مدونة اللتان

هذا الموضوع رقم 100

هل كان ما قبل المئه مفيد!!

او افاد من يزور هذه المدونه بشئ ..!!

او افرحت او احزنت او اسعدت او اثارت الفكر  ..!!

او انها مجرد كلمات مصفصفه لا تفيد القارئ بشيء .. !!!

..

اعذروني ايها المدونين والمدونات الكرام

ان خيبت ظنكم يوماً وزرتم مدونتي ولم تجدوا شيئاُ يفيدكم

وان شا الله المئه الثانيه ان عطانا ربي عمر تكون افضل من المئه الي راحت

سامحوني ..!!

اذرف دمعاً

أشيد املاً

ألملم حزناً

أرنم بذكرى

سأظل احبك

..

تجرفنا الايام

تبكينا ليالي الاحلام

تنسينا ملاهي الدنيا ندار كشريط افلام

تفرحنا تسعدنا

وتعود تذرف ادمعنا

ولكن

سأظل احبك

..

قلب مسكين

ومشاعر ترنم في أنين

تناشد أفراح السنين

تتمنى قربك ولو بعد حين

ولكن

سيظل يحبك

..

يسافر  بأحلامه

لم يفيق الى الان من نشيد اوهامه

فيا ليته يفيق ليعيش عالمه

واقعه

حقيقة قدره

حقيقة ايامه

..

ليته يستطيع نسياناً

ليته يستطيع هجراناً

ليته يرجع أركانه

..

ولكني أعرفه

سيكره ايامه

عندما يستطيع ان يخرج الحب من احشائه

عندما يسيل الدم ويفصل الحب من سيلانه

عندما ينزع روحه وينزع الحب ليرده مكانه

..

فهذا محال

وتمنى ومنال

لاني سأديم الوصال

داخل احشائي دمي روحي الى حين المآل

.

.

7:50 صباحا

20- 8 – 2008

حضرت محاضرة حقوق الانسان يوم الاثنين 18/8/2008 في برنامج الامير محمد بن فهد “بالدمام ” ..

وقدمت هذي المحاضرة الاستاذة : منى الشافعي ( مسؤولة قسم العلاقات العامه والاعلام في هيئة حقوق الانسان بالمنطقة الشرقية )…

تناولة الدورة مجموعة نقاط :-

- اهمية حقوق الانسان ..

- التطور التاريخي لمفهوم حقوق الانسان ..

- حقوق الانسان في الاسلام ..

- شرح دور هيئة حقوق الانسان ..

” بصراحة انا كنت رايحه على شان هدف معين واتمنى ان هذا الهدف احققة ، ثاني شئ انا العام بس دريت ان عندنا حقوق انسان بالسعودية وكنت منصدمة لما عرفت هالشئ وقريت كتاب حقوق الانسان ” الاهلي وليس الحكومي ” واكتشفت حاجات غريبة وصدع راسي بس كانت معلومات ذا اهمية بالنسبة لي  … ”

المحاضرة كانت من الساعه 6 لين 7 ونص ( مع العلم انها بدت المحاضرة الساعه 6 وثلث تقريبا) …

كانت اول محاضرة عن حقوق الانسان ، وقالت انها بتبحث عن اماكن تجمع النساء والفتيات وبتلقيها مرة ثانية في جميع مناطق المنطقة الشرقية ” تبي توسع مجال حقوق الانسان وتعرف ارائ الناس وتتكلم معاهم وتعلم الناس وش هي حقوق الانسان ”

* قالت ان اكثر القضاية اللى عندهم عن ( الطلاق ، المشاكل الاسرية ، الفقر ……الخ) لان بما انهم مكتب النساء اللى يجونهم كلهم حريم وهذي هي قضاياهم ..

لما تكون اللى تلقى المحاضرة طيبة ولطيفه وتحاول تسئل الموجودين تعطي الحضور اهتمام حتى لو كان على حساب ترتيبها للشئ اللى بتقولة فتأكدوا ان المحاضرة بتكون رائعه .. ( كان هناك اسئلة كثيرة ومداخلات ، وماتصدقون ان استفدت من الاسئلة اللى اطرحوا وجاوبت عليها اكثر من الكلام اللى رتبته للمحاضرة ) ..

# من بين الحضور كان في وحده جاية من البحرين ووصلت متأخر تقول زحمة الجسر وجات على شان المحاضرة واهي ( محامية واستاذه في حقوق الانسان وكانت من قبل طبيبة اسنان ) >> ذكروا الله يا جماعه .. كانت مداخلتها جدا رائعه والاسئلة اللى اسئلتها وتسترتسل بالشرح ” ماشاء الله تبارك الله ” ..

اسئلة عن الالية عند الشكوى وهل فقط للمراءة او للجميع ؟؟  وما هي الشكاوي ؟

-قالت لها  أ. منى : ( احنا هيئة حقوقية شاملة ، وبما اننا في السعودية عندنا مكتب خاص للنساء ومكتب خاص للرجال ، ونستقبل كل الحالات ,, الالية عندنا لما نستقبل الشكوى اول شئ التحقق من صحة الشكوى ، ثاني شئ مراجعه الشكوى )

قالت اللى جاية من البحرين : ماهي نوع الشكوى .؟؟

قالت لها أ. منى : ( بما اننا قسم نسائي القضاية طلاق ، النفقة ، حضانة الاولاد ، هجرة الزوج ) ناخذ ملف القضية وندرسها لما تكون من الاحوال الشخصية نعطية المشرفة الاجتماعية اللى عندنا وتتخذ الاجرائات ، اذا من اختصاص الهيئة نشتغل عليها ، احيانا خارج تخصص الهيئة نوجهة الى اتجاهات المتخصصة لها ، ولازم نتابع القضية ..احيانا قضية اقتصادية نحولة الى الجمعيات اللى تقدر تساعدهم ..

& اسئلة وحده من البنات عن الاخطاء الطبية اللى صايرة الان في السعودية وان بكل مكان الناس تتكلم عن الاخطاء الطبية هل حقوق الانسان توقف لجانبهم لو جاو يشتكون … قالت لها اي يوقفون ويجيبون لهم التقارير وزي كذا ،

قالت المحامية اللى جاية من مملكة البحرين : (( في القانون الدولي ، كوني محامية وحصل خطاء طبي لك

المفروض ترفعين قضية مع الادلة الثابته في المحكمة اولا ، مو على وزارة الصحة كاوزارة ، على الاطباء والاشخاص اللى قاموا بالاخطاء ، وزارة الصحة عندهم محامي ويقوم المحامي على الدكتور ، بعدين لو طلع ان الحكم ضدك ولا ترفقي ، طبعا في موضوعي بعدين استئناب بعدين التميز وهاكذا ، اذا لم توفقي في نهاية المطاف تتوجهين الى حقوق الانسان او نقاء الاطباء او المنظمة او نقائة الاطباء ( في عندكم جمعية الاطباء العمومين موجود عندكم )

جمعية اطباء العمومين موجود بالسعودية،، ترجعين الى حقوق الانسان او المنظمة او نقابة الاطباء ))

” خلاص بسكت لان السكوت من ذهب ” :52:

في مواضيع ونقاشات كثيرة بس ما اقدر اتذكر لكم كل شئ بالضبط ، مع العلم اني كاتبه كل شئ عندي  ومسجلة المحاضرة صوتياً بس راح اطول البوست عليكم وادخل في بحر ولا اقدر اطلع منه …

* كانت محاضرة رائعه جداً ..

———–

* اسماء مراجع ذكرتها في نهاية العرض :

- ديموقراطية وحقوق الانسان د. محمد عابد الجابري

- موقع ثروبيديا

-حقوق الانسان للمحامي هيثم المالح ..

- المدخل لدراسة حقوق الانسان الدكتور مازن ليو راضي . استاذ القانون العام المشارك بالاكاديمية العربية المفتوحة بالدنمارك . الدكتور حيدر أدهم عبدالهادي استاذ قانون المساعد ..

———

* العنوان لجمعية حقوق الانسان بالشرقية:

الدمام – حي الشاطئ

ت/ 8330363

ف/ 8331121

البريد الالكتروني :ensanrights@yahoo.com

~{ اعتذر مرة ثانية ان البوست نزل وانا لم اكمل الكتابة …

بس بما انكم رديتوا على اغير شوية بالموضوع اللى كنت ناوية اكتبه …

::

امس لما رحت مجمع الراشد على اساس ابدا ادور لي بدلة حق العيد وعندي كم مناسبة فالواحد ياخذ احتياطة ويدور لة بدلة ( بدل مو بدلة ) ..

طبعا خواتي قايلين لي من قبل ان السوق فاشل وخصوصا ان في تنزيلات اعرف ان السوق مايسوى راس بصلة >> مع احترامي للبصل .. :40:

اولا شئ المجمعات اللى الواحد يروح يشتري منها مافي الا ( الراشد والظهران ) اهم اللى فيهم محلات الماركات والله اكبر ومحلات الماركات اللى عندنا تقطع بعضها … >> مو فاقع كبدي الا اهل البحرين والرياض وش يسوين جاين عندنا ناقصين زحمة احنا ولا من زين مجمعاتنا ولا محلاتنا الفلة  … :@:

- امس الراشد درته كله مرتين ما ادري ثلاث مرات اكذب عليكم لو اقولكم ان فية بلوزة وحده حلوة ، او تنورة او فستان اي شئ اي شئ بس شئ ينلبس بالعيد >> مسكينه راضية باي شئ ..( جاتني الصيحة امس على عمري )

بالعادة لما ندخل السوق نمسك قطعه وانادي خواتي وش رايكم ( ونتشاور عليها ) ، والله العظيم مافي شئ مسكناه وجلسنا نتشاور عليه من كثر ماهو السوق سيئ سيئ ، او في محل قلنا نرجع له مرة ثانية جايب بضاعه حلوة ..

* قلت حق اختي ام عبدالرحمن شوفي الحريم اللى يمشون وش الاكياس اللى بيدهم وخلينا نروح المحلات (( الحريم مافي اكياس بيدهم كلهم يمشون يد ورى ويد قدام ))  ..

# ابشركم تراني حصلت لي قطعه وحده حق العيد طبعا تحتاج لتكملة مع ان البدلة عادية بعض الشئ ، بس قلت دام بكرة في ترجيع بروح اكمل الرحلة في مجمع الظهران اذا حصلت شئ احلى منه اخذته ..

& النتيجة : (( طلعنا من مجمع الراشد ( انا اشتريت لي قطعه )  وام عبدالرحمن اشترت حق اعيالها حلويات ، وضايعه اشترت لها عشاء من برجر كنج )) >> الحمدلله ماطلعنا يد ورى ويد قدام …

::

اليوم الخميس وتبدا الرحلة في مجمع الظهران .. :seco:

درنا المحلات كلها محل محل ندور قطعه وحده وانا اعيد واكرر موافقة اشتري اي شئ بس ما ابي اروح السوق برمضان ( مع العلم ان بعض المحلات بادين ينزلون بضاعة حق الشتاء ) …

بالاخير قلت يابنت الحلال امسكي القطعه اللى اشتريتيها من زين السوق زي ما انتي شايفة مافي شئ يسوى ابدا ، واشتريت بلوزة ومتردده فيها في امل انها ترجع بكرة للمحل لووووول وتجلس مع اخواتها القطع خخخخخخ ..

يعني يمكن مجمع الظهران شوية ارحم من الراشد بس نفس الشئ …

المشكلة ان تشوف شئ عاجبك بس مافي مقاسات او القماش لما تمسكة تحس انه نوعية رديئة جدا جدا ، مو معقولة بتحط مبلغ غالي على قطعه من ماركة معروفة والشكل عادي جدا ولا بعد القماش لما تمسكة شوية رديئ …

وفي مشكلة ثانية ان لما تيجين تشترين القطعه تحسين ان عندك زيها بالبيت مو شئ جديد ابدااااا ..

- محد يحس بمعاناتنا مع المجمعات ابدا :44: ..

::

طبعا بالدمام من زين مجمعاتنا مافي الا ( الشاطئ ، مارينا مول ، ابن خلدون ) >> في مجمعات ثانية بس تلعود الكبد ومحد يروح لها ..

الشاطئ : عدد المحلات الموجودة معدوده جدا جدا جدا تروحين له من اذان المغرب لين اذان العشاء تكونين خلصتي المجمع كلة ، واذا اشتريتي شئ بيكون عادي تي شيرت او اي قطعه اقل من العادية تلبسينها للبيت ..

مارينا مول : استغفر الله العظيم تخيلو هالمجمع نفسة بالضبط بالخبر اسمة ( فينيسيا ) كل المجمع اقمشة ومحلات بزران وجزم الله يكرمكم ويجيب الهم >> اجلسي في بيتكم احسن لك ..

ابن خلدون : دور واحد والمحلات الحلوة تسكرت وباقي يمكن 9 محلات الزينة وموجودة هالمحلات بالمجمعات الراشد والظهران ..

::

لهذا السبب لاتتعب نفسك وتروح تدور بالمجمعات خلك على الراشد والظهران ، واذا ماحصلت شئ لا تعيدون اجلس في بيتكم ..

>> ترا كثار صديقاتي يروحون الكويت البحرين قطر يشترون حق العيد يقولون ماعندنا مجمعات …

ترا والله صحيح ماعندنا مجمعااااااااااات ابداااااااااااااا

واذا افتحوا لنا مجمع تحصل يفتحون نفس المحلات > وش الفايده نفس المحلات تنفتح مليون مرة نبي محلات جديده

:

مو فاقع كبدي الا نفس الشركة تفتح محلين بس كل واحد اسم غير ونفس البضاعه >> شدعوة قايلن لهم عميان مانشوف …

:50:

اللى يقهر ان يقولون لك كل يوم تروح السوق ولا اشتريت شئ >> وش نشتري ؟؟؟

لي ثلاث اسابيع اعاني من صداع شديد في راسي ولا اعرف وش السبب هذا الصداع ، وخفت اقول حق امي ان فيني صداع وتقولي ( من هالنت كل قاعده قدامة ) وتوقعت ان سبب الصداع هو سبب الم في اذني له فترة بس مارحت المستشفى والسبب انى اعرف كل الدكاتره حق الاذن وكلهم ماعندهم ماعند جدتي ..

وانا المشكلة هذي الايام الاخيرة كنت اتوقع ان الصداع من كثر ما اصيح لاني احس اني جالسة على قدر يطبخ على نار هادية ولا اقدر اتكلم وساكته اخفف الالم اللى فيني بالصياح :50:  بس كنت انام واصحى يروح الصداع ،،

امس من كثر الصداع قلت حق امي ان الصداع زاد ، بس اللى صار امس ان الصداع وصل لمرحلة الله لا يبلي احد قول امين ..

والله العظيم توقعت ان راسي راح ينفجر ، ما اقدر احط يدي على راسي من كثر الالم وحسيت ان قلبي في وسط راسي وينبض ..

ولما احط راسي على المخده احس طابوقة فوق راسي …

ما اقدر اوصف لكم درجة الالم اللى وصلت لها ليلة امس ، واقترحت امي ومضيع انهم يودوني المستشفى بس انا عارفة لو رحت بيعطوني ابرة ( وبعدها حالة اغماء ) قلت اتحمل الالم ولا حالة الاغماء وبعدها يبغالي ربع ساعه على شان اقدر امشي ماتسوى على قسم بايات الله …

بالاخير اكلت ملعقة عسل امي قالت يمكن ضغط ،، مضيع قال لا لو ضغط يصير معاك رجفة >> كل واحد وعلى كيفة يفسر..

بالاخير رفعت رجلي قلت يمكن مافي دم براسي >> لاتلوموني تأثير الصداع ما ادري وش اسوي بعمري :seco: ..

اكلت حبت بندول >> اكره البندول احس انه مايسوي شئ بس مالنا الا هو وامرنا لله

تذكرت ابوي الله يرده بالسلامة يارب ويفك اسرة ، قال لما يجيك صداع بالراس او زكام حاول دائما تطلع برا البيت وتتنفس هواء طبيعي لانه يجدد الهواء داخل الجسم ويطرد الجراثيم …

>> راحت الاخت مضيعه وافتحت الشباك الا جاتني ذيك الرطوبة الله لا يرويكم :7r:

وسكرت الشباك قلت لا يزيد الصداع بس ..

الى الان الصداع لم يذهب …!!

ولكن ارحم من امس بكثير على الاقل اقدر اوقف وامشي واتكلم >> اهم شئ اتكلم :00:

* من جد الصحة لا تقدر بثمن …!!

على كثر المجمعات اللى تفتح الا انها فااااااااشله

مافي مجمع تقول انه ممتاز وتروح تتسوق منه ،، الان العيد جاي ( ادري ان بدري على العيد ) بس لازم تشوف لك لان السوق راح ينزل بضاعة شتوية زي كل السنة وتتوهق

ورمضان عباده وبيصير زحمة السوق فرصة الان تروح والناس مسافرة …

اللى صار انى درت المجمع الراشد كله بكبرة محل محل الله وكلهم مافي بلوزة وحده تقول الله حلوة ، او على الاقل تقول بفكر وبرجع لها

————-

تحديث :

سوري ياجماعه انا دخلت اليوم على شان بكمل البوست وبنزلة

انصدمت ان البوست نزل ( هذا 3 خطا اسوية خلال ليلة امس ) :seco:

اتوقع اني كنت تعبانه من جد .. والتعب واضح من الاخطاء اللى ارتكبتها واليوم اشوف النتيجة قدام عيني =(

انا ماكملت كتابة البوست بس دامكم رديتوا ولا تزعلون بخلية لعيونكم ..

في بيتنا ضيوف ( ضيوف مو مقيمين ) وراح يرحلون بعد كم يوم “ان شاء الله ” …

الضيوف هم :-

3 سلاحف ..

نعم …سلحفاء

بعد ما انتهيت من الغداء  :69: انا وضايعه ومضيع ، قلت لهم انى ابي اصور السلاحف قبل لا يروحون ..

وبدات المعركة دورت قفاز وماحصلت بصراحة  ،، ولا تتعطلون ابدا اذا ماحصلتوا قفاز البس كيس بيدك وجلست معركة احاول اصيده وحده والحمدلله واخذت وحده بنجاح ..

اتركم مع ماي تصوير ..

( اضغط على الصور على شان تشوفهم بحجم أكبر )

نظرة تأمـــــــــــــــل  :41:

ولما جيت باخذ صورة ثانية قلت خلاص يا بنت الناس استحي على وجهك وبطلي تصوير ..!!

حسيت انى اهنت السلحفاء كثير ،، سوري سلحوفة حقج على

::

اشكر السلحفاء على وقفتها الرائعه امام الكاميرا وموافقتها على التصوير دون مقابل ..

والشكر موصول للمضيع لستضافتنا في غرفته..

الشكر موصول ايضا لضايعه لحماية السلحفاء من السقوط ..

كانت معكم :

مضيعه بيتهم .. :40:

في كثير من المضيعين والمضيعات مختفين عن التدوين …

البعض ترك رسالة في المدونة و رحل عن عالم التدوين

ولكن هناك اخرين لانعلم اخبارهم ..؟؟

أين اختفى سلطان يستطيع ” بإذن الله ” ان يتغلب على السرطان ..؟؟؟

افتتح مدونته في يوم 6 أغسطس, 2007م

اكمل عام على افتتاح لمدونته ( كل عام وانت بخير يا سلطان ) ..

ولكن اختفى ..؟؟؟

- كان هدفة من المدونة ان يزرع الامل في قلوب الناس ..

ونعم …..!!

استطاع سلطان ان يزرع الامل في قلوب الجميع

هناك الكثير من المدونين عندما تم تمرير واجب لهم كتبوا ( ان سلطان زرع الامل في قلوبنا )

- نشر في مدونته مواقع للجمعيات السعودية لمكافحة للسرطان

الكثير وضع بنرات في مدونته لنشر الجمعيات لعلاج السرطان والتوعيات ..

تركي الدخيل خط بقلمة عن سلطان

سلطان… يستطيع أن يتغلب على السرطان!

تركي الدخيل ثانية : في مواجهة المرض

*مدونة سلطان في صحيفة الرياض : )

لا اعلم اين سلطان ؟؟

اتمنى ان تتحقق امنيتك هذي السنة في رمضان يا سلطان ( رمضان .. أهلاً)

رغم الحروف البسيطة في مدونته الا انها كانت تنقل الفائده العظيم ..

لندعوا له بظهر الغيب ان يشافية الرحمان ويرفع عنه ..

:

{ اللهم انت الشافي انت المعافي شافي سلطان وجميع مرضى المسلمين وعافيهم …

لندعم مرضى السرطان . ( مدونة ياسر الغسلان )

هناك موضوع كان يستلهمني  من فتره كل مره افتح مدونتي

من اجل ان اكتب هذا الموضوع وتوصيل فكرتي

ولكنني اتردد ليس من عادتي التردد ولكن اخشى ان افهم غلط او اكون جريئه في طرحي

اليوم وانا ازور مدونة هذووو رأيت في مدونتها في موضوع كتبت في عنوانه تساؤلات

فتحت الموضوع وبعدها علقت  على موضوعها ولكن

اثارت افكاري وهيجتها من جديد ولم ارى نفسي الا وانا لاجئه لمدونتي لتنزيل فكرتي فقد حان وقت تفجيرها

..

قد وضعنا حواااجز و حيطان بين الجنسين الناعم والخشن

لدرجة لم يعد هناك تواصل بين الجنسين

لا تعرف الواحده ولم تتفوه ولم تحادث سوا اخيها ابيها عمها او جدها او خالها

وهناك العديد من البنات لا يتكلمون معهم بتاتاً

لماذا هذه الحوااجز!!!

هل تعلمون ان هناك بنات يتغطون عن اخوانهم وتخجل منه لدرجه انها لا تستطيع ان تحادثه !!!!

نعم هناك حياء وخجل و خوف اتجاه الجنس الاخر وهذه من فطرة البنت ..

ولكن ليس لهذه الدرجه ..!!

ما الذي يمنع ان اتواصل مع رجل قد احتاج منه حاجه

مثلا

عندما اكون في اي مكان عام واريد ان اتحدث مع رجل كا بائع او اي رجل اريد منه ان يدلني على مكان او اي حاجه قد احتاجها في مكان عام

سا اطلب ..

أليس عندي لسان لكي اتحدث واطلب واستجيب ..!!

انا لست ضد خدمة الرجل للمراه او في هذا تقليل من كرامتها

ولكن عندما تحتاج ان تذهب لمكان عام مثل المستشفى او السوق …. لا تتحدث ابداً ..!!!!!

وتذهب لتلجأ لاي رجل قريب ابها اخيها او  اي رجل

اعطيكم مثال..

عندما اكون في محل وأجد بلوزه مقاس كبير واريد اصغر ..

في وقتها سا اطلب من البائع لو سمحت اريد مقاس اصغر

ايش الي يمنع!

كذا خدشت حيائي او انه عيب  او حرام..!!

الكثير من البنات وكأنها راح ترتكب جريمه عندما تحادثه.. او اخيها سيقوم بأنقلاب

تلجأ لاخيها خارج المحل وتناديه او انها تبحث عن مقاس الاخر بنفسها ولا تحادث الرجل

قد يكون حياء خجل نعم لم نختلف .. ولكن ليس بالدرجه هذه

واخيها او زوجها او اي رجل قريب لها  سيقوم بأنقلاب لمااااذاااا تكلميين رجل …!!!!!!

لم نختلف هذا شي من الغيره ولكن ماالذي يمنع ان تلبي حاجتها وتنادي بنفسها وتطلب الحاجه ..!!!!!!

انا اكره ان اتعامل بطريقة نحن راح نتدبر امرك انتي ايش فهمك  !!!!!

اكره تعامل الرجل للمرأه بطريقه انتي ما تفهمين وانا راح ادبر امورك ..!!

انا عندما استطيع ان ادبر اموري سا اقوم بتدبيرها بنفسي ولن الجأ الى احد ..

ولكن في بعض الاحيان لا استطيع مثلاً اكون محتاجه امر والمكان يعج بالرجال

ولا استطيع الدخول ابداً هنا الجأ لشخص ذكورري يساعدني في الامر

هناك امور لا يصلح ان يلبيها الا الرجال فقط  ..

ولكن ذهابي للمستشفى لموعد ما (( لا يجب ))علي ان اخذ اخي الكبير او ابي

واقول له احجز لي موعد او صلح اوراقي لي ارجووك

الفكره الثانيه

ان لم نتعود الى الان او نؤمن في حاجه ان هناك صداقه بين رجل ومرأه

تحادث المرأه يعني انت تحبها يعني انت تريد ان تتزوجها

او غير ذلك حررراااام

ولم نسمع منذ ما كنا صغار اخشوا الذئاااب البشريه انهم ذئاب ……

ما الذي يمنع اذا كان هناك تواصل بين افكار الجنسين بطريقه محترمه وكان الاحترام متبادل بين الجنسين

مثل تواصل المدونين والمدونااات في عالم التدوين تواصل نظيف طاهر لم يخدش الحياء ابداً

عندما يزور  المدونين والمدونات تدوينة بعض وكل واحد منهم يسدي رايه وفكرته ويطرح مروره في كل احترام

هنا يكون التواصل محمود

نعم للتواصل …  اذا كان الاحترام موجود

انا اكره التواصل بين الجنسين وتعلق بعضهما في الاخر ما دام لا يجمع بينهما شي

اكره  تواصل الجنسين الغير محمود  مثل الخروج مع بعض  او او او …

هذا في نظري انا  .. (((عيييب)))

ولكن اذا في تواصل للحااجه مثل ما اسردت في امثلتي ما المانع ؟؟!!

..

اكره البنت او مستحيل اتواصل معاها عندما الاحظها انها تصادق مليون رجل وكلهم تحبهم  و تخرج معهم.. او او او ……..

هناك من يراني متخلفه عندما اقول انا ما عندي (( بوي فريند ))

انا في قمة التخلف في نظرهم او غير طبيعيه ..

في نظر العديد تواصل رجل والمرأه حب ولا يوجد غيره …!!!!!

انا أأيد التواصل ولكن لا تصل الى حد الجرأه

مثلاً تدخل البنت الى المحل لتتحادث مع البائع وليست عندها رغبه في الشراء اساساً

وهو (( يتميلح وجهه )) ويجلس يضحك و يمزح

ايش هي اختك او ماذا …!!!!

انا مع تواصل الجنسين بكل احترام مثل تواصل افكار اقتراحات او اللجوء للحاجه

اما غير ذلك  .. احترامي للجميع اقووول ((( قلللللللة ادب )))