مدونة اللتان

اثناء رحلتنا لمكة ،، مالقينا حجز على الخطوط السعودية ابدااااااااااااا

 

لا روحة ولا رجعه ودورنا بسما وبالمووت لقينا كل الرحلات ممتلئ خلاص ..!!

 

وحتى الوقت الرحلة ماكان مناسب ابدا ,,

 

كان المفروض تطير الطيارة الساعه 7 مســآء حسب التوقيت المحلي ولاكن الصدمه في تمام الساعه (7) اعلان ان الطائرة راح تتأخر الى الساعه (8ونص ) واحنا بالمطار من قبل اذن المغرب احس شياطيني اطلعت بس قلنا معلية ” كل تأخيرة وفيها خيره “

 

طارة الطيارة الساعه 9 مسآء بعد ماركبنا وجلسوا يرتبون الوضع ..

 

الطيارة مررررررررررررهـ ضيقة وتجيب الهم بس مو مشكلة ..

 

وأهم شئ وصلنا مطار جدة سالمين الحمدلله ..

 

في العوده ..!!

 

الطيارة كانت راح تقلع الساعه (12,15 ) منتصف الليل ،، واحنا مستعدين وخلاص نبي نركب الطيارة ميتين من التعب بعد العمرة والطريق مكة لين جدة ..!!

 

الا ويعلنون ان الطيارة راح تطير الساعه ( 4 الفجر ) ونعتذر منكم اعزائي الركاب

 

أنا مو بس تعبانة الا بتقطع من التعب وفيني نووووووووووووووووووووووووم وخلاص ابي ارجع بيتنا

 

وش نسوي ولا بعد الساعه 4 بتطير واحنا ميتين جوع فوق هذا وورانا بكرة صيام يعني كلها على بعض احس انى راح انفجر طبعا ماباليد حيلة جلسنا بمطار الملك عبدالعزيز وانا احس ان الشياطين اطلعت وودي اصارخ

 

ولما صارت الساعه (1 بالليل ) والحمدلله ماتحركنا من المطار واننا سمعنا ،، الا يعلنون ان الطيارة راح تقلع الان ..!

 

((فــــــــــــــــــــــــــــــوضه على كيف كيفكم ))

 

ركبنا الطيارهـ والناس تركب ومعصــــــــــــــــــــــبه وكل واحد وخر عنه لا يغلط عليك من كثر مانفسية زيرووووووو ( والاخلاق صايرة تجارية )

 

جلس واحد بالمقعد الامامي رقم 15 ،، على كيفة محد قاله وجاء واحد ثاني لان هذا المكان لة ولقى احد جالس عصب من الفوضة اللى صايرة

 

المهم ترتبوا وانثبروا كل واحد في مكانه >>> اخلاق مضيعه ترى خلاق اهبطة الطيارة

 

احم احم ..

 

المهم ماعلينا ..

 

الا اقلعت الطيارة انقلع روح العدو ان شاء الله ..!!

 

كان في مطبات هوائية صار شئ خطير بالطيارة حسيت ان الطيارة راح تتفكك اجزائها وخصوصا انها صغيرة تضيق الصدر

 

انا قلت خلاااااااااااااااص هذي نهايتنا الله يستر وجلست اقراءة قران مابي احس بالطيارة ..

 

” تخيلوا ماتكرم الفاضل الطيار يتكلم ويقول عن الجو وان مطبات هوائية ولا شئ مخلي الركاب في رعب حسبي الله ونعم الوكيل “

 

صارت الساعه 3 ونص وماوصلنا ،، واحنا ميتين جوووووووع ،،

 

سئلنا وش فية أكل نبي ناكل باقي نص ساعه وراح نمسك للصيام ، الا يقوم المضيف ( والله لو في أكل بالطيارة كان عرضنا عليكم مأكولتنا ,, بس مافي ولا شئ بالطيارة )

 

حتى ماي ياجماعه مافي انتم متخيلين …؟؟

 

سكتنا وامرنا لله ننتظر لين ماتهبط الطيارة >>> الاخت كانت ميته جوع

 

شوي الا نحس ان الطيارة تهبط ولا قالوا ياجماعه اربطوا الاحزمة ولا قالوا استعدوا للهبوط عودوا الى مقاعدكم ولااااااااا شئ ..!!

 

الا اخوي يلف علينا وفية الضحكة يقول : ( اربطوا الحزام ترى محد مفتكر فيكم )

 

ولما الناس حسوا ان الطيارة بتهبط اربطوا الحزام ومافي احد تكلم ولا حتى الضوء تبع الحزام مانور ولا شئ من الفوضة والاهمال الزايد

 

ولما قربنا نوصل للأرض تكرموا وقالوا : ( اعزائنا الركاب يوجد خلل في الضوء علامة ربط الحزام ،، والطيارة سوف تهبط نرجوا وضع حزام الامان ) >> مالت ع البمبر
ولما اهبطة الطيارة الحمدلله بخير وسالمين ،،

 

كنت طول الوقت ارسل اوراق حق اخوي جالس بالصف اللى جمبي اكتبلة (( انتم متأكدين هذي طيارة او يمكن بـــاص بس يطير )) ههههههههههههههههه

 

وهو يقولي اي باص هذي مو طيارة ماتدرين خخخخخخخخخخخخخخخخخخخخخخ

في مطار الملك عبدالعزيز جلسة امراءة كبيرة بالعمــر ،،

تقول حق اختي : ( المفروض تطير الطيارة الساعه 10 متوجهة الى الرياض ،، والان يابنتي الساعه 12 والى الان الطيارة ماطارة ولاندري متى بتطير وهذانا جالسين بالمطار تكسرة ظهورنا )

قالت لها اختي على اي طيارة بتروحون ..؟؟

قالت الحرمه : ( سمـــا جعلهم العمــا )

***

وصلني مسج من أحد صديقاتي بعد وصولنا بــ 3 ايام ..

تقول : ” وصلنا بالسلامة الحمدللله المرة الجاية بروح مشي ولا اركب بطيارة سما “

26-سبتمبر -2007 مــ

ها أنا من بينكم أكمل سنتي الاوله في عالم التدوين ..!!

ولا أزال معكم على تواصـــل ،، بعد تعلقي بكم ,, ومشاركتكم لأفراحي واحزاني ,, لم استطع أن اودعكم ابداً ,,

يصعب على جدا جدا ان اصف لكم فرحتي وأنا اكمل ســــــــــــــــــنــــــــــــــة في عالم التدوين ..

هل تعلمون ماذا تعني السنة؟؟

صحيح ان السنة 12 شهــر وكل شهر يحمل 4 أسابيع وكل اسبوع يحمل 7 أيام

وكل يوم كان يحمل 24 ساعه وكل ساعه كانت تحمل 60دقيقة وكل دقيقة تحمل 120 ثانيه ..

ولكن ،،السنــة كانت تحمل لي أخوات رائعات واخوان مبدعون ,, شاركوني بقلمي ،، لم يغيبون عن بالي ,, ولم يتخلوا عني ابدا ..اصبحت اشعر اننى من بينهم

اعترف اننا تعلمت الكثير الكثير منهم ,, ولكن لن اشكركم .. لاننى بحثة لكم عن كلمات شكر تستحقونها ولم اجد ,, الكلمات تخجل ان تكون جملة امام اقلامكم وكلامتكم التي تبعث لي السرور ..

أدعوا من الله ان لا يحرمنى من صحبتكم يوم القيامة في جنات الفردوس الاعلى ,,

** بدايتي في عالم التدوين ..

بصراحة بدايتي في عالم التدوين واااااااااااااااااو كنت من جد مضيعه بيتهم ،، فتحت أول مدونة وبالاخير ضيعت الباسورد

وانتقلت الى المدونة الجديدة في البلوق والحمدلله كانت تمام ،، وشكرا لكل من نصحني انقل الى الورد برس حي الرخاء والراحه ..

**بهذهـ المناسبة سوف اعيد بعض ذكرياتي ..

كـــل الشكر والعرفان الى من نصحني بالدخول في عالم التدوين ،، لا اعرف كيف اشكرهـ ، جزاه الله كــل خيـــــــــــــــــــــــر …

قبل أن اعيد ذكرياتي..

اشكر كل شخص كان يعلق بمدونتي ،، اما من المضيعات الى انا سعيده جدا جدا بتعرفي عليهم ، اما بواسطة اتصال الجوال او عبر الماسنجر واما الرسايل الخاصه ..

واشكر كل مضيع يرد بمدونتي ولو بالقليل اشكركم كل الشكر ,,

** اخوات رائعات تعرفة عليهم من عالم التدوين:-

لا استطيع ان انسى.. إيمان اسلام ,, التي احببتها في الله ,, كانت اخت رائعه واجدها بكل وقت (ادعوا لها بظهر الغيب بالتوفيق اينما كانت )

تالا ,, الفتاة المرحة التى يسعدني وجودها عبر الماسنجر ..

مي الاحمد ,, رغم المدة القصيرة التي تعرفة عليها ولاكن اكتشفة طيبتها

أروى ,, عندما تعرفة عليها ادركة مدى طيبة قلبها وخفة دمها ,,

ميامي ,, التي لا اعلم ماهي اخبارها وافتقدناها كثير “اتمنى ان تكون بخير ”

تاكسي أصفر ,, اعز انسانه الى قلبي ،، اليوم الى لا اسمع فيه اخبارها افتقدها كثيرا , ” لو اشوف بس اسمها اون لاين على الماسنجر يكفيني ”

لارا لونا ,, صديقة رائعه احببتها اكثر عندما التقية بها ..!!

تفاحة خضراء ,, كانت مدونتها السبب الرئيسي لجذبي لعالم التدوين, سعيده بعودتها للتدوين جدا

باقي المضيعات مايهونون والله ولاكن اعجز ان اكتب عنكم ..!!

**هديــه متواضعه :-

وبهذا المناسبة سوف أشكر المضيع : محمد الملياني ..

لاني وعدته راح اعطية هديه ( المضيعين ) ،، لانه دائما يرد أول واحد بالبوست ..

وانا قتله راح اعطيك هدية المضيعين ..!!

وهي عبارة عن حقيبة ..

** موضوع كل ماتذكرة يذبحني ضحك ..

في المدونة تكلمة عن مدارس البيان في جدة اللى كان مسبب لى صدمه >> بس الحين راحت الصدمة وصار ايزي .

انا لما نزلة البوست وانا ماكنت مصدقة الخبر وكنت محتاجة ان اهل جدة يأكدولي الخبر ابي اعرف هل صحيح وصلنا للقمر ،، اللى كان مضحك بالموضوع البنت اللى قالتلي الخبر عصبت من تعليقاتكم وقالت قوليلهم انتم بدو .. انا وصلت الامانه وابي اشوف وش بيصير >> شريرة خخخخ

جاء سامي منصور وحط مقطع شعر (قالت بدو ) صرت اكرر بالشعر “حفظتة من كثر ما أسمعه ” واضحك زي المجنونة وقلت لكل الناس القصه

ومن خلال هذا البوست زاروني كثير طالبات من مدارس البيان سعيده بزيارتهم لمدونتي ..!

التفاصيل أضغط هنــا

** موضوع سبب لى صدمه ..

سالفة المخازن الكبرى والموظفين الى طاحوا على مدونتي هههههههههههههههههههه

البوست الاول ( اضغط هنــا)

البوست الثاني ( اضغط هــنا)قدمة الشكر لموظفين المخازن لزيارتهم لمدونتي ،،بس مادري لية ماعجبهم الشكر ..!!

ومن بعد زيارتهم تأكدة ان للتدوين فائدهـ كبيـــــــــــــــــــــــــــــــــــــــــــــرهـ ,,

مواقف عديدهـ وجميله ،،احببة هذا المكــان لانهـ يحمـــل لى الكثــــــــــــــــير الكثــــــــــــــــير من الذكريات ،، اما المحزنة او السعيدهـ .. ( كان يكفينى مشاركتكم معاي في كل الاوقات )

ادعوا من الله ان يوفقكم لعمل الخير دائما ويسعدكم ،، كما اسعدتموني ..!!

**احصائية مدونـــــــتي

عدد البوستات : 188

التعليقات:2,324

البوستات تم حذفهم من قريب: 5

يللة هذا البوست سولفوا وقولوا اللى بخاطركـم … المجال مفتوح اليوم وكل يوم

والى الابد باذن الله ..

” وسامحوني اذا بدر منى اي تقصير بحق اي احد “

* شكراً لرب العالمين ثم الشكر لكم جميـــــــــــــــــــعاً

،، وشكرا لمن زار مدونتي ورفع من معنوياتي ولو بالقليل

واشكر كل من زار مدونتي ولم يعلق “لان مايتوفر لديه كيبورد “

اختكم في الله :-

مضيعه بيتهم

قام المضيع سلطان بتمرير الواجب على وان شاء الله اقدر احل الواجب واخذ العلامة الكاملة

 

لان المضيع سلطان عفوا اقصد المدرس سلطان أول مرة يمرر واجب وماعرف طريقة بتصحيح الواجب يراعينى بالحل او لا .؟؟

 

ـ متى تشتري ثياب العيد غالباً ؟

 

بصراحة دائما اشتري ملابس العيد ،، بعشر الاواخر من رمضان على شان اعرف ايش افضل شئ ويمكن اتوهق مافي شئ اطر اشتري وامري لله

 

بس الحمدلله كل مرة ماتوهق ،، والقى ملابس بعد تعب وطلعت روح ومعركة بالمجمعات ..

 

ـ ما نوع الماركات المحببة لديك؟

 

بصراحة كل الماركات احبها ،، يعني ماقدر احدد شئ معين لان كل ماركة لها موسم تنزل بضاعه حلوة ،، مثلا في ماركة كنت اشتري منها كل عيد احصل لازم من هالمحل شئ ،، الاعياد اللى فاتت مالقيت ولا شئ عندها يعني مو على كيفي ..!!

 

ـ هل لديك طقوس معينة في شراء مثل هذه الملابس .. مثل؟

 

طقوس ..؟ لا ماعندي ..!!

 

ـ ما معيارك في شراء الملابس .. هل هو الغلاء أم الشكل المميز ؟

 

لا الشكــل المميز اهم شئ ،، ودائما احب يكون على الموضة واخر شئ نازل بالسوق ،، وماحب يكون على الموضة بس مو حلو ،، لا لا لازم يكون على الموضة وحلو ويناسب سني ومزاجي واحسة يعكس شخصيتي ولازم تكون الوانه حلوة ومرحه .. وماحب اتقيد بالوان معينة احب البس كل الالوان على شان احس بتغير ووناسة

 

ـ ما رأيك بموضة تطريز الثياب المنتشرة أخيراً ؟!

 

اثوبة الاولاد ،، بصراحة على الكبار سخاافة من جد حلاة الثوب شكله العادي مايتغير ,, بس حلوة التطريز للاولاد اللى فترة مراهقة او الاصغار يعطي شكل حلو لهم ..

 

الحمدلله تم حل الواجب ..!!

 

وراح امرر الواجب على كل المضيعين والمضيعات >> الحين يدكم على قلبكم ماتبغون تحلون الواجب

 

نبدا بالمضيعات :-

 

 

تــاكسي اصفر\تـــالا

 

مي الاحمد >> تحب الواجبات ماشاء الله عليها\ ايمان اسلام

 

 

خولة\ليال

 

 

ايرور\انتروبي

 

بنت الروح\ لارالونا \فتاة الحزن

أروى\ التفاحه الخضراء

 

( وكل البنات الموجودين بالقائمة )

 

المضيعين بيتهم :-

 

 

الاستاذ محمد الملياني\وتـــر

 

 

سامي منصور\ىوسف منصور \ محمد منصور

فواز\خاطرة بيضــاء\ياسر

 

(( وكل من يحب يحل الواجب مافي اي مشكلة يحل الواجب ))

 

 

ماتتخيلون قد ايش اكسروا خاطري الطالبات في مكه ..!!

بالفندق اللى نمنا فيه بشارع (ابراهيم الخليل ) كان يطل على مدرسة صغيرة جدا جدا للبنات

والمدرسة فيها منور نشوف البنات دخل المدرسة والمدرسات ..؟؟

(( الفتحة اللى فوق بالصورة ))

ولما طلعوا البنات من المدرسة ،، مافي باصات توصل الطالبات كان في سيارة وانيت بنتظارهم وتحمل البنات بالحوض الخلفي من الوانيت وتبدا بنقل البنات ..

احزني هذا المنظر انه موجود بالسعودية ،، واحنا دولة ولله الحمد تقدر توفر بدل الباص مليون باص،،

بس احنا زي عين عذاري ( نسقي البعيد ونخلي القريب ) والمشكلة البنات بالابتدائي والمتوسط يعني صغار ..!!

لية مافي احد يتبرع لهم بباص حتى لو يكون صغير ابيض ينقلهم ,,, والله تقطع قلبي عليهم من جد ..!!

يعني مو اولاد المشكلة بنـــــــــــــات وواقفين .. انتم ماتتخيلون كيف المنظر واهم يركبون وهالوانيت يحمل فيهم

وياليت لو الوانيت في حواجز لا كان وانيت عادي يمكن يطيحون باي وقت وكلهم واقفين على شان يكفيهم ..!! لان مافي مجال يجلسون ..!!

واذا طاحت اي بنت (بسم لله عليهم الله يحفظهم ) الدولة مو مسؤولة عن هذا الشئ ،، للاسف الشديد .. والوانيت يمشي بسرعه على شان يمدية يرجع ويحمل الدفع الثانية

منظر محزن اننا نشوفة بالسعودية .!!

صــبآح الخيــر ،، ومســآء الخيــر ..

 

أول زيارة لي (لمكة ) واول عمرهـ اخذها بحياتي .. يعني مادري من وين راح ابدا ..

 

اكيد كلكم بتصدقون انى اول مرة اخذ عمرهـ >> عفواً

 

قصدي مآرآح تصدقون انى اول مرة اعتمر ..

 

بنت البلد واول مرة تروح مكة والناس يجون من اخر الدنيا حق مكة بس وش اسوي ماعندي تعليق ..!!

 

بصرآحه عندي سوآليف كثيرهـ ،، وهذا البوست اعتبرة الجزء الاول باقي (2 ) ترقبوهم ..!!

مادري شلون اوصف لكم شعوري

بس بصراحة كان رحلة للعمرهـ رائعه جدا جدا ..

خصوصا وجود خالتي معانا ^__^ خل للرحلة طعم غيــــــــــر ،، بس مشكلة ان مافي وقت ننام والنوم كان قليل ( احس وحشني سريري من كثر مافيني نوم ) بس الحمدلله اهم شئ اخذة عمرة وان شاء الله كله باجرة يارب العالمين

طبعا كان الشكر لمحرمنا اللى ماقصر وراح معانا ( ماي برذر مضيع ) ،،

وصلنا لمكة الساعه 1 بالليل يوم الاثنين وعلى طول اعتمرنا .. كان الصحن شبة زحمة يعني نقدر نقول اوكي ” بس سبحان الله لما بدينا نطوف كان مافي احد بالصحن ولافي زحمه ” من جد رهبه عجيــــــــــــــــــــــبه ..

اما الصفا والمروه :- كان تعب لدرجة ان الشوط الرابع انا جلسة قتلهم انتظروا رجلـــي ماقدر اكمل ،، لان درنا بالدور الثاني تحت كان زحمممممممممممه ..

وحاولنا كل يوم بعد ماخلصنا العمرة نروح نطوف حول الكعبة بس ابدا ماقدرنا من الزحمه الزحمه الزحمه الزحمه ……..الخ ..

طول ماجلسنا بالحرم نصلي ونروح ونيجي ماشفنا سعوديات كل اجانب (شرق اسيا وجنوب افريقيا ) كان صعب التعامل معاه من جد شلون توصلهم معلومة ( قربوا أو وخري ) قلت حق خواتي احنا بحاجة المرة الجاية نيجي وكل وحده عندها لغه على شان نتفاهم معاهم ..

اخر يوم اجلسوا جمبنا عائلة كويتية واخيرا شفنا ناس عرب زينا كانوا مرة عسل واستمتعنا معاهم

** مضيعين ومضيعات ..

والله مانسيتكم بالدعاء كل اللى يدخلون ويعلقون عندي مانسيتهم .. بس للامانه اكثر شخص دعيتلة بمكة ( سلطان ) لاني طول الوقت واحنا توصلنا مسجات و نذكر بعض ( اننا ندعي لولد خالتي ) لان مريـــض مرهـ وكل ماتصل علينا احد قال لنا لاتنسونة ولما طفنا حول الكعبة كان طول الوقت بس ندعي له وانا تذكرة سلطان ,, (( اللهم اشفى جميع مرضى المسلمين يارب العالمين )) ..

وانتم الباقي دعيت الله يزوجكم ويفكنا منكم >> بتصفق هههههههههههههههههههه امزح والله ..

لا دعيتلكم بالتوفيق بالدنيا والجنات الفردوس .. ( وكم مضيعه ومضيع كان لهم دعاء خاص )

*_* قلت لصديقاتي قبل لا اروح مكة ( كل وحده ترسلي مسج على الجوال على شان ادعي لها وتأكدوا ان المسج راح يكون بسرية تامه محد راح يطلع عليه )

## جاتني مسجات اشكال والوان اللى موتني ضحك وحده من البنات قالتلي ادعيلي ان زوجي يصير خاتم بيدي واجيب درزن اعيال هههههههههههه

ســـــــبحــــــــان الله ياجماعه : في ناس جاوا على بالي في مكة مادري من وين اطلعواودعيت لهم من قلبي ( ولما رجعنا الفندق اقول لخالتي وخواتي تصدقون فلانه وفلانه جاو على بالي ودعيت لهم مادري وش جيبهم على بالي ) ” قالت خالتي : الناس الطيبة لازم ربي يذكرك فيهم على شان يكون لهم نصيب من الدعاء “

بس ماقول الا ياحظ اهل جدة ومكة كل شوي يقدرون يروحون للحرم

تخيلوا يوم الاربعاء الساعه 2 ونص راحين للحريم الا تخيلوا البزران طالعين من المدرسة ويمر على الحرم يااااااااااااااااا ونااااااااسه ياليت لو اطلع من المدرسة وامر على الحرم ،، وكان في طفل صغير يقول لصديقة ” لية انت ماتجري “ هههههههه يهبلوون وربي كتاكيت ..!!

* كل مانركب بالدرج المتحرك اللى موجود بالنفق (جهة التوسعه ) تعجبني هالعماير وماقدرت اخذ الا هاللقطة الوحيده .!!

اتمنى ان رب العالمين يكتب لكل شخص ماراح العمــرهـ انه يروح ،،

ولكل شخص مااخذ حجه انه يحج يااارب العالمين ..

والله يتقبل صيامكم وقيامكم وصالح اعمالكم

توني اصحى من النوم وافتكر ان في شئ اخترع بالسعودية للنساء اسمة بطاقة احوال ..

يعني حالنا من حال الاولاد ..

كنت قبل اقول مالها داعي لية بطاقة احوال .. وش اسوي فيها مانحتاجها ابدا الله يخلي بطاقة العائلة .. بس بعد فقداني لبطاقة العائلة والبحث عنها لمدة يوم كامل اكتشفت ان بطاقة الاحوال نعمه وانا بحاجة لها وبقوووهـ ..

ولاكن مع الاسف كل الدول العربي والاجنبية والعالم بكبرة خلونا نقول .. من اول ماينولد الطفل انثى او ذكر يطلع له بطاقة شخصية .. تعرف عن هوية الشخص ..!!

واحنا عايشين كل حياتنا (ببطاقة العائلة )

ماهي بطاقة العائلة :-

هي بطاقة كبيرة طول ذراع اليد لونها اخضر توضع بزاويتها اليسار صورة ولي الامر (( صورةالأب )) والاسم والتاريخ الميلاد ولون العينين والعلامة الفارقة ،، وكل المعلومات

واسفلها جدول كبيــــــــــــــــــــــر (كانه جدول مدرسة ) ويحتوي هذا الجدول على اسماء الابناء والبنات والزوجات ..

* طبعا الولد يطلع من البطاقة العائلة لما يصير عمرة 15 على ماعتقد .. اما البنت لين ماتتزوج او الله ياخذ روحها ..

وهذي البطاقة اللى مانقدر ندخلها بالشنطة ولا تحطها بجيبك من حجمها الكبير ،، استغرب من الناس اللى تعفط بطاقة العائلة على شان تدخلها وتخلي شكلها بايخ ..”نسميهم ناس غجر” :

 

ومساكين الناس اللى ابوهم متزوج اكثر من وحده وعندهم يمكن 3 نسخ من بطاقة العائلة لان عدد الابناء فوق 30 ,,

المهم ماعلينا الحين نرجع لمحور حديثنا ..

وبحمدالله طلعتلي بطاقة احوال >> احم احم

طبعا مافي داعي اوصف لكم بطاقة الاحوال اتوقع كلكم ادرى ..

بشكل بطاقة الاحوال السعودية الشكل التقليدي للبطاقة الذي لم يتطور من عهد جد ابوي الله يرحمه , والدول كلها طورة بطاقتهم الا احنا ياخلاف

ويللة باركولي ^__^ هههههههههههههههههههه

وجبت لكم صورة من بطاقتي الاحوال >> احم احم

\

/

\

/

\

/

 

 

 

 

 

المشكلة ان البطاقة الممغنطة اطلعت ،، مادري لية سولي بطاقة قديمة ،، بس لاتخافون ماسكت لهم قتلهم لية ماسولي بطاقة ممغنطة قالوا بس للرجال ماوصلت للنساء (دولة متخلفة )

وتفاجاءة لما رحت ان البطاقة تطلع بنفس اليوم كنت افكر انها قصه لين ماتطلع البطاقة ..

واللى صدمني اكثر شكل الكاميرا اللى يصورونا فيها كننا حقين السجناء >> يامامي تخرع

لما شفتها تذكرة الافلام الكرتون عندهم زي هالكاميرا وبعدين تنفجر بوجههم خفت يصيرلي نفس الشئ هههههههههههههههه

واللى صعقني اكثر ان اللون الرمادي اللى بالبطاقة ورقة عادية ويلصقونها فوق بلاستك ابيض وتصير بطاقة …

من جد تخــــــــــــــــلـــــــــــــــــف ,,,

تعرفون وش اللى ضحكني بالموضوع ,,

وحده من البنات من خارج السعودية ××××× تفاجاءة اني توني مطلعة لي بطاقة احوال تقولي شلون كنتي عايشة

هههههههههههههههههههههههههههههههههه

قتلها عادي ” هنا المملكة العربية السعودية ” احنا لحد الان في تخلف عايشين ,,,

وماراح نتطور الا لما يصير حالنا من حال الدول الثانية .. وللاسف حتى ابنائنا متربين على التخلف ..

لاننا شعب سعودي نتوقف عن الحديث قبل لا يطيروني بس ,,

هذا الصيف لم يحمل لي الكثير من المتعه ،، ولم يحمل لى الكثير من الفائده .. كل سنة صيفية اسجل بدورات استفيد منها ..

واذا ماتعلمة منها شئ يكفي ان نومي يكون منظم ولم يتخلبط كما تلخبط تلخبطاً هذا الصيف ..

اعترف باني ضربة الرقم القياسي بالنوم هذا الصيف ..

واعترف انى سهر طول اليل ونوم طول النهار لا مو النهار كلة لحد الساعه 1 ظهرا

و قالت احد صديقاتي مسس كيوت ” والله وكبرتي يا مضيعه ” لاني صرت اسهر لين الفجر خخخخخ

بس اللى استفت منه هذا الصيف الفوتوشوب احس انى صرت شاطره كثيــر بس احتاج لشغلات على شان اصير اشطر ..

ماعندي مغامرات كثيرة هذا الصيف ،، اتوقع انى كبرة وعقلة >> لايكثر ^__^

ومادري وش اللى جاني صرت ماشتهي اطلع من البيت افضل جلسة البيت على كل الطلعات

وهالصيف مانمت في بيت جدي زي كل صيف ومارحت كثير، الايام اللى رحتها كانت معدودة بس استمتعت كثير هذا الصيف معاهم ..

راح احاول ارجع ذكريات المهمه لهذا الصيف الذي انتهى ولله الحمد على خير ..

في بعض البوستات القديمة تكلمت عن يوميات والعطلة

من الاشياء اللى ماذكرتها بالتدوين

مع بنت خالتي وخواتي رحنا الراشد وقلنا خلنا نشوف التوسعه اللى الناس ازعجونا عليها ،، ولما رحنا مافي الا بس مادري كم محل الا فتح بس احلى شئ انها فااااااضية مافي ناس يعني تتحرك ع راحتك .

ورحنا كافي د.كيف وطلبنا .. كان من ضمن المحلات اللى توها فاتحه بالراشد دكتور كيف بس الخدمة سيئة جدا جدا

وكل اللى طلبناه عطونا العكس وخدمة زيروو واخر مرة نروح لهم >> عصبت

لدرجة ان دخل احد الزباين ينادي واحد من العمال يقولة تعال نظفوا لنا الطاولة يقولون له مافي احد ينظف لدرجة ان كثير من الزباين اطلعوا واتركوا المكان ..

خدمة كانت سيئة جدا جدا

وبالاخير اتمنى ان تعود العطلة الصيفية علينا كل سنة بالصحة والعافية

وان شاء الله الاجازة الصيفية القادمة تكون احلى من هالعطلة بكثيييييييييييييييييييير

واجد منزلنا وتكون الفرحة فرحتين

لان ماستمتعت بهالعطلة كثيـــر,,

وكل عام وانتم بالف خــــــــير

بالاخير

دعواتكم لولد خالتي بالشفاء العاجل اهو الان بالرياض متنوم بالمستشفى ،، والكيماوي مكثف مررة وتعبان ..

اللهم انت الشافي انت المعافي اشفي جميع مرضى المسلمين وعافيهم ..

التقيت مساء يوم الثلاثاء

 

الموافق 4-9-2007م

 

بالمدونة LaRa LuNa .. كانت موجودة بالشرقية لمدة 4 ايام على مااظن ..

 

وتم اتصالي وتعرفي عليها كنت بقمة السعاده التي لا استطيع ان اصفها لكم عندما اخبرتني بوجودها بالمنطقة الشرقية وتحديد يوم للقاء..كنت بنتظار هذا اليوم الثلاثاء بفارق الصبر.

 

التقينا في استار بوكس بالدمام >> ادري امريكي مقاطعه بس لازم مكان لارا لونا تدله

 

” وخصوصا اني كل ماقولها مكان اهي طبعا ماتدل وتقولي وصفيلي انا مادل ولا مكان على شان كذا مضيعه بيتنا “

كنت جالسة مقابل الباب وكل مادخلت بنت قلت يمكن اهي وطول الوقت جالسة اخمن ^__^

 

والحمدلله ادخلت لارا لونا في تمام الساعه 7:23 م

 

سعيدة جدا جدا بتعرفي عليها ،، وكان وقت ضيق جدا جدا لم يكفينا الوقت للحديث

 

والسبب انى مدعوة على العشاء عند صديقاتي .. وكان صعب جدا ان اتخلف عن الدعوة العشاء ،، ومن الصعب ان افوت طلعة مع احد المدونات ..

 

طبعا الحديث كان متنوع من كل بحر قطرة ..

 

ولاكن مع الاسف الشديد من بين الاحاديث شكاوي اهل الرياض يشتكون من شوارع الشرقية وربي ضاع وجهي من الفشيلة كان ودي اروح وارمم الشوارع واصلحه لاني تفشلللللللة بس ماباليد حيلة ..” اعاني من هالمشكلة بالماسنجر مع بنات الرياض كل ماجاو الشرقية يطنزون ع شوارعنا ” ترى مو مهم الشارع اهم شئ اهالي المنطقة ،،

( اذا البترول كل من عندنا مستفيدين منه اهل الرياض ،، واذا الماي يسحبونة من بحرنا ويصفونة ويخلونة حلو ويودونة الرياض ) واحنا المساكين اللى جالسين ونمول لهم كلشي ومع هذا يذمونا مايصير ..

وانتهى اللقاء في تمام الساعه 8 مساء او قبل الثمان بكم دقيقة ..

واتمنى ان نلتقى من جديد بوقت اكثر من كذا ..

والله يجمعنا جميعا في جناته يارب

 

مع ماسنجر فيستا

>>> اخاف اهل الماك يتشمتون فيني !!

اقولكم معاناتي مع وندز vista الجهاز معفوس فوق تحت ..؟؟

1- انجليزي >> الله اكبر والثقافة اللى تقطع بعضها

2- ماني ملاقية لوحة التحكم

3- مادري شلون اضيف خطوط

4- لما احفظ تصميم بالفوتوشوب ماتطلع الصورة بالملف حاولة يمين يسار مافي فايده

5- مادري شلون اغير اسم سطح المكتب>> اسم المستخدم يعني

6- ماعرف اغير اسامي المجلدات كلها بعض تتغير وبعضها لا !!>> هذي مو مشكلة

7- مو ملاقية زر برنت سكرين اللى بالكيبورد لازم يكون موجود ..

بصراحه احس انــــــــــي ضايعه من قلــــــــــــــــــــب ..!!

——————-

تحديث

بفضل من رب العالمين وتوجيهاتكم تم حل جميع المشاكل التي لدي في الفيستا وتعلمت الكثير في الفيستا وحسيت انى وصلت القمر