هناك كثير من الامور في حياتي (وليس حياة الناس ) عندما افكر في اتخاذ قرار انه اصعب قرار بيكون في حياتي …
في مرحلة الثانوية :-
كنت اعتقد ان قرار اختياري للمدرسة هو اصعب قرار راح يمر على علماً ان امي بالتعاون مع عمتي انقلوا ملفي بدون ان اوافق على الثانوية وعلماً ان امي كانت تدري رفضي الشديد لهذي الثانوية …
عند الانتهاء من اخر اختبار في مرحلة الاول ثانوي وتم توزيع اوراق ماهو التخصص اللى نرغب فية ( أدبي / علمي ) كان اختيار صعب ايضاً ..
وتم تحديد الادبي ومشت الحياة الحمدلله ..
بعد التخرج من الثانوية :-
اغلقت الابواب في وجهي لان تخصصات المرحلة الادبية محدده والجامعات في الشرقية تنعد باليد الوحده ولا تحتاج لليد الثانية ،، وثلاث ارباع التخصصات انا ما ارغب فيها وليست حلم من احلامي المستقبلية ..
كنت اعتقد ان لا يوجد اصعب من هذا القرار هو تحديد مصيرك الجامعي ،، وسنة ونص وانا تخصص دراسات اسلامية وكنت احس ان هذا المكان غير مناسب وكنت اعتقد انه قرار صعب اغير التخصص الدراسي ،، والحمدلله غيرته بكل سهولة :15:
وفي اثناء الدراسة كنت افكر بوظيفة وبما اني استقريت بس كان الوظايف البحث عن وظيفة في اماكن محدودة للاسف
*
كلها قرارات تافهة كنت اعتقد انها صعبة والان وانا ارجع اقرأ الاسطر اكتشف انها اسخف قرارات بالحياة ….!!!
هناك قرار اصعب من هذا القرارات كلها
وهو قرار الزواج …!!!!!!!!!!
من الصعب ان تحدد مصير حياتك كاملة مع شخص لاتعرف عنه اي شئ فقط ( اسمة & مكان عمله ) والصدمة ماتدري كم عمره :/ ولا اي شئ عن حياته ولا نبذه بسيطة ،،
جميع القرارات السابقة يمكن اي لحظة انك تتراجع عنها ويمكن في وسط القرار انك تتركة وتتخذ قرار افضل ،، اما مصيرك بالزواج في بدايته صعب اتخاذة وعند اتخاذة يمكن يكون الصدمة وفي منتصفة من اصعب الامور انك تتراجع عنها لسبب بسيط او تافه لهذا السبب انت مضطر للأستمرار بقرار اتخذته طوال حياتك ..
لما تيجي تفكر بقرار الزواج فانت تفكر ( عن نفسي اتكلم ) بحياتي ماقلت حق احد عن مواصفات الشاب اللى ابغاه لان فكرة الزواج ماكانت موجودة في بالي من الاساس وكنت اخذ الموضوع من باب ماجاء في ( وسع صدرك ) ،، واضحك على عقول البنات واقول زي البنات [ غني ، كشخه يمشي من فوقة لين تحت ماركة ، سيارته اخر مودي ، يحب السفر ........الخ من خرابيط البنات الزايد وعينة وحده زرقة والثانية خضرة ]
اخبرت ضايعه اختي في احد الايام بالليل وكان الحديث طويل وقلت لها يهمني انه ما يكون [ شاب الفقع ] …!!!
STOP
قالت لي ضايعه وش شاب الفقع ؟؟
حتى انا ما ادري كذا طلع الاسم معاي واعجبتني السالفة ،، وقلت خلني اتفلسف وقلت لها فقع انه فجاءة يجون ناس ويتقدمون لخطبتك ماتعرفين عنهم ولا شئ وحتى لما تسئلين ناس تعرفون فلان الفلاني يقولون لا والله مانعرف ، بعكس لما يكون الشاب [ مش فقع ] كثير من الناس تعرفة يمكن مايعرفون الولد بس في ناس تعرف امة ناس تعرف خواته …….الخ شوية يعني يصير الموضوع اسهل من شاب الفقع لا أثر لة على وجه الارض ولما تسئلين بتحصلين الصفحات البيضاء الخالية من الخطوط السوداء والدواويح الحمراء وهذا كلة كذب ونفاق ،، لان خالي فلان قال [ الشاب لما يجي يخطب يكون لابس مليون قناع وقناع ومع الايام يبدا يخلع الاقنعه واحد ورى الثاني ] …
- لما تفكر بالزواج وتسئل وبما اني اسئل بعض البنات بنفس عمري على طول يقولون لي [ لاتنسين تسوين عرس وياويلك لو كان عرس اسلامي ترى نبي نوسع صدرنا ،، وروحي سافري ووسعي صدرك ] انا من الناس اللى مابسوي لا حفلة خطوبة ولا زواج لان رضاء الناس غاية لاتدرك وبصراحة انا لما انعزم على زواج مالي خلق اروح ولية زواج وخساير وكلها ليلة وتعدي والناس مهما تسوي مايبين بعينهم ،، واذا هذا التفكير فهذي كارثة ، لان الزواج يوم واحد بس انتي بتعيشين مع الشاب لسنوات عديده مهم جدا تفكير الشاب ومهم تعرفين نبذة عن حياته مو شاب [فقع ] ماتدرين عنه الا المظهر هذا جدا صعب … والاهم مايكون شاب يبي يتزوج ولما يتزوج ينصدم بالحياة الزوجية ويقول ليتني عزوبي 
- ومن الامور الصعبة انك تبدين رايك في الشاب وخصوص وانك فتاة فالراي راي الاهل ويمكن انتي مو مقتنعه بالشاب يقولون لك [ الا زين وفية وفية وفية ] يعني بالعربي وافقي ،، اخبرتني احد صديقاتي وبدون ذكر اسم خطبها شاب مايسمع [ وهو صغير جاته صخونة شديده الولد وفقد حاسة السمع ولكن بصحة جدا جيده ] البنت كانت موافقة وماعندها مانع وتقول مافيها شئ ولا يعيبه ابدا لكن ؟ اهلها جلسوا يقولون لها كيف تتزوجين واحد مايسمع بكرة لو ترجعين البيت مايسمع الجرس لو تطيحين وتنادينة مايسمعك ، وبالاخير كان لازم ترفض لان اهلها هذا اللى يبغون ..
الى الان قرار الزواج صعب ، لان مش بيدك ابدا اي شئ …
ممكن تكلمت عن البنات بصفحة خاصة اكثر شئ ،، حتى الولد قرار الزواج صعب بس يمكن اهو ارحم من البنت ( لان بكل سهولة هو اللى بيختار البنت و لو ما اعجبته بيخليها ويتزوج غيرها وان طلقها الولد عيبة في جيبة زي مايقولون في مجتمعنا اللى ما ادري كيف يفكر ولا قدرت افهم هالمجتمع ولا بفهمة =( ) ،، والبنت تقدر تتطلق بس المجتمع ما يتقبل فكرة البنت المطلقة ..
ومشكلة ثانية انا اعتبرها كبيرة لو يكون عندها اعيال وتطلقت البنت تجلس طول حياتها اهي مرتبطة بهذا الرجل حتى لو تزوجة غيره على شان اعيالها ، وبالعكس الامور تكون معقده اكثر من قبل ،، يعني تجلس عنده ويعذبها يمكن ارحم لها من الطلاق الا في حالة وحده انها تهج من السعودية بعد ماتتطلق يمكن يصير الموضوع اسهل 
قرار الزاوج صعب ….
ماتقدرين تتراجعين عنه وتطلبين الطلاق او تفكين الخطوبة اذا اكتشفتي عيب بسيط بيقولون لك ( مافي رجال كامل ) وراح يقولون بعد ( الحياة صعبة ) وكلام امي ( معلية يا ماما توكم بداية الحياة بتشوفون العن من كذا ) ونجلس وننتظر الاشياء الالعن من كذا والحياة تحذف فيك حذف وتصير زي الكورة بين شباك الملعب [ الشبك الاول الاهل والثاني الزوج ] ،، ولما تتهاوشين يقولون لك ( هذي ملح الحياة الزوجية ) ،،
قرار الزواج يزداد صعوبة ..
الرجل يعتقد بان المرآة خادمة تطبخ له وتغسل وتقول له ( سمعن وطاعه يا زوجي ) >> كف ،
كثير من المتزوجين نسمع قصصهم نحس انهم اسر خالية من النقاش والحوار 
عندهم لغة الحوار معدووومة جدا ،
والزوج يمثل دور القائد والزوجة المسكينة تمثل دور سندريلا [ ويمكن سالي لما صارت خدامة بعد ماكانت غنية ] …
قرار الزواج يزداد صعوبة ..
يزداد صعوبة عندما تكونين مسيرة لا مخيرة ، عندما تجدين انك ماتقدرين تتخذين قرار مناسب او هذا القرار مايتقبلة غيرك ، في كل الاحوال القرار كلة صعب …
حاولت افك بعض الشفرات والرموز المعقدة للزواج حصلتها تزداد تعقيد وتزداد صعوبة ولا يوجد اي شخص ممكن يقدم لك المساعده …
والاصعب انك ماتقدرين تعبرين عن اللى بداخلك وتوصلين للشئ اللى تبغين تقولينة … :|
والاصعب ان وصلتني رسالتي على الايميل احصائية من احد البنات وكاتبة اسئلة وتبغاني اجاوب عليها [ جاوبة عليها مع بعض التحفظات ولا ادري لية ] ، اما الرسالة الثانية [ كانت ماهو موصفة شريك حياتك ،، اتمنى اكتب هذي المواصفات بس ماراح اكتبها ابدا راح احتفظ فيها للأبد ] والرسالة الاخير [ بعض الاسئلة للفتيات وتفكيرهم بالزواج والاشياء اللى يبغونها .. ]
وبالاخير :-
الاصعب
والاصعب
والاصعب
اني كاتبة هذا البوست مرتين وانصدمت ان عندي نسختين منه والاصعب اني شفرت الكثير والاصعب اني ماقدرت اوصل اللى ابغاه
Like
..
بصماتكـــم