مدونة اللتان

أجل صقور المنتخب جدهم تويتي ويخب بعد !!!

اول شئ :-

نبـــــــــارك للشعب العراق لفوزة بكأس اسيا

ونقول للسعوديهـ حظ اوفر تعيشون وتخسرون وهذي الدنيا …!!

 اووووووهـ يا عراااااااااااااااااق  اوووووووووهـ يا عراق

بصراحهـ اول مرة اشوف مبارة من اولها لين اخرها ..!!

لان امس رحنا تغدينا في بيت اختي وجات بنت عمي واعيالها وزوجة ولد خالتي وبدات المبارة في تمام الساعه 3.30 عصرا

وبسرعه خلصنا من الغدا وصلينا العصر وفتحت التلفزيون وكانت المفاجاءهـ

تلفزيون اختي مافي قنوات رياضيه خخخخخخخخ

بس قناة السعودية الرياضية  >> والمعلق يضيق الصدر فية نوم

وقناة الكويت الرياضية >> لو تسمع صوت المعلق كانك بايام السبعينات

وقناة عمان الرياضية >> ماندري وش يقول المعلق

ضاق صدرها بنت عمي واعيالها على القنوات ههههههههههههـ

وفتحنا الانترنت وسوينا بحث على تردد قناة الكاس وقناة ابوظبي الرياضية والجزيرة

وبفضل من الله لقينا القنوات ^__^

(( بنت عمي تحلف انها اول مرة تمسك ريموت وتبرمج قنوات خخخخخ توها تدري انها شاطرة وتعرف تبرمج هههههههههههههههههه ))

ولما انتهى الشوط الاول اتصلنا على اخوي (مضيع) وقلنالها يعطينا تردد قناة الكأس لان مالقيناها بالنت ..!!

والحمدلله لقينا كل القنوات بدا التشيجع

لا لا مو التشيجع للمنتخب

التشجيع حق بنت عمي اللى اعرفة تبرمج  القنوات خخخخخخخخ

وللاسف الشديد خسر المنتخب السعودي

(( اللى يضحك بالسالفة ان لما فازة العراق التلفزيون مافي حماس ولا اغاني ولا رقص وحتى الراديو مافي شئ لان العراقين ماعندهم اغاني للمنتخب مساكين بس عندهم يالبرتقالهـ  لو المنتخب فاز كان كل الدنيا خضرهـ والاغاني والاحتفالات بكل مكان ))

بس انا فرحة تعرفون لية …!!

قلت الحين بتصير الشوارع زحمهـ والشباب بيستهبلون

ويااااااااااااااا حراااااااااام شباب الشرقية حر ورطوبة مايقدرون يتحملون الرطوبة خليهم في بيتهم مع المكيفات احسن ..

وكل خسارهـ وانتم بالف خير وصحهـ وسلامهـ

هذا البوست برعاية :-

المنطقة الشرقية

رطوبتنا بالشرقية مع أهلنا غــــــــــــــــيــــــــــــر ..

الرابط 

 

اليوم لما رحنا مجمع فؤاد سنتر على شان بنلعب مودي ولد اخوي ..!!

دخلنا المصلى نصلي العصر انا واختي وزوجة اخوي ونسولف

لما شفنا الجدار قبل لا نصلي كان مكتوب  

(( ارجوا تنظيف المسجد من الحشرات الزاحفة ))

انا مت من الخووووف حشرات زاحفة وش يطلعون من اي نوع اي فصلية  ياويلي .

اوووهـ ماي قاد OMG!!!!

قالت اختي واهي تضحك : لا يطلع لنا دايناصور مش حشرات خخخخ

وكان الحل ان وحده تصلي وثنتين يراقبون المكان

وانا اصلي احس عيني على السجاد وخايفهـ من جد

بس ابشركم الحمدلله خلصنا الصلاة وماشفنا ولا نملهـ

لوووووووووووووووووول

بس الكتابة بالكحل على الجدار خطيرة

 

اليوم لما فازت السعودية على اليابان ،، فكرة خلاص اخذنا الكاس…

وانتظر متى بيسلمونهم الكاس وماسلموهم؟؟

وانصدمة من خمس دقايق لما قالي اخوي مضيع ان باقي بيلعبون مع العراق حسيت بالاحباااااااااااااط الشديد جدا جدا

وقالي انهم تاهلوا للنهائي فقط ..!!! 

وعرفة ان مالى امل بالكـــــورهـ ,,, بس وش اسوي وحدهـ من البنات كل تقولي خلي عندك وطنيهـ ..!!ودائما صديقاتي يقولولي ماعندك وطنيهـ؟؟

بحياتي مافرحة لما يفوز المنتخب السعودي احس عادي ولما يخسر كمان عادي بس اسوي نفس نوع من انواع الحماس  

لان اقول بقلبي : واذا اخذوا الكاس انا وش بستفيد في احد بيقدم لى هديه بهذي المناسبة ،، او بيعزمني على مطعم ،، او يوديني رحلهـ خارج المملكة وخارج الخليج العربي ،، او يوديني الكورنيش اشوف استهبال الشباب ,,

على شان كذا ماتعب نفسي ..!!!

بس اذا فازة السعوديهـ على العراق راح يكون لكم هديهـ لكل المضيعين والمضيعات ,,

واذا خسرة السعوديهـ كمـــــــــــان لكم هديهـ لاتخافوون

 

 

 

الف الصلاة والسلام عليـــكــ ياحبيـــــــب الله محمد

كلوووووولييـــــــش

يوم الاربعاء

الموافق:- 18/7/2007م

4/7/1427هــ

تـــــــــــــآآآريخ مهم في حياتي حفل زفاف اعز صديقة على قلبي M!ss sweet ،،

واااااااااااااااااااااااااااااااااااااااااااااااااااااو

يعني ماتتخيلون قد ايش فرحانهـ لها احس ودي اطير وبنفس الوقت ضايق صدري عارفه انها راح تنشغل وراح افقدها مع الايام .. مابي اكتب عن مسس سويت وش قد احبها واعزها اخاف البوست يصير كلهـ دمووع وماقدر اكملهـ من الصياح … (( لانها اكثر انسانه اقدر افتح لها قلبي ))

بس الحفلة كانت مررررهـ كوووول وونـــــــــــــــــاصهـ

حضرنا الزواج انا واختي ،، والغريبه رحنا بدري هذا من كثر الحماس اللى فيني خخخخخ بعد ربع ساعه جاو كل صديقاتي الحفلة

طبعا مسس رجهـ اخت المعرس

ومسس باردهـ جات مع امها

وجات مسس مزيكا ياحبي لها اهي وخواتها وامها كذالك

بس مسس كيوت راحت الكويت وماقدرت تيجي بصراحة تفاجاءة انها ماجات ..

ممممممممممممم خلوني اكتب اهم الاحداث بالحفلة

** شفت مدرساتي بالمرحله الابتدائي واااااااواحس الدنيا ارجعت فيني على ورى اكثر من 10 سنوات .. (وكانت موجودهـ عمتي لانها مديرة المدرسة سابقا )

سلمت على مدرسة الرسم (أ.ف) اول ماشفتها تذكرة كان رمضان وطلبة نرسم سفرة رمضان وقالت ارسموا سمبوسة وبيمتو (فيمتو) وهريس ورسموهم كبار ع شان اكلهم،، وراحت نامت واحنا مارسمنا .. خخخخخ

شفت مربية فصلي بثاني ابتدائي (ف.م) وسلمت عليها وتذكرة التاج اللى تلبسنا اياهـ لما نكون شاطرين .. (( تذكرة صديق بابا سعد الله يرحمه ياارب ))

وشفت مدرسة الدين (ج.ب) بس هذي اشوفها في بعض المناسبات

وباقي الابلات تذكرة اشكالهم بس ماتذكر اساميهم خخخخخ

** لما رحنا نشوف العروس قبل لاتنزف :-وجلسنا نواسيها ونضحك ونستهبل واهي ضايق صدرها ,, قلنا لها لية ضايق صدرك اضحكي ضيقتي صدرنا معاك ..!! قالت / مش متخيلة انى مابرجع بيت اهلي ضايق صدري بفقدهم … >> حاولنا نلطف الجو بس الاخت مرة مقفلة معاها .. ( لفيت عليها وقتلها يضيق صدرك لية اختك الكبيرة توها مهزئتك وامك تحت فرحانه بتفتك منك واختك الثانية جالسة تزغرط تحت واخوانك بيفتكون من طلباتك ^_^ لية زعلانهـ طبعا كنت اضحك وانا اقولها هالكلام ) جلسة تضحك ماتت ضحك .. :d

طبعا اول مادخلت ام العروس قالتلي مضيعه اركبي لها فوق تراهي مرة ضايق صدرها … وحاولنا انا مسس مزيكا وبارده يلطفون الجو بس الحمدلله جبنا نتيجة .. قتلها انتبهي وانتي تمشي ترى نهاية الجسر في سجاد احمر انتبهي لاتطيحين لاني انا لما ركبت كنت راح اطيح بس الله ستر (( وجلسوا يضحكون كل البنات ))

** كان قبل لاتنزف العروس كان في فقرة :- غنة الطقاق (يللة صبوا هالقهوة وزيدوها هيل ) وجاو اطفال صغار يرقصون وكان في المضيفات يدورون بالقهوة وفنجان على شكل بسكوت ومحشي من داخل بالشوكولاته .. مع حرارة القهوة تسيح الشوكولاتة لما لفوا صديقاتي على انا ومسس باردهـ لقوا ان خشمنا كلة شوكولاته (طبعا الحايرة اخت مسس مزيكا دموعها انزلة بشكل خطييييييير من الضحك ) الله يسامحهم بس جالسين ويضحكون ..

** العروس واهي على الكوشة : طول الوقت الطقاقة تغني على اسم العروس (مسس سويت)لفيت على صديقاتي بالطاولة وقتلهم الحمدلله يابنات كللللللللللللللللللللللللكم اساميكم حلوهـ لما تعرسون وتغني عليكم الطقاقة اساميكم زينة .. وجلسوا يضحكون ويقلون والله اسمك حلو ماكملة كلامي الا الطقاقة تقول ( اهداء الى صديقات العروسة ،،مضيعه بيتهم ومسس مزيكا واختها ومسس باردهـ ومسس رجة !! ومحد يقوم يرقص الا صديقات العروسهـ ) طبعا قمنا وغنة الطقاقة باسامينا وااااااااااااااااااااااااااااااااااااااااو اول مرة يقولون اسمي في زواج كلووووووووولييييييييييييييييييييش واكتشفت ان اسمي حلو ( وهــ بس يا زين اسمي ) في الاغاني يطلع مرهـ كووووول (بس انا ماني عارفة ليه للحين المغنين والمغنيات محد غنى على اسمي صحيح ماعندهم نظر ) والظاهر الطقاقة عجبها اسمي كل شوي تعيد وتزيد باسمي احم احم طلعت مش هينهـ …(راح يترخ هذا الحدث)

 

** اخوي مضيع اهو اللى ودانا الزواج يا حبي له بس

( عقبال مانفرح فيك يا مضيع >> قوولوا اميييييين )

سئلني اخوي :- الساعه كم اجي اخذكم مضيعه من الزواج ؟؟

قتلها انا لين مايسكرون لمبات الصاله انا بطلع >> ناوية تنام

قالي : العروس وبتنزف وبتروح وانتي وش بيجلسك خخخخخ

بس خفت احدد وقت ومادري وش يصير ويجي نفس الوقت ويفوتني شئ

بس طلعت من الزواج لما طلعوا صديقاتي كلنا مع بعض

 

اوهـ نسيت اقولكم …

كان عندي بنفس اليوم

حفلتين زفــــــــــــــــــــــــــاف >> يامناسبتين يا مفيش

زواج مسس سويت وزواج بنت صديقة ماما ..

طبعا انا واختي اللى اكبر مني رحنا زواج مسس سويت

بس اختي الكبيرهـ مع زوجة اخوي راحوا الزواج الثاني

وهذي صور بطاقات الدعوهـ

عقبـــــــــــــــــالكم كلكم يـــــــــــــــــارب ..

 

اتوقع اكثر البنات يعرفون محل VINCCI للجزم والشنط النسائيهـ .. منتشر بكل مكان بشكل كبير وواضح زي الشمس ..!! وتم افتتاحه اتوقع بالسعوديهـ عام 2003 م يعني من قريب  ..

هذا المحل جزمه ابدا مش غالية مقارنة بالمحلات الثانيه ،، بس عندها تشكيلات حلووهـ وخصوصا للصيف الوان تجنن ..

اقولكم : يعني سعر الجزمة ماتوصل 200 ريال مستحيـــل ..!!

اتوقع اغلى جزمة بالمحل 179 اتوقع اذا مو ارخص ..!!

 ولما يصير خصومات تصير الاسعار رخيييييييصهـ جدا جدا يمكن توصل قيمة الجزمة 40 ريال ..

بس تعرفون هذا المحل صناعه ماليزيه سعر الجزمة في ماليزيا ( 15 او 20 او 30 ريال ) بس ..!!  مايزيد على هذا السعر ..!!

واحنا هنا السعر يدبلونهـ مليون مرهـ ..!!

بنت عمي كانت راجعه من ماليزيا مع زوجها وجايبة جزم من نفس المحل واهي مشترية الجزمة بـ 20 ريال بدون خصم سعر الجزمة الاصلي،،  وهنا توهم منزلين الجزمة وقيمتها 97 ريال … نقدر نقول فرق كبير …

 سؤال لو صار خصم على الجزمة في ماليزيا كم بيصير سعرها ( 3 ريالات او مجانا ) خخخخخخخخ …!!

بس ليهـ الاسعار يدبلونها هنا على شان الشعب السعودي غني زي مايقولون الغرب ؟؟؟ او لانهم مقصه وكلشي يشترون ؟؟ او لانهم يحسبون قيمة التكلفة لين ماتوصل الجزم لين السعودية (مع انى ماتوقع انه بيكلف) ؟؟

طبعا أنا قلت حق بنات خالي (انتقلت العدوه لى )  قتلهم بنااااااات  والله لو يروح احد ماليزيا ويجيب هالجزم ويسوي له تجاره يدخل ذهب >> ياحبهم للمشاريع الفاشلة خخخخخ

 

 

هذا اللى قالتلي عنه زوجة خالى تدرس بالجامعه الوطنيه اليمنيهـ (كذا اسمها صح ) بالمنطقة الشرقيهـ

زوجة خالى السنة اخر سنة لها وتتخرج وقدمة مشروع التخرج والحمدلله ويوم السبت قبل شهر المفروض يكون اختبارها في الجامعه ،، اللى حدث انها لما جات بتروح تختبر الصدمة ان الجامعه ( سكروووهــــــــــا)

سكروها = اغلقوها = قفلوها = مافي جامعه..!!

تعرفون ليهـ ،، لان مش مصرح فيها … والبنات اللى تخرجوا ماعطوهم شهادات ؟؟

وش هالخبر وش هالصدمة طيب البنات وش يسون والمبالغ الهائلة اللى ادفعوها على شان الجامعه والدراسهـ والتعب …؟؟

ولما اتصلوا على الفروع للجامعه الوطنيهـ .. قالوا لهم اذا تبغون تعالوا سجلون عندنا بس تدفعون من جديد وتبدا الدراسة من الصفر ،، ومالهم دخل بالفرع اللى موجود بالشرقية والبتحديد (الدمام ) ..

ولحد الان جالسة زوجة خالى ماتدري وش تسوي والبنات اللى معاها جالسين زيها ماختبروا ولا شئ

تعبوا 4 سنوات دراسة وتعب واخرتها تقفل الجامعه ..!!

لية بالاساس يفتح جامعه بدون تصريح ..؟؟

وسمعت ان الجامعه العربية المفتوحة بالدمام والاحساء مش مصرحهـ هل هذا صحيح ام لا ؟؟

 فوضه يعني لدرجة الجنوووووون …؟؟

تقول زوجة خالى اذا ماطلع تصريح للجامعه لازم ادرس من جديد ويروح تعبي كله اللى تعبته  ..؟؟

 

امس رحت حفلة تخرج بنت جيرانا من ثالث ثانوي ,,

بيتهم قدام بيتنا واول مرة ادخل بيتهم … وقبل لا نروح الحفلة اختي اكتشفة ان في شئ ناقص ببدلتها وكان لازم نطلع السوق وتشتري لها ،، ورجعنا من السوق الساعه 8 بالليل وعندنا سواق ماشاء الله تبارك يلف الشرقيه كلها على شان بس مايوقف قدام اي اشارة مرور ويحب يتفلسف ويسوي حركات .. (( حسبي الله ونعم الوكيل ))

 

رحنا امس الحفلهـ بصراحهـ كانت حفلهـ رائعه جدا جدا …

بس للاسف عدد الحضور قلييييييييل جدا جدا جدا

والسبب ان عندهم حاله وفاة وماقدروا يعزمون كل الاهل والاقارب

وكل الموجودين عماتهم وخالاتهم واكرهـ شئ بحفلات البنات لما يكون الامهات موجودين وعدد البنات قليل ..!!

اللى صار بالحفلهـ اول مادخلت لقيت بنت تشبة صديقتي مسس سويت ..!! انا طلعت عيني على برالما شفتها كانت صدمة بالنسبة لى لان تشبها مرهـ (( توني اعرف ايش يعني يخلق من الشبه اربعين ))..

وقبل لانقص الكيك ،، اخت الخريجة سوت عرض بوربوينت عن مراحل نمو اختها وحطت صور الخريجه كانت فكرة حلووهـ بصراحهـ وبعدين ادخلت البنت الخريجة وجايبه هديهـ حق امهـــا وبدا الصياح والدموع من قبل الكل والجميع …!! (( الله يهديهم اقلبوا المسئلة صياح ))

ولين مارجعت البيت وانا احس نفس مستطربة من الحفلة .. وجلسة سواليف مع اختي ساعه كاملة عن فلانه وعن فلانه … (( بس ماحشينا كان كلهـ مدح ))

امس اتفقوا خواتي اننا نروح زواج ولد عمتي يوم الاربعاء القادم باذن الله ،،,

لما رحت ابدل ثيابي وبشيل عدساتي احس العدسة اللى باليمين تحرقني مادري ليه غريبة اول مرة يصير كذا ولما شلتها لقيت من على طرف العدسة مقطوعه وهذا السبب خلاني اخذها وارميها بالزبالهـ

لما خلصت سواليف مع اختي رحت اشوف مسلسلي البايخ ((هدوء العاصفهـ )) الحمدلله الحمدلله كان امس الحلقة الاخيرهـ انا مادري شلون شفت هذا المسلسل البايخ ،، اهو قديم 2004 بس انا اول مرة اشوفهـ ..!!وامس الحلقة الاخير كل الموجودين بالمسلسل ماتووا

وخلوني اجلس اصيح وضاق صدري بعد ماكنت فرحانة توني راجعه من الحفلة ،، والحمدلله ماكان في احد معاي بالصاله بس لما لفيت يمين لقيت علبة المناديل جمبي تطالعني وجلسة اسحب مناديل واصيح ..!!

اول مرة اشوف مسلسل يموووت كل الموجودين وكللللللللل المسلسل بالنهاية كانوا يصيحون ..

دعية على الى كتب القصة لانها بايخه ونهاية سخيفة

والاسخف من هذا اني انا الغبية جلسة اتابع هذا المسلسل اللى يضيق الخلق

بس صحت على البنت اللى ضيعة بيتهم بالمسلسل تذكرة نفسي

 

تحديـــــــــــــــــــــث ..

انا الحين ماشيهـ البحرين تامرون على شئ من البحرين …!!

 

بهذا العام .. وبهذا اليوم

حبية اشارك صديقاتـــي أهـــل الجنوب فرحتهم

بالتاريخ المميز اللى ماراح ينعاد الا بعد ملاييييين السنين

07/07/2007

كـــــــــــــــ عام وانتم بخير يا صفر سبعهـ ــــل

ينعاد عليكم التاريخ يارب سنوات عديدهـ وبعمر مديد باذن اللهـ ..

 وهذا توبيكــ احد بنات الجنوب بالماسنجر عندي ..

وهذي صورتهم الشخصيهـ :-

 يعبرون مساكين عن فرحتهم بهذا العام والرقم المميز ..

بصراحهـ ابدعوا اليوم اهل الجنوووب $_$ ياجعل فرحتهم دوم .

 

07/07/07 << الرقم للبيع

 

اتصلت بصديقتي واهي على باب الزواج .. جالسة تستعد وتشتري

بس لما كلمتها صوتها متغير وضايق صدرها مررررهـ .. سئلتها وش فيك ..!! قالت مافيني شئ … انا اصريت ابي اعرف لان صوتها وااااااضح انها شوية وبتصيح ..

قالتلي انهم ملتزمين مرهـ ((وانا اعرف هذا الشئ )) ومايرضون ان المعرس يدخل على الحريم بصالة الافراح يوم الزواج ..

يعني بس العروسهـ اللى تدخل ،،

والحين اهى الوحيده من خواتها واخوانها دخل زوجها يوم الخطوبة ولبسها الشبكهـ ,, واهلها طبعا ماسكتوا من التعليقات والكلام اللى جاها بصراحة انا حسيت بضيقة الصدر اللى اهي فيها …وهذا غير الزعل اللى صار بالبيت والهواش واهي مسكينة مالها ذنب …

لان اهل المعرس ماعندهم الا هذا الاخو ويبون يفرحون ودخلوهـ

الحين موعد الزواج باقي عليهـ ايام قليله مررررررررهـ وبدا العدد التنازلي ..

والمعرس بيدخل الصاله لان خواته مصرين على هذا الشئ …

واهي فهمته ان صعب انه يدخل ومو لازم يدخل وجابتها باكثر من طريقهـ بس ماقدرت يقول انا مقدر فرحة خواتي وحرام اضيق صدرهم على شئ بايخ ..ومادري وش اسوي تعبت ..(( والمصيبة الولد يبي يقلد خالهـ لان خالهـ توهـ متزوج ويبي يسوي كلشي زيهـ على شان مايصير اهو اقل من الخال ))

المشكلة ان محد يدري انه بيدخل المعرس الصالهـ الا اهي العروسهـ وخوات المعرس (وانا دريت ) .. واهلها اسئلوها بيدخل المعرس بعد ؟؟ قالت لهم اهي لا مادري ماتوقع ..!!

تقول لو قلت لهم انه بيدخل بيفضحوووني وانا مابي اسوي مشكله،، بسوي نفسي انى مادري ولما يجي يوم الزواج كانى متفاجاءهـ ماعندي حل ثاني ..

وبعد اتصالات وجلسة تقنع خواته انه مايدخل .. قالت وحدهـ من خواتهـ : خلاص لما يدخلون الناس للبوفيهـ للعشاء بنخلي اخونا يدخل >> نفس المشكلة ماسويتي شئ ياحلووهـ ..

بصراحة عروس وزواجها قرب واهي ضايق صدرها بس تفكر وماتنام ونفسيتها زيييرو ,,ماتسوى عليها هالزواجهـ .. وهذا غير المشاكل اللى صايرهـ على اشياء بايخهـ واهي محترق دمها وساكتهـ .. تقول ودي اموت وافتك من السالفهـ كلها ..

أنــا عن نفسي ماشوف فيها شئ لو بيدخل المعرسصحيح شويهـ اهلها مكبرين المسئلهـ بس المفروض اهل المعرس يقدرون هذا الشئ لان هذي عاداتهم وتقاليدهم ..!!

تعرفون وش المصيبهـ الاكبر ،، ان المعرس يقرب لها

استغرب ان اكثر المنتديات مشهورة هي منتديات أهل الكويت

والمشكلة بشكل كبير مو بسيط …

وكل المنتديات القديمة المشهوره حق اهل الكويت ،، واذا كانت لسعوديين لازم في واحد مشرف من بين المشرفين كويتي ..

لية مادري ؟؟

واذا ماكان كويتي امهـ كويتيه ,, المهم العرق الكويتي فيه فيه خخخخخ

بس اغلبهم صغار اعمارهم ماتوصل 20 اقل من 20 بكثير , وابدعاتهم مو طبيعيهـ وشغلهم شغل صح ..

تحس عندهم مواهب مو صاحيه وايش تطلبة لازم يعرفونة وعندهم .. بس عيبهم لسانة طووويل وقدر ماتقدر تحاشاهم لا يلعنون ابو خامسك ..

والغير هذا كلهـ يمكن يقتحمون جهازك لان هذا اللى هم شاطرين فيهـ …

بس اللى كنت بقولهـ في مواقع يفتحونها مالها اي هدف ،، مع العلم ان دعاياتهم عليها كثيرة ومكفيه وموفيهـ …

لو بدل هالمنتديات والشاتات والمواقع اللى مالها لزوم يبدلونها بشئ مفيد يكون احسن ..

احس عندهم مواهب بس محتاجين لافكار اكثر ويحطون هدف معين ..!!

مو كل مواقع اهل الكويت بالعكس في ابداعات عندهم ..

بس اقصد الصغار بالسن ،،،اللى يفتحون مواقع خطأ وماتليق بالشعب الكويتي ..

ومادري لية يخربون سمعتهم بطول لسانهم والكلمات البذيئة .!!

هذا الكلام مش على أهل الكويت كلهم على البعض ..