مدونة اللتان

كل انسان له وجهة نظر خاصة فية وعلى كل شخص يحترم وجهة نظر الاخرين ، قرار بندة لتوظيف السعوديات لا اعتبرة قرار خاطئ ابداً بالعكس اعتبرة قرار سليم جداً وخطوة جيدة لتقليل البطالة ..

في كثير يقولون ان المرآة مافيها شئ لو كانت عاطلة عن العمل المهم الرجل ما يكون عاطل عن العمل ، بالعكس في كثير من البنات هم المسؤولين عن عائلة بالكامل وتصرف عليهم وبحاجة مااااااااااسة لوظيفة حتى تحصل على لقمة العيش ، و الكل شايف الوضع في البلد الاسعار في ارتفاع بدون مرعاة الأسر ذات الدخل المعدوووم  وليس ضعيف ..

في معرض ايكيا في المنطقة الشرقية قسم الألعاب للاطفال الموظفات اللى فيه (( سعوديات )) بنات البلد عليهم عباياتهم وحجباتهم ولا بعد متغطيات و يشتغلون بتسجيل دخول كل طفل الى قسم الالعاب مع اخذ بيانات عائلتة كاملة ، ما اشوف ان شغلتهم في هذا المكان عيب او فيها شئ خطأ بالعكس النساء يهتمون بالاطفال وحرصين عليهم يمكن اكثر من الرجال وافضل من اننا نأمن اطفالنا عند [ رجل فلبيني او غيرهم من الجنسيات ] ..

وفي مجمع الشراع مول في مدينة الدمام المسؤولات عن شحن بطاقات الالعاب ايضاً (( سعوديات )) وقايمين بمهمتهم وفي مكان عام ولا فيها اي شئ خطأ او عيب بما ان البنت نفسها عليها عبايتها ومحتشمة ومحترمة نفسها لدرجة انها مشغولة بشغلها حتى ما يمديها ترفع راسها و تشوف اللى حولها ..

ومو بس كذا وبعد في محلات [ سنتر بوينت و ستي ماكس ] في موظفات (( سعوديات )) مسؤولين عن الأمن يشتغلون في كل فروع سنتر بوينت و ستي ماكس وتدور في قسم النساء و الاطفال ، ويمكن تتفاهم مع النساء افضل من الرجال وخصوصا في وقت الصلاة بعض الحريم ما يطلعون من المحل يبغون يخلصون اخر قطعة او اخر جولة ويوقف الرجال على راسها [ اختي الله يبارك فيك اطلعي صلاة ] مو كذا افضل انها تكون امرآة تتكلم مع الحريم ..

الان احنا نسافر لدول الخارج لية لما نشوف حريمهم يشتغلون عادي الوضع ولما جات علينا احنا السعوديات يبدأ الكل بالحرب وكان طلب منها انها تقوم بكارثة او مصيبة ؟؟تحسسونا بعض الاحيان بان المرآة السعودية افضل شئ لها ان يتم ( دفنها )  وهي حية داخل بيتنا وانتهى !!! والدول الثانية حريمهم يشتغلون ويطلعون ويرتقون واحنا على وضعنا احنا مانتغير

- كان قبل مشكلة و قضية اذا المرآة تشتغل في ” بنك ” او تكون موظفة في ” ارامكو ” والكل يعتقد بانها فتاة جريئة وان كيف تسمح لبنتك او اختك تشتغل في بنك او في ارامكو ، وطبعاً يبدأ الناس بالحديث عن هذي البنت ولما انتشرت الظاهرة وشافوا ان الشغلة عادية بدوا الناس تنسحب من هذا الشئ وتلتفت ان كيف المرآة تشتغل في محل تجاري باحد المجمعات ؟؟

لما سمح للمرآة تشتغل في البيوت [ خــــــــاااااااااااااااادمة ] في منزل مغلق ، كان المعارضين قليل ولا شفنا الحرب اعلنت زي الحاصل اليوم في قرار ( بندة ) ..

تفاجأة اليوم من العالم بالفيس بوك مقومين حملات وليس حملة وحدة [ ضد او مع توظيف في بندة ] وكانهم طلبوا من المرآة انها تخلع عبايتها ؟

ايش الافضل تكون المرآة ( طرارة عند الاشارة ) أو تشتغل في كاشير بسوبر ماركت ؟؟

تكون مشردة من شارع لين شارع ولا تحصل ريال واحد طوااااااال السنة ، او تشتغل في مستودعات السوبر ماركت ؟؟

ان تنذل عائلة كاملة وتضيع ويكون منهم الحرامي و الطرار في هذا البلد أو تتوظف احد بناتهم في سوبر ماركت وتستر على عائلة كاملة ؟؟

اذا كانت لديكم حل لتوظيف الكم الهائل من العاطلين عن العمل في وظايف محترمة وشريفة ، يلله هاتوا الوظايف اللى عندكم بعدين قولوا لا تشتغل في سوبر ماركت …

- الشخص المعارض على ان المرآة تشتغل في السوبر ماركت ليت يكتب سبب مقنع وحل للبطالة ؟؟

ولحد يقول لي عادي خلها عاطلة عن العمل المهم تكون انسانه شريفة وميته جوع ومريضة مو محصلة للعلاج ولا تستر على نفسها وعلى عائلتها بس الاهم ما تتوظف في مكان اختلاط … ” وموضوع الاختلاط لي عودة له في بوست مفصل ” ..

- للأسف وانا اكتب البوست وصلني رابط خبر [ تراجع بندة عن توظيف الكاشيرات ]  اتمنى ان بندة تراجع الموضوع من جديد وترتبة وتبدأ تعين النساء في الكاشيرات ..

7 people like this post.

Unlike

تم كتابة هذا البوست في 23 / مايو / 2010م ، وسأكمل الان الموضوع وسبب تكملتي له ..

كنت اعرف من زمان ان اكبر خطأ تستحقر اي انسان بالحياة ممكن يكون ما يعجبك بس تقلل من قيمته وتعاملة بمعاملة سيئة هذا اكبر خطأ ولحد اليوم اؤمن بهذا الشئ..

(2)

اثناء عملي في المدرسة كانت في معلمة تشتكي كثير من احد المستخدمات لسوء عملها وانها بارده في العمل او بالاصح بطيئة ،، كنت اراقب هذي المستخدمة اشوفها تشتغل كل شغلها بس صحيح هي شوية بطيئة ويمكن هذي طبيعتها صعب نغيرها ..

كانت هذي المدرسة تهاوشها ان كيف ماسوت وكيف ما نظفت وكيف ما صار وكيف وكيف وكيف …. ، قلت لها لا تهاوشينها حرام مسكينة جالسة تشتغل بس هي كذا بطيئة ، قالت يختي تبط كبدي على برودها وبعدين كل شئ لازم انا اقولها ما يصير كذا ..

طبعا انا سكت ما حبيت اتدخل و لو بدخل بنقاش مع المدرسة مافي فايدة ابداً لان لازم تمشي رايها وان هي الصح ، تجاهلة الموضوع وقلت ان شاء الله مع الايام تثبت لها المستخدمة ان هي افضل منها بس لان حياتها اجبرتها تشتغل هذي الشغلة تستحقرها .

بعد اسابيع غابت المدرسة هذي وصار على انا اراقب المستخدمة واعطيها التعليمات ، اول شئ الصباح و أول مرة احتك في المستخدمة هذي قلت لها ( صباح الخير فلانة وش اخبارك ؟؟ ) أول مرة يا جماعه اشوفها تبتسم وقالت لي صباح النور الحمدلله بخير ايش اسوي اليوم ؟؟

قلت لها يعطيك العافية يارب الشغل كذا وكذا وكذا …الخ ..

حصلتها انتهت من العمل بدري وكان شغلها ماعندي عليه اي ملاحظة ،، اليوم الثاني ماسكت وقلت للمدرسة ان العامله سوت كذا وصار كذا ……..الخ

ما عجبها كلامي وكاني ماراقبتها صح او اني اكذب  ..

المدرسة هذي كان عندها مشكلة سلك الكمبيوتر وجودة يعيق تحريك الكرسي وان احيانا لو احد مر يفصل السلك عليها وكانت هالمشكلة دائماً نحاول ندور حل لهذا السلك ومرة مودينة قدام ومرة و ورى وكل مرة نحرك في السلك وشغلتنا الشاغل ..

بعد فترة جات المستخدمة تنظف وقامت جابت دبوس وحطته بالجدار وارفعت السلك علية بطريقة حلت ازمة ومشكلة كبيرة ، والدبوس كان لتعليق الوسائل المدرسية وموجود على طاولة المعلمة ولا يحتاج اي جهد ..

ارجعت المدرسة وتفاجأة ان المشكلة انحلت وان مين رفع هذا السلك كذا ، وقالت الللللللله يسعدها اللى حلت لي مشكلة السلك ،، لفت المستخدمة وقالت : انا كنت انظف وابي ارفع السلك ورفعته على شان انظف .. !! ” هي المستخدمة ما ارفعته على شان تحل مشكلة المعلمة ارفعت على شان يساعدها في التنظيف وبنفس الوقت حلت المشكلة لهذي المعلمة اللى كانت تقلل من قيمة المستخدمة “

فرحة مرة من الحركة الصغيرة لان المدرسة من يومها وهي تغيرت نظرتها لهذي المستخدمة المسكينة ..

:::

(1)

العام الماضي كنت في احد المراكز عندنا شغل في فترة الصباح وكان معاي مجموعه من زميلاتي ومن بينهم ( سمنتومة ) اللى صار ان الشغل كثير وخلصنا الظهر والعصر كان عندنا شغل بنفس المركز طبعا بدون تفكير سحبنا جلستنا من الصباح بالمركز الى الليل ، في مستخدمة تشتغل ايضاً في هذا المركز غير عن المستخدمة طبعا اللى بالمدرسة ( لا تتخربط عليكم الامور ) ,,

كان وقت بريك لنا ولها وكنا ننتظر المطعم يجيب الغداء ، و لما وصل الغداء اخذنا كل وحده فينا وجباتنا واخذت وجبة المستخدمة اللى طلبناها لها ورحت اعطيها اياه بنفسي الا حصلتها منسدحة على الارض تريح [ كنت اعتقد انها نايمة ] بهدوء نديتها بتأكد انصدمت انها صاحية وقامت قالت لي نعم …

قلت لها افكر انك نايمة بس هذا غداك ..

قالت : لا جالسة احفظ كلمات بالانجليزي اتعلم انجليزي …

بصرااااااااااحة ابهرتني [ ماشاء الله تبارك الرحمن ]  لان قبلها هي قالت لي ان هي كملت تعلميها الثانوية مع بناتها كانت تدرسهم وتدرس معاهم وكملت الثانوية وان هي ( منازل ) فدرسة اكيد ادبي ، بس تعرف لمواد الفيزياء والكيمياء لانها تاخذ كتب اولادها وتعلمتهم ، وبعد فترة ابهرتني بشغلات كثيرة هي تسويها بنفسها وبيدها وشغلها نظيف مرتب وتتعلم كل شئ بالحياة يخطر في بالك ..

انسانه مع فقرها و شغلها والوقت الضيق الا انها عندها طموووح كبيرة وتطور بنفسها بشكل كبير ،، ومع كل هذا الكثير يستحقرها وكلمتهم تمشي فوق رايها حتى لو كان الشئ يضايقها ..

والله اني استحقرت نفسي لما شفتها وتعرفت عليها وجلست معاها وسمعتها …

- انتبه تستحقر اي انسان بالحياة لان يمكن يتصرف تصرف صغير بخلال ثواني بسيطة وانت لك سنة كاملة ما حصلت حل لهذي المشكلة ، لا تنتظر تيجي الفرصة اللى تخلي هذا الشخص يبين انه احسن منك ..

6 people like this post.

Unlike

بما ان عطلتي الصيفية بدت من يوم الاربعاء الماضي ولله الحمد ،، حبيت انوه على البعض ،ببعض النقاط اللى يحفظكم ويرعاكم ..

  انتبهوا تخلون العطلة كلها نوم وتقومون  لنا اخر الليل وتشتغلون مع ( الخفاش )

خلكم مخاوين ( العصافير أو دجاجة ما تفرق عندي المهم عليكم بالصحبة الصالحة واتركوا الخفاش في حالة  ) المهم ناموا بالليل زي العالم والناس واصحوا لنا بدري

ما ابي زي كل سنة ادور فلانة و فلانة واحصلكم قالبين ليلكم نهار ..

و لا ابي ادق على وحده الصباح وانحرج احصلها نايمة وكاني داقة نص الليل

 ولا ابي جوالي يرن بنص الليل وحده فاضية قايمة من النوم بتسولف ..

ولا ابي السهرة تكون بالليل ويجون متأخر للعزيمة ..

ولا ابي احد يكلمني بالعطلة و تقولي ” زهقانة طفش العطلة “ << مو ايام الدوام كنتي تقولين متى تيجي العطلة وش اللى صار الحين وتغير   …

مو معقـــــــــــــولة كل عطلة صيفية يتكرر نفس النظام والروتين في حياة عدد كبير من الناس  ، لحد الان مافكرتوا تعدلوا عطلتكم الصيفية وتستفيدون منها …

اتفاجاء جداً من الأسر اللى ما يشوفون اعيالهم كثير بالعطلة الصيفية والسبب ان العيال ينامون بالنهار والابو يطلع العمل وبالليل هم يسهرون والابو نايم وهذي حياتهم طوووول العطلة الصيفية  ..

اعتقد في برنامج صيفية واشياء كثيرة والتسجيل راح على الكل ولما يجي الطفش ندور برنامج او شئ نضيع وقتنا و اساسا هم مو محتاجين هذا البرنامج وداخلين بدون هدف بس المهم ان وقت العطلة يمر …

متأكدة كل التأكيد مجتمعنا هم هم ما بيتغير شئ ،،، ولحد يقولي وش نسوي نقوم الصباح نبي ننام ونعوض

اللى اعرفة ان ( البعير ) ياكل ويخش الاكل في السنام حقة لوقت الحاجة بس أول مرة ادري ان ( البشر ) ينامون كل العطلة يعوضون عن الايام اللى فاتت

” عمـــر الانسان ما قدر يعوض النوم اللى فاته ولا يقدر يجمع نوم لوقت الحاجة ”

قي هذا البوست :

حابة اودع صديقاتي وبعض الناس اللى راح يقلبون حياتهم وما بشوفهم الا بعد العيد و مع العودة للمدارس ،   احب اقولكم ( احلام سعيده ان شاء الله  واجازة اسعد يارب  ) ، بس جد في كثير راح يوحشوووني بالعطلة …

اهــــــــــلاً بالعطلة واهـــــــــــلاً بالصيف

- هذا البوست لكل واحد حاب يودع اصدقائة اللى راح ينامون العطلة كلها ويصحون لما تنتهي ويقولون مرت العطلة بسرعه اكتبوا اهدئاتكم هنا ، المدونة مدونتكم ..

مصدر الصورة : هنا

1 person likes this post.

Unlike

 ما كنت اتخيل ان اللى يتخرج بيتعب وهو يدور وظيفة الا لما قربت اخلص عرفت هذا الواقع المر ، الناس اللى ساكنين خارج المملكة دائماً نسمع يقولون معقولة في ” السعودية ” ماعندكم وظايف ؟؟

هذا المقطع الفيديو عمل بسيط ورائع ويصل الى القلب من عمل ( عبدالعزيز المزيني )

في أول رحلة في مجال العمل الوظيفي قدمت اوراقي في احد الشركات اللى راح تبحث لي عن عمل وانا جالسة في بيتنا ولله الحمد في اثناء المقابلة تم تحديد لي وظيفة وموعد المقابلة كان اليوم الثاني خلال اقل من 24 ساعه [ ويقولون بعد السعودية مافيها وظايف ] !!!

واليوم الثاني رحت سويت المقابلة من صباح ربنا وسريع سريع تم قبولي للوظيفة من بين 4 متقدمات كانت سعادتي لا توصف ، وقالت لي ايش المجال اللى يناسبني وقلت لها المجال اللى احس اني اقدر عليه واعجبت فيني لانها زي ما قالت لي : ( احب البنت اللى واثقة من نفسها وتعرف اهي وش تحب وايش تقدر عليه مو تيجي لي البنت وتقول لي ما ادري اي شئ كيفك ) ،، طبعا بعد المقابلة ولله الحمد قالت لي استلم الوظيفة اليوم الثاني و أنا من زود البطرة والثقة قلت لها لا السبت ابدا باذن الله  ..

طبعا العمل يبعد عن بيتنا ساعه الا ربع ومع زحمة السيارات والشارع ساعه بالضبط ، وصلت الصباح للوظيفة في يوم بااااااااااااارد ” كان شتاء طبعا مو صيف ” و الوظيفة هي ادخال بيانات في الكمبيوتر   ، كانت بالنسبة لي وظيفة جداً مناسبة مع ان وقت طويل بس مريح ..

بعد ماوصلت الصباح انصدم بان مجال الوظيفي تغير وقالت لي وظيفة ( ميدانية ) !!!!!! ايش هي الوظيفة الميدانية [ الوظيفة الميدانية هي انك تيجي من الصبح وتدور في السيارة على الشركات والمؤسسات والمراكز تسوق يوميــــــــــــــــــــــاً ولمدة 5 ساعات او 6 تقريباً ] .. يعني مجال ( تسويق ) !!!!!

اعتقد مجال التسويق ما يصلح لبنات بلدنا خصوصا اننا اكثرنا من عوائل ولدينا عادات وتقاليد لازم نلتزم فيها وهذا المجال مو تخصصي التسويق   ، تخصصي حاسب ولا اعرف لمجال التسويق وقوانين واصولة ….الخ ، بديت بنقاش معاها :Hit:  ان كيف غيرت كلامها وانا بالمقابلة كان الكلام شئ ثاني ، بد ت تبربر وتهذي زي مايقولون , طلعت من مكتبها بدون اي نقاش مع المديرة الفاضلة واطلب من السواق يرجع لي ياخذني لان لو تطير ما جلست عندها وبصراحة من اول ما قالت لي المجال حسيت برعب من المكان اللى انا جالسة فية ..

طبعا السواق لين مايرجع يحتاج ساعه الا ربع بالطريق ، قلت خلني اخذ خلفية عن شركتهم الفاضلة واشوف بنات بلدنا وش يسون وين يروحون وكيف يشتغلون ،، قلت لها طيب ممكن بس اليوم اخذ خلفية عن العمل الميداني (( طبعا استغل الوقت لين ما يوصل السواق )) قالت لي المديرة بابتسامة تفكر اني بجلس : روحي عند البنات وشوفي وين بيروحون اليوم ، وبدت تصرخ المديرة الفاضلة بصوت عالي : يا فــلانه عرفي نــوف بالعمل و وين بتروحون اليوم ؟؟ ” يا حبيبي وماتعرف اسمي بعد ” لفيت عليها بكل هدوء وقلت : أسمي مو نوف ؟؟؟ قالت المديرة : اي صح سارة  … أنا : !!!!!!!!!!!!!!!! لا اسمي نوف ولا سارة   حتى ماتعرف اسمي وش هذاااااا ….!!!!!!!

سئلت المديرة : وين بيروحون اليوم طيب ؟؟؟  ، قالت : ما ادري روحي لهم وسئليهم ..  (( عندها اكثر من فتاة سعودية المديرة ماتدري وين بيروحون !!!!!!!!!!! ))

انطلقت ياجماعه لمكتب البنات وسئلتهم بنات بروح معاكم وين بتروحون اليوم وكيف طبيعه العمل …؟؟

البنت : ماندري وين بنروح اليوم ؟؟

انا : طيب كيف ماتدري وين بتشتغلون ؟؟

البنت : بحالة هدوء وخجل و قالت (( طبيعة العمل نروح للمدارس والمستشفيات والمعاهد والشركات ونسوق !!! ))

انا : طيب حلو , واليوم وين بتروحون ومين بيروح لمدارس البنات او المعاهد ؟؟

قالت : ما ادري وين بنروح احنا ننقسم قروبات وكل قروب يطلع بسيارة الشركة وهي اللى تودينا الاماكن اللى ما رحنا لها ، بخصوص المدارس احنا خلاص شطبنا على كل المدارس واكثر المدارس تمنع دخول المسوقات ، والمستشفيات خلصنا منها , نروح  للشركات اللى مارحنا لها الباقية …

- شكرت البنت بعد حوار طويل وسئلت باقي البنات وقلت لهم انا اساسا جاية لوظيفة ثاني و وظيفة ميدانية مستحييييييييييييييييل اشتغل فيها فوق ما اهلي ما يرضون انا ما ابي ، و اخذت اغراضي وطلعت من مكتبهم بدون تفكير للعودة او الحزن او الندم ،، طلعت والوكيلة توزع عليهم ادوات التسويق وتناديهم وحده وحده وكانها توزع ( هروين) وتذكرت الفلم القديم ” امنا الغولة ” اللى فيه عمرو ذياب من بلية و لوزة

بس جلست 3 أيام وانا اعيد القصة لكل شخص يمر قدامي ، لدرجة ان امي قالت لي : يا اللللله يا ماما الحاجة خلتهم يشتغلون كذا و بنات صغار يطلعون من الشركة والمديرة ماتدري وين هم رايحين !!!

بصراحة مرة ضاق صدري على البنات وان في ناس تسوق بهذي الطريقة يروحون لشركات ومصانع وادارة الشركة مو دارية وين هم !!!!

طبعا نسيت اقولكم نقطة تخلوا فوق 20 بنت ولا وحده قالت لي بالعكس حلو العمل اجلسي جربي ، لان الصباح قبل لاتيجي المديرة كنت جالسة معاهم وسمعت البلاوي والقصص اللى تصير لهم والمواقف ….

لحد يقولي وين الاهل !!؟.. انا قلت نفس الشئ وين الاهل هذا دور الاهل ، اذا الاهل ماحصلوا وظيفة لبنتهم واهم شئ انها تشتغل فهذا بالنسبة لهم عادي جداً ، وفي اهل البنت مالها اي قيمة بالنسبة لهم ، وفي ناس الحاجة خلتهم يسمحون لها بهذا الشئ …

يمكن البعض يقولي مافيها شئ السعودية افتحت مجال الان للمرآة بشكل اوسع وخلها تشتغل [ اذا صح افتحت مجال للمرآة  لازم يكون شوية في حرص على بناتنا من قبل الشركة وخوف عليهم تتخيل انهم بناتها او خواتها !!!!!! ] ..

اعتقد التسويق الميداني انتهى في عصر الانترنت …

- قالت لي أمي اول ما رجعت البيت وتركت الوظيفة بدون تفكير ((من ترك شيئاً لله عوضه الله خيراً منه ))   ..  

Like

Unlike

بما اني العام الماضي كتبت عن اصنع مهارة هذي السنة راح اقولكم ان اصنع مهارة رجع من جديد

بدورات للفتيات وللشباب عديد من الدورات المميزة  …

الجدول :

للتحميل بشكل اوضح ( هنــا الرابط )

اتمنى لكم اجازة سعيدة ومفيدة ..

Like

Unlike

مع دخول الصيف  ولا يخفي على اي أحد درجة الحرارة الظهر في مدينة الدمام و جميع مناطق المملكة ، يمكن السنة درجة الحرارة تفوق الوصف لو تحط الدجاجة في الشمس يمكن تحترق مو بس تنطبخ ، مو بس دجاجة لو تحط خروف بداخل جدر كان انطبخ  ..

تخيل انك تركب السيارة الظهر تحصل السيارة حااااااارة وكانك داخل جدر يطبخ على نار عالية جداً ،، واكثر سكان السعودية حاطين عند ابواب البيوت ( مظلة ) تحمي السيارة من حرارة الشمس وبالحقيقة مافي شئ يحمي من حرارة الشمس بس تخفف الحرارة خصوصا ان كل منازل السعودية فيها اكثر من سيارة بالبيت الواحد و ( كراج ) البيت ما يكفي لكل السيارات و فكرة المظلات عند الباب كانت ممتازة جداً ..

الأسبوع الماضي نشوف البلدية الدمام تمشي وتكسر بالمظلات وتطيحها بالشارع بطريقة تحسسك وكان اعصار جاي او اسرائيل مقتحمة البلد لا سمح الله وبعيد الشر عنا  ،، المشكلة حجم المظلة كبير من مسافة مليون كيلو تشوف المظلة طايحة بنظر مألم وغير حضاري بصراحة ..

بالبداية لما شفت البيوت اللى حولينا افكر ان طاحت لان مو مركبة بشكل جيد و لما طلعت للشارع العام انصدم بان كل البيوت المظلات حقتهم مطيحينها لهم وباخين بالبخاخ الاحمر ( تم ازالتها من قبل بلدية الدمام ) !!!!!!! حلفوا بس  >> ولية بخاخ احمر الظاهر محد يكتب على جدران البيوت والاماكن العامة غير البلدية وظالمين الشباب المساكين

ماحصلتوا طريقة افضل لازالة المظلات ؟؟

طيب اذا عطيتوا انذار ومافي فايدة هل ممكن تكملون جميلكم وتجيبون سيارة تشيلها لان اصحاب البيت مو هم اللى كسروها وهم مو ملزومين يشيلونها اللى كسرها هو اللى يشيلها …

ولية تنشال المظلات من عند ابواب البيوت لهذي الدرجة خايفين على المنظر الطبيعي اللى في بلدنا يرحم والدينكم سفلتوا شوارعنا عدل و صبغوا الجدران من الكلام المكتوب فية وعدلوا لنا الشوارع وهالحفريات اللى كل يوم والثاني طالعين لنا بتحويلة بعدين تعالوا وقولوا شيلوا المظلات بامر من البلدية ،، يعني اليوم شالوا المظلات قالوا رصيف الحكومة بكرة بيقولون بيعوا سياراتكم لان ما يصير تمشي على رصيف الحكومة ( والجاي اعظم ) ..

لحد يفكر اني كاتبة البوست لان في قدام باب بيتنا مظلة والبلدية اكسرتها الحمدلله ان الموضوع تاجل ولم يتم تركيب مظلة قدام باب بيتنا  ،، بس شئ يحرق الدم لية يشيلونها هم مو شايفين الجو كيف حار و الناس تطبخ من حرارة الجو مو قادرين نتنفس من الحرارة حتى العصفور تحصلة ميت من الحر وطايح بالارض  ، يعني المظلات هذا اقل شئ الناس تحطة تحمي سياراتها من الحرارة ،، بدل ما البلدية تركب مظلات ببلاش بكل مكان مع هالحر جالسين يشيلون المظلات ..

انا ما عندي تعليق اكثر بس انا اقول ليه ما تشيلون سقف البيوت لان في بيوت سقفهم عليه ( القرميد الاحمر ) وشكله مشوة شوارع  …

تحياتي لمن يركب السيارة بعز الحر من غير ما يوقفها تحت الظل  ..

——————

سكان الدمام يتحدثون:-

- مدونة مجرد سؤال ..

Like

Unlike

الاغنية المصرية اللى تقول [ زحمة يا دنيا زحمة ، نروح هنا أو هنا زحمة ] كنت اعتقد ان هذي الاغنية حصرية للشعب المصري اللى يشتكي من زحمة الشوارع وازمة المواصلات ، وعرفت ليه تم اغنية هذي الاغنية بعد ماقرأت [كتاب التاكسي ، للكاتب المصري خالد الخميسي وكان يوصف شوارع مصر بطريقة رااائعه وكيف الزحمه فيها والوضع ، ومافي داعي اكتب الافلام المصرية تنقل لكم زحمه شوارع مصر أم الدنيا ]

دائماً تكرر أمي والى اليوم ” اننا راح يصير مصيرنا زي مصر ، وبنكون زي مصر “  لا انتقد الشعب المصري وسكان مصر ولكن نحس بمعناه الدول الحبيبة المجاورة ، الوضع صاير عندنا بالسعودية زحمه لا توصف والحوادث كل يوم والثاني تسمع شخص ميت بحادث سيارة وحالة الانهيار اللى يصيرون في أهله حتى لو ماتعرف الشخص يجيك حاله ضيقت صدر وكآبة والحل وبعدين ؟؟

كان بابا يتكلم عن دراسته في أمريكا ان كانوا كل 3 اشخاص او 4 اذا يشتغلون بنفس الشركة يروحون مع بعض بسيارة وحده   ( السبب الأول : تقليل زحمة الشوارع ، السبب الثاني : تقليل تلوث البيئة ، السبب الثالث والمهم : يصير في اماكن بمواقف السيارات ) ، واعتقد عن نفسي ان هالشئ يزيد ترابط الناس بعضها ببعض ..

للأسف الشديد كل يوم أطلع من المدرسة والشارع احس راح ينفجر من زحمة السيارات المتكدسة والشمس يا ساتر يارب ولا حياة لمن تنادي ولا تنظيم ولا احترام ولا شئ ، ونطلع على الشارع العام ويزداد الوضع سوووء لان الشباب يفحطون في عز القايلة و درجة الحرارة الحارة لو تحط غوزي كان طبخ وصار غداء من حرارة الشمس ..

لو كل المدارس توفر باصات كثيرة ومكيفة ومرتبة وكل البنات يوصلهم الباص [ كان قلت الزحمة في المدارس وتنظم الوضع ]  ، ولو المدرسين والمدرسات ايضاً لهم باصات خاصة بالعمل [ بليز مو الباصات الصفرة اللى عندنا طاقتها الشمس وصار لونها برتقالي بقدرت قادر ] يعني باصات محترمة زي هالباصات اللى نشوفها بالانترنت ولا شفنا زيها على ارض الواقع وتحمل من كل جهة مجموعه موظفين ويكون في ترتيب وتنسيق ويقل الزحمة والناس توصل بيتها بسكينة وهدوء وراحة بال ومزاجها ما يكون ( صفر ) واهم داخلين البيت حتى يحاولون يبتسمون مايقدرون من اللى نشوفة بالشارع …

للأسف الشديد الشعب السعودي شعب ( فشخرة )   والفشخرة تعني المظهر والبرستيج وتعني اللى تعني ، يهمهم كثير المظاهر والـ ××××× لدرجة ان مدير شركة يجي بسيارة خاصة يسوقها سائق خاص و ورى سيارة ثانية ( لية السيارة الثانية تمشي وراه تتوقعون ؟؟؟ ) لان داخلها [ البشت ] حقه !!!!!!!

كثير من المدارس بنات الطبقات الـ ×××××× كل أخت تيجي بسيارة لحالها علماً ان في اختين ( توائم ) كل وحده تيجي بسيارتها الخاصة وسائقها الخاص وخادمتها الخاصة ” الله يتمم عليهم النعمة ويزيدهم يارب ” بس وش يصير لو اركبوا هم الثنتين بسيارة وحده وقللوا من زحمة السيارات في المواقف ومن الانتظار ، لازم نفكر بعقلنا مو بعيونا نفكر ..

الوضع يزداد سووء كل يوم    ، والشوارع تزداد زحمة وكتمة ..

الشعب ( التويتري ) الكل ملاحظة معاناة اهل الرياض في كتابة [ الشارع زحمة ] و [ زحمه الدائري تجيب الهم ] ……………الخ من عبارات الزحمة والتعبير عن المأساة ، خلال زيارتي الشهور الماضية لمدينة الرياض اكثر من مرة بديت احس فيهم وبالزحمة اللى يقولون عنها وسواقة غير طبيعيه كنت اعتقد ان بس احنا الشعب الدمامي اللى نعاني من الزحمة وسوء شوارع صحيح شوارعنا سيييييييييييئة وماعليها غبار هالموضوع ومافي اثنين يختلفون على سوء الشوارع بس الزحمة بالرياض تفوق على الدمام ولو في جائزة ازحم شارع اعتقد بتفوز مدينة الرياض بلا نقاش ولا لجنة تحكيم ..

راح يزداد الوضع سوء حتى يمكن يوم من الايام تحصل جمبك بالاشارة حصان واقف لان زاد عدد الناس اللى يستخدمون ” الدباب ” واتركوا السيارات واعتقد ان الدباب حل سيئ لان الشوارع ما تساعد على سياقتها اتوقع ان افضل حق ( الجمــل ) لان يعيش بالصحراء ومتعود على الاتربة والمطبات الغريبة العجيبة ..

متى بننتهي من زحمة الشوارع ويتم التنظيم لازم شوي نرتقي ونعدل من وضعنا اذا بنظل على ما احنا عليه هذي مشكلة لان احنا في تزايد عدد سكاني و بالاخير كل واحد يمشي على رجلينه يمكن يوصل اسرع من السيارة او مافي مانع يسمحون سياقة المرآة للطيارة   ..

——

سأختم البوست بمقطع فيديو عمل علاء المكتوم صاحب مدونة ( مكتوم ) عمل اكثر من رائع ..

1 person likes this post.

Unlike

الرواتب في المدارس الاهلية دائماً قليلة وان كان في مدرسة اهليه تقدم رواتب جيده الا ان تعتبر ايضا قليلة مع وضع الزمن والحياة وكل شئ غالي ، في المدرسة اللى طبقت فيها لفترة بسيطة كان رواتب الموظفات بأختلاف الشهادات والخبرة والمهارات كلهم ( 1000 ريال سعودي ) ، في منتصف الترم الثاني زي ما انتم عارفين صارت اجازة الأسبوع للطلاب والمعلمين طبعاً الاجازة كانت من الحكومة و مو المدرسة اللى افرضت على الموظفات الغياب ولا الموظفات اللى طالبين الاجازة ولو كان في دوام كان الكل راح يحضر ، اللى صار يا جماعه ان المدرسة نقصت من رواتب المعلمات ( 200 ريال سعودي ) على هالاجازة اللى هي اسبوع أي 7 أيام وخلونا نقول 5 أيام لان الدوام من السبت الى الاربعاء مو من السبت الى الجمعه …

طبعاً المعلمات اسكتوا وامرهم لله و لاحوله ولا قوة الا بالله ، وانا لا تعليق على الموضوع وكانت في معلمة معصبة تقول : ( راتب الخدم اكثر من رواتبنا ولا بعد ياخذون راتب في الاجازة ) …

من فترة كنت في الكوافيرة و هذي الكوافيرة كثيرت الثرثرة وخصوصا قضاية و مواضيع ومشاكل الحياة الاجتماعية ماشاء الله عليها علماً ان الكوافيرة جنسيتها ( هندية ) بس لها فترة في السعودية وتجيد اللغة العربية بطلاقة وبراعة ومهارة واتقان وتستاهل شهاده شكر وتقدير :d

واسئلتني ايش اسوي الان وتوظفت او لا ؟؟

وجلست اسولف معاها ووصلنا الى المدرسة اللى كنت اتدرب فيها وقلت لها عن قصة الراتب وان اسحبوا 200 ريال من اجازة الاسبوع و كنت اسولف وانا اضحك ..

اسكتت الكوافيرة لدقائق واهي تسمعني بصمت بعدين قالت : لية ينقصون من رواتبكم مالهم حق لان هذي اجازة حكومة مو اجازة المدرسة غايبة بنفسها ..

قلت لها اي اعرف هالشئ بس ايش نسوي خلاص مشى الموضوع وانتهى ..

قالت الكوافيرة الحكيمة : اذا هم ينقصون رواتب المعلمات على اجازة اسبوع لازم ينقصون من رسوم الطالبات اللى يدفعونها للمدرسة …!!!!!!!!!!!!!!!!!!!!!!!! مو الأهالي يدفعون 12,000 ريال سعودي لعيالهم في السنة ؟؟ لية ما ينقصون من الرسوم حقت الطالبات نفس الشئ ، ولا هذا غير وهذا غير بعد .؟؟

- بكل صراحة يا جماعه كان ودي اركب فوق الكرسي و واقف واصفق لها بقووووووة واقولها برافوووووووا والله  ، ما جاء على بالي ولا 1% ان لية ما ينقصون من رسوم الطالبات وبس حاطين حيلهم على الموظفات ،، للأسف الشديد ان اسلوبهم وتعاملهم يخسرون طاقم رااااااائع ومبدع من المعلمات ..

كلامها كان على العين وعلى الرأس بس ما كان عندي رد لانها سكتتني وكان ودي اخذها و اوديها لين المدرسة تتفاهم مع الطاقم الاداري

اصحاب المدارس الاهليه : عندما تخصم من راتب المعلم لسبب تافه ولأجازات تفرضها الدولة اتمنى ايضاً الخصم من رسوم دخل الطلاب وطالبات المدارس ، اذا قدرتوا على خصم الرسوم في هذا الوقت احنا ماعندنا اي مانع من خصم رواتبنا ..

كثير هي من مجالات العمل اعتقد اننا نشوف الظلم ومع هذا نسكت !! ليه نسكت ما ادري ؟.

يمكن اكون جديده في مجال العمل الوظيفي ولكن في قانون او بالعقد مكتوب ان يخصم من الرواتب اثناء الاجازات الحكومية وهل هذا سبب مقتنع ؟

2 people like this post.

Unlike

طلبت مني احد قريباتي في جامعه  الدمام  (جامعة الملك فيصل سابقاً ) الحضور الى الجامعة وتغطية فعالية [ اسبوع الشجرة ] ، الجامعات نادر مايكون عندهم نشاطات يستحق الذكر او تدخل السرور واذا صار في نشاط يكون شئ قديم وتقليدي وما يشاركون في دكاترة الجامعه فقط الطالبات و وحده او ثنتين من دكاترتهم ، رحت من الصباح و وديت كاميرتي وكان مرة حماس   ..

لما وصلت توقعت احصل عدد قليل وبسيط جداً من البنات الى متفاعلين في اسبوع الشجرة ،  تفاجاة بالعدد الرائع من الفتيات اللى كان عندهم حماس و كل قسم يزرع شجرة وبعدين انطلقوا لزراعة الاشجار  ..

فعالية بسيطة جداً يمكن تحس فيها وانت تقرأ البوست  و لكن لو فكرنا ان مثل هذا النشاط يكسر الروتين اليومي لطالبات الجامعه والدكاترة ويقرب الطالبة من دكتورتها ويقرب بنات الاقسام الثانية من بعض راح تحس ان الموضوع اكبر من انه نشاط بسيط ..

في كل مكان في الحياة وان كنت موظف بحاجة لشئ يكسر الروتين اليومي لو مرة كل 6 شهور ويكون في بعض الاحيان وجبة غداء جماعية ،، بعض مدرسات المدارس يحددون يوم بين فترة والثانية وكل وحده تجيب طبق هي مسويته ويتغدون مع بعض في المدرسة منها يجلسون يسولفون وبنفس الوقت كل وحده تذوق طبخه الثانية و بنفس الوقت يكون اليوم غير عن كل الايام الى دخول الى باب المدرسة وشرح الحصص ومغادرة الباب ..

صور من حماس البنات في أول يوم من اسبوع الشجرة :

الصورة بنات الطب كاتبية (.Dr) ...

- الصورة كثيرة ممكن لو تحبون تشوفونها  (  هنـاك )  ..

::

مثل هالفعالية ممكن يسونها لبنات المرحلة الابتدائية وكل فصل يهتم بشجرته ويسقيها طول السنة ، او حتى لو كانت نبته بسيطة و كل سنة يهتمون فيها المرحلة اللى بعدها  ..

بإستثناء الشجرة و اسبوع الشجرة و اسبوع المرور واسبوع الماء ، برنامج خواطر لرمضان العام الماضي 2009م ، في مدارس كثيرة بدوا يطبقون بعض حلقات احمد الشقيري مثل حلقة ( النظافة ) وكيف اليابان مدارسهم يهتمون بالنظافة واعتقد انها فعالية حلوة لو يصير اسبوع النظافة وينطلق الفعالية بتجميع الفتيات في مسرح المدرسة وعرض الفيديو لأحمد الشقيري حق اي حلقة من الحلقات وبعدين كل فصل يهتم بالنظافة بطريقته الخاصة .. ( والافكار كثيرة جداً ، بس بحاجة لتنفيذ وانطلاق وتغير افكار ابنائنا + اعطائهم حجم بالمسؤولية + نكتشف افكارهم ومواهبهم ونعزز الثقة فيهم بشكل اكبر واكثر ) …

واذا المدرسين والطلاب و أولياء الامور ماعندهم افكارهم ممكن ناخذ افكار من الغرب و تكون اجابية ونطبقها بمدارسنا ترى انشطة المدارس عندنا قديمة وتتكرر كل سنة وبكل المدارس نحاول نتميز بشئ جديد وبنفس الوقت مفيد ..

- ترى التعليم مو بس نيجي كل يوم المدرسة ونحفظ الدرس ومعلومة قديمة لا تخدمنا في حياتنا ، ونرجع البيت ونحل الواجب ونحفظ الدرس ويهزئنا المدرس  ونرجع اليوم الثاني ونعيد نفس الروتييييييين ، ويقولون المدارس ماتربي والمدارس ماتعلم .. ترى النشاطات المدرسية يمكن تعلم وتربي وتوعي الطالب وتخلية يكتشف نفسة اكثر من الحصص والدروس والاختبارات ..

- الله يرحم مدارسنا وتعليمنا بس  …. نقرأ الفاتحة على روح التعليم الميت …

Like

Unlike

- الصورة من عدسة ( Ruba )بالفلكر..

رحلة البحث عن وظيفة تبدأ من ” المدارس الاهلية ” وتنتهي بالجلسة بالبيت ، ولكن بفضل الله تيسر لي احد المدارس وتم تعيني فيها في احد مجالات العمل الوظيفي علماً ان طلبوا مني العمل لمدة مايقارب الشهر [ من دون راتب ] قالت فترة تدريبية تدربين عندنا لمدة شهر واذا حسينا انك تنفعين للعمل راح يتم تعينك السنة الجاية .. (( الله يحينا يا جماعه حياة طيبة يارب )) ..

بما اني جالسة بالبيت ، وفترة الصباح ما عندي شئ يستحق الذكر يوم انترنت ويوم كتاب ويوم اصير ” بيبي ستر “، ليه ما اداوم فترة تدريبية ..

بديت أول يوم الدوام استغفر الله العظيم المدرسات يجيبون الاحباط للواحد لدرجة كنت بتهور وبتركهم من أول اسبوع ، و نهاية الاسبوع الاول اكتشفت ان مافي خطة امشي عليها جالسة اشتغل على كيفي ولا في شئ اسمة تدريب كل خرابيط × خرابيط ، ولا في احد يتابع عملي  .. وجالسين يرمون على شغلهم وهم يسولفون ويوسعون صدرهم ، ولحد الان وانا ساكته ،   الشغل اللى انا اسوية لاني متدربة يطلبون مني دبل بس الموظفة اللى عندهم تسوي ربعه ، قلت والله ما سوية لان الموظفة انا امس كنت معاها وشفتها كيف تشتغل لية لما جاء على انا اسوية كامل والشغلة ما تستدعي هذا الشئ كلة ..

طبعاً بعد تخرجي عدت سنوات طابور الصباح كان شئ مضحك بالنسبة لي وخصوصا اني صرت مع فئت المعلمات وليس الطالبات وانا اطالع اشكال البنات والشئ الممتع اكثر وقت التفتيش ، كنت اردد بقلبي ( الله يرحم ايام الدراسة ولوعت الكبد ) ..

نرجع لفترة التخريب اقصد ” التدريب ” 1- اعتقد ان فترة التدريب للموظف يكون في خطة للموظف يتدرب عليها

2- المفروض دامة شهر كامل يشتغل ويسوي لكم شغلكم اقل شئ تعطونة نص الراتب يكفي انه جاي من صباح الله ويطلع بعز الظهرية وفي القايلة ..

3- اعتقد من حقي اني اخذ شهادة او ورقة او قرطاس فية توقيع من المدرسة واني متدربة عندهم لمدة شهر وان كانت الورقة لا تعني شئ للأخرين على الاقل تعني لي شئ واحس بتقدير لنفسي مو كذا اجي واطلع انا واللوحة القوانين اللى معلقة على الباب واحد* ..

هل في بند ينص على السماح للمدارس الاهلية ان تخلي المتدرب يتدرب لمدة شهر او ترم كامل من غير ولا راتب ولا حتى ورقة تثبت بالتدريب ؟؟

- لحد يقولي كان طلبتي منهم ورقة تدريب ، طبعاً ما سكت وقلت لهم ابي ورقة تدريب قالت لي : يا حبيبتي احنا هنا ندربك لمدرستنا مانقدر نعطيك ورقة تدريب ؟؟ >> طبعاً سكت ما قدرت ارد بس بكتب لكم اللى كان ودي اقولها في وجهه .

يا عزيزتي : اتدرب لمدرستكم هذي خبرة اكتسبها ممكن اروح اشتغلها في اي مدرسة ، وايش الشئ اللى بتدربيني لمدرستكم ما اقدر اشتغل واتعلمة لمدارس ثانية ، اي شئ اتعلمة في الحياة وحتى لو في بيتنا اي مكان اقدر اروح استفيد منه ، علماً الشئ اللى مسكته لي والمهما اللى كفلتني فيها اي احد يقدر يقوم فيها ويتعلمها في مدة لا تزيد عن أسبوع ( انا اقولكم يومين وتعلمت وخلاص ما يحتاج اكثر ) ..

المدارس الثانية اكتشفت ان طريقتهم للتدريب يكون بوم واحد يتم تدريب المتدرب واذا حسوا انه يتجاوب معاهم ( مو تعلم الشغلة بس تجاوب معاهم وعنده القدرة على التعلم ) يتم توظيفة على طول ، و سئلت احد قريباتي في مدرسة ثانية قالت لي ان هم يخلون المدرس يجي يعطي درس ويحضرون لة الطاقم الاداري وبعدين يتم توقيع عقد معاه لمدة سنة وفي العقد في شرط ان المديرة لها احقية خلال ثلاث شهور لو حست ان المدرسة ما تصلح للعمل ممكن يتم فصلها وعلماً انها تستلم راتبها كامل …

- كان هناك محور حديث مع احد قريباتي وقلت لها شهر كامل اكرف واشتغل من غير راتب وقلت ” معلية تحملي يا بنت الحلال ” بس حتى ورقة تدريب مافي ليييييه ؟؟

= قالت لي اعتبريها عمل تطوعي انتي تشتغلين اعمال تطوعية !!!!!!!!!! (( بس أنا ولا مرة اشتغلنا عمل تطوعي لمدة شهر ويومياً الدوام ولا بعد فوق الـ 6 ساعات متواصلة ولا بعد تقوم من صباح الله خير .. وعمل تطوعي واحد اشتغلنا فية لمدة شهر كان أول شئ مشت لنا مكافئة وفوق هذا كللللللللللله كان ممتع لدرجة ما ودنا نرجع البيت من الوناسة ، هذولي مافي ولا ربع وناسة حتى النوم مايطير من عيني واحس اروح وانا مجبورة ما اروح و انا مستمتعه )) .. ومعلية في فرق بين الوظيفة وبين الاعمال التطوعية [ اذا تبغون راح اشرح لكم ماعندكم مشكلة ]

::

طبعاً صار لي كم موقف ومن بين المواقف.. ان مافي خطة يمشون عليها  للشخص اللى يتدرب عندهم صرت اتمشى بالمدرسة واكتشف الاماكن لحالي واخذ الشغل من عند كم وحده احسها انها تستحق الواحد يساعدها وبنفس الوقت اكتشف ايش يسون وعندهم سالفة او لا ؟؟

Read more…

3 people like this post.

Unlike