك

انا اقول استريحي

لان كل وحده تحط شروط يجيها العكس تماااااااااااااااااماااااااااااااااااااااااااااااااااااااااا

سعيده بوجودك

14 فبراير 2009 2:36 م


o t h m a n

اكيييييييد عثمان ما بتدخل البنت النظرة الشرعية الا يكونون موافقين على الولد…!!! تخيل تدخل اول مايجي يطق باب بيتهم :( كارثة هذي

كلامك اللى قلته مافي اي احد مايعرفون او يعترض عليك ..

14 فبراير 2009 2:37 م


ليمونة :

صح اهم شئ من غير افراط ولا تفريط

ولا يقولون لها قدمي العصير زي الافلام الابيض واسود

14 فبراير 2009 2:38 م


مشاعل . م :

كل الناس النظرة الشرعية بعد ما يوافقون الاهل على الولد والبنت توافق تدخل نظرة شرعيه (( تخيلي يدخلونها مجبورة )) اااااااااااااااااخ انا بصيح بالنيابة عنها :d

صح انا زيك مشاعل لازم يكون في توافق بين الاثنين ، يعني مثلا واحد يجي يخطب بنت مر فرررررري والولد ناس ملتزمين مايصلح لان بيصير مشاكل وقليل من الناس اللى يتأقلمون مع بعض

مشكلة ثانية بعد حاولت اني اكتبها على شان اوصلها بس ما قدرت ولحد الان ما ادري كيف اوصلها
بس الزبده ضروري ان يكون البنت والولد تفكيرهم متقارب من بعض

14 فبراير 2009 2:41 م

جندبي :

اتوقع اسمك جندبي تغير لمصطلح ( جنوبي ) وبدل الواو حطيت دال وتوهقت ماقدرت تغير الدومين وقلت خلاص نخليها زي كذا اسم جديد ..

- السلام عليكم وعليكم السلام مو مشكلة ، بس تجلس تسولف وتسئلة عن هوايتة يعني وش هالبياخه ” مجلة ماجد تسئلة وش هوايتك ” …

كويس انكم تسمعون قصص تشيب الراس زي ما احنا نسمع والله اول ما كان في زي هالقصص الحين صار مصخرة (( وحده ادخلت نظرة شرعية وتم تأجيل كتب الكتاب الى بعد 4 سنوات لين مايتخرج الولد من الجامعه )) وعادي البنت تكلمة بالتلفون وكل شئ وكانه الكتاب انكتب ” اتوقع ما يجوز ” يكتبون الكتاب وينتظرون بعد 4 سنوات يتزوجون بسلامتهم ، بس زي هالمصخرة مايصير تخيلوا بعد اربع سنوات يغير راية الولد (( في كثير اشياء استهتار ))

تصدقين ان حصل اسمها مختلف عن اللي قالوه له !!

* اما طلع اسمها غير هذي سالفة ثانية بعد ؟؟؟
شوف في واحد دخل النظرة الشرعية وشاف البنت طلع انه اهو سمع الاسم خطأ من اهله من الربكة وحاط اسم ثاني في بالة ( مشكلة الولد ) اما ان حتى اهله ينصدمون بالاسم غير بصراحة كارثة ولا تعليق :) >>> نحسن النية يمكن البنت غيرة اسمها مو عاجبها اسمها ..!!!؟؟؟

طبعا لازم يسألون ومشكلة لما يسألون مايكفي السؤال لو يكونون عارفينهم يعني احسن …

وتعيش العزوبية

خلوهم عزابية تنفعهم ××××××

14 فبراير 2009 2:57 م

خالد الجابري :

(وجه يقول يا هيك المواضيع يا بلا :lol: )

ممتاز في احد موافق

حياك الله

14 فبراير 2009 2:57 م


نون :

هل تكون قبل الموافقه المبدئيه من قبل الطرفين ام بعدها ؟

بعد الموافقة من الطرفين طبعاً

حياك الله

14 فبراير 2009 3:23 م

مجرد سؤال:

اي لانهم يعرفون انها سواد وجه وش يقول انا طليت على بنات الناس من ورى الباب او جارتنا جابت لي صورت البنت

طبعا مو كل الناس يقزون قبل مايخطبون بس في فيئة الله يهديهم ويصلحهم

14 فبراير 2009 3:26 م


الاء:

كلامك سليم جدا،، في كثير ناس يروحون كوافير وتذبح نفسها يعني لازم بالقوة تطلع حلوة على شان يخطبها خخخخخخخخ

مشكلة في ناس يركبون باروكة بشعرهم على شان يطلع طويل وبعد الزواج تطلع الحقيقة :(

قلت ادب الناس اللى يغشون اعيال الناس ” مثلا يطلعون اختها ويقولون انها البنت وبعدين يشوف شكلها غير بعد الزواج ويطلع مروينة اختها ” >> ترى صايرة كثير هالقصة

استغفر الله العظيم بس عقول ناس غريبة
حياك الله

14 فبراير 2009 3:29 م

ممممم

والله أنا أخالفك كثييييييييير في هالبوست يا مضيعة :)
زوجي المستقبلي
شريك حياتي

من حقي أسأله كل شي يخطر ببالي
أما اتدبس فيه وعقب اتفاجأ ..!! لا والله أنا في غنى عن هالشي :)
آخذ وأعطي معاه وأعرف كيف يفكر وايش هواياته ايش يحب وايش يكره
أجل بس السالفة يشوفني إذا حلوة والا لا
وأشوفه إذا مزيون والا لا

وبس قضينا ؟ :15:

جددددددددددددددددا ً أخالفك :D

14 فبراير 2009 5:07 م

jaz

الله يوفقك يااارب

كل ناس لهم عاداتهم وتقاليدهم اذا انتي اهلك يسمحون لك تجلسين تسوليف وتحسين عندك الجرئة انك تتكلمين قدام شخص غريب فعادي لية لا :)

بس احيانا يتحول النقاش الى خارج الموضوع المطلوب وهذا اللى اقصده

14 فبراير 2009 5:13 م

قبيلتنا مافيها شوفة خير شر اللهم يا كافي :15:

بس أنا لما أتكلم فأنا أتكلم عن الشي اللي أنا أنا جاز مقتنعة فيه لحالي وما علي من رايهم هم أو وش يشوفون :)

متمردة بأه :15:

————-

مضيعه بيتهم /

كلمة وحده قالوها لي من فترة ( ان مافي اي احد يقدر يجبرني على زواج انا ما ابغاه ) وكنت سعيده يومها ونمت وانا مرتاحة

انا بقولها لك الحين محد يقدر يجبرك تتزوجين واحد وانتي ماتعرفين عنه غير اسمة ومكان عملة واهله

وانا معاك مستحيل اوافق على انسان ” فقع ” والفقع هو الانسان اللى ما تعرفين عنه اي شئ
:D

ربنا يرزقك الزوج الصالح يا قااااااااااز ونزغرط لك قولي امييييييييييييين

14 فبراير 2009 9:22 م

:6: موضوع روعه !!

بس تصدقين أختي أكبر مشكله إذا الوحده متعلمه والشخص جاهل من يوم جابوه أهله مع الأبل حقهم :15:

حتى مليوووووون نظره شرعيه ما تكتشفه تحاول تطلع الدرر :58: بس ما تحصل :seco:

بس أتوقع الموضوع كله (الخطبه والنظره أو الجلسه) :54: كلها تعتمد على تألف الأرواح !!

بعضهم حتى من طاريهم الواحد يرتاح لهم ويشوفهم لمحه يحس انه يفهمهم وبعضهم من أول ما انشوفهم نحس (استغفر الله ) =( كأن أبليس داخل علينا ما نرتاح والنفس (تكش) مدري تقشعر منهم :27: …..

بس قهر اللي قلتي !! ان الصديقه تخلي أخوها (مأصوف الرئبه) يقزقز مع البيبان !!!! :wow:

أحسها نذاله حتى لو كانت بغرض شريف (الخطبه) …

يا الله يا أختي مضيعه نشوفك على خير وين عبايتي اييييييييه هذه هي ….<<< عايشه الجو

:15:

:41:

16 فبراير 2009 3:34 ص

يـآآآآي موضوعك ع الجرح :seco:

يحول يااللي موب رآضين بشي :55:

وع قولك المجتمع ياخذ من الشرع اللي يعجبهـ ويترك اللي مايعجبهـ ..

والا اساس النظرهـ الشرعيه تكون بدون علمـ البنت ويظهر فيها مايظهر عند محارمها

لكن الحين مجتمعنا انقسم في هاالنظرهـ لاحزآآب :seco:

منهم اللي حرم هاالنظرهـ والضعيف الشاب هو اللي راح فيهـآ ..!
ومنهم اللي تدخل داقه الزين لدرجه تحسينها اليوم بتتملك موب نظرهـ..!!
ومنهمـ اللي عادي تدخل وتطلع نظره عاديه ..!!
ومنهم اللي قلتي تدخل تفلها معهـ ماكنهـآ نظرهـ ذي :55:

والنظرهـ اساسهـآ من المسمى نظرهـ يعني بس نظرهـ تريحك او تنفرك موب دراسه معتقدات الاخر وطباعه :ha:

عوآفي ياقمر :46:

18 فبراير 2009 4:01 ص

أنا بصراحة مع إن البنت تتكلم مع خطيبها في يوم النظرة الشرعية..

عشان تعرفه أكثر وتعرف تتخذ قرارها صح..

يعني مو معقول أسمع كلام رسمي وأقبل!!! عشام كذا نشوف بعض اليوت كل واحد من الزوجين في صوب، مافي شي يجمعهم :@:

بصراحة مرجعي في هالنقطة هو الأستاذ جاسم المطوع، هو اللي سمعت منه ما هي طبيعة الأسئلة اللي ممكن تسأل في يوم الشوفه..

ومؤمنة بكلامه ١٠٠٪

19 فبراير 2009 9:07 ص

في نقاط في النظرة أريد أن أتحدث عنها

الخلوة بها ولو لثواني
بعض أولياء الأمور يخرج لدقائق ( الولد يستحي ) !!

دخول مرأة كمحرم بدل الرجل !! لا أريد أن أفتى !!
لكن أتسائل هل يصح شرعاً ؟؟

تلبيس الشاب للبنت دبل أو ساعة أوغيره ( خذوا في الاعتبار حكم الدبل )

صديقة لي في الخطبة لبسها العريس !!
خير انتي أجنبية مايجوز لمسك كيف يلبسك ؟؟
غير عن اللي تصور وكيكة ودنيا وكأن الزواج اليوم !!

النظرة لا تكون أول أمر في الخطبة
السؤال والموافقة المبدئية قبلاً ، ( مشان مايصيروا بنات الناس لعبة )

((والا اساس النظرهـ الشرعيه تكون بدون علمـ البنت ويظهر فيها مايظهر عند محارمها ))

القلب الحنون من قال بأن النظرة تكون دون علم الفتاة ؟؟

أختي مضيعة كلام الإعصار صحيح ومر علي في الثانوي ، لكن بكل تأكيد بحدود

شكراً على الموضوع (f)

20 فبراير 2009 7:27 ص

هههههههههههههههههههه
يخربـ عئلكـ
آنا مع الشوفه في حدود المعقوول :22:
آما آنهآ تكوون بصبصه وقلة حيآ لآآآآآ وآلف لاااااااااااا :44: :44:

وبعدين الانسآن له آنطبآع آو آحسآس من آول نظرهـ :15:

(f)

21 فبراير 2009 2:35 ص

مضيعة
اذا بداية الخطبة اصلا كانت بطريقة فجة وفظة وش تتوقعين توصل له مرحلة الشوفة من السخافة

بس بشكل عام
في نظري لازم يتم بينهم حوار بسيط، لانه من الكلام بينهم بيخف التوتر شوي وبيقدرون يحددون احساسهم هل هم فعلا ارتاحوا والالا

أما مسألة المكالمات قبل الملكة فاللي سمعتها انها تجوز في حالة وحده اللي هو انهم يكونون قرروا خلاص انهم بيتزوجون بس بيأجلون الملكة لظروف خاصة
والله أعلم :11:

يعطيك العافيه على هالموضوع
والله بردتي حرتي

23 فبراير 2009 12:18 ص

هههههههههههههههههههههههههههههههههههههههههههههههههههههههههه

ضحكت على التعليقات لين دخت :seco:
بصراحه انا اول مره اجي هون
وبصراحه وايد عجبتوني

:00:

5 مايو 2009 11:13 ص

ادعولي اتزوج

7 سبتمبر 2011 6:09 ص

انا بكرة نظرتي والله خااااااااااااااااايفة بس ماراح أتكلم ولاشي مقدر مقدرررر تكفون طمنوني

30 أكتوبر 2011 12:33 ص

ياربي اغفرلنا وارحمنا وهدنا وكتبلنا مافيه الخير والبر والصلاح اللهم إنا نسالك الرزق والعافية والستر والمعافاة الدائمة في الدين والدنيا والاخرة يارب العالمين

سؤال / ادا الخاطب سال المخطوبة كم سؤال والبنت ماردت مهب عناد خوف وحياء وهل البنت تكون غلطانة ؟؟؟؟
يعني مجرد سؤال واتمنى السعادة لجميع المسلين والمسلمات في كل مكان الاحياء منهم والاموات :)

15 مارس 2013 7:33 م

سجل تعليقك الآن !
















Trackbacks