مدونة اللتان

في الويك الي فات فجئه وانا امشي صقعت بالجدار التفت وقلت معليش سوري !!!

انتبتهت بعدها اقول سوري لمين

وقعدت اضحك على نفسي وفكرت بجد ليه ما اقول لجسمي انا اسفه اني ضربتك !!

ليه ما نقول لأنفسنا اسف

بجد اجسادنا وانفسنا اولى من اي احد اخر نتأسف له

…

فا قررت اوجه اسف لجسمي ونفسي المسكينه

يا نفسي يا أنا …

اانا اعتذر واتأسف ان تعبتك معي وارهقتك لتحقيق ما ااريد دون ان افكر فيك

عندما ادفر و  لا ارحمك ولا ارحم عيني ولا عقلي

اعتذر عندما أأكل ولا انتبه لك يا معدتي

اعتذر يا عقلي عندما افكر في موضوع التفكير فيه مراح يحل شي سوا ارهاقك

.. اسفه يا أنا انني احبك

كاتبة البوست : سمنتومة

ما اعرف لية صرت اكرة الحنه على اني كنت احبها وانا صغيرة ، الان مستحيل اقدر استحمل في يدي نقش حنة ولا اقدر اشم ريحة الحنه

المشكلة ان عندي بنات خالي وكلنا في نفس العمر وكان ليلة العيد من اهم طقوس العيد هي الحنه واذا جاء العيد وما تحنينا يا اهي مشكلة الامة العربية والله يعين امهاتنا علينا ..

في احد الاجتماعات وبطلع مع صديقاتي اتصلت على وحده من البنات قبلها بيوم تقولي : مضيعه تعرفين رقم حناية؟؟

انا وش : حناااااية حنننننننة !!!!  :really:  لا يختي انا خلقة ما احب الحنة من وين اجيب لك رقم حناية بسئلك صديقاتي اذا احد يعرف بدبر لك رقم ..

اليوم الثاني وهو كان يوم الاجتماع جات الاخت الفاضلة وبيدها نقش حنة ماشاء الله جميل لكن الكارثة يا جماعه الخير ان الحنة ما جفت وجلست الاخت وعليها قفازاتها لتفادي الفشلة قدام الناس وعلى شان ماتطلع الريحة ،، وصلت انا لمقر الاجتماع الا احصلها جاية وتضحك ميته ضحك وانا محذرتها بالجوال انها تغسل يدها وتيجي او لا تيجي من الاساسا

ما ضحكت ولا علقت في نفس الوقت لان كان داير راسي بس اليوم الثاني الى ماله نهاية وانا ماعندي سالفة الا سالفة الحنه حقتها مابقى بنت بمسن ماقلت لهم السالفة

كل ما اقول حق وحده من البنات كلهم نفس ردت الفعل يصرخووووون من الصدمة

ماعلينا من هالسالفة في احد الاعياد احد خالاتي فرحانه ببنتها الصغيرة اللى مايزيد عمرها عن 3 سنوات ومن الفرحة حاطة بيد بنتها حنه ، جلسنا نضحك احنا البنات وهل العيد لا يكمل الا بوجود الحنه ؟؟

طبعاً محد كان يشيل بنت خالتي كثير لان ريحة الحنة ما نحبها ولكن نلاعبها من بعيد وطلبنا من خالاتي لا عاد تحني بنتها >>

لية الحنة مرتبطة بالمناسبات ؟؟

تقول وحده من صديقاتي ان قريبتها حاطة حنة البنات في المدرسة اجلسوا يباركون لها ويسئلونها ايش عندها مناسبة ؟ صارت ظاهرة واضحة ان اي وحده تحط بيدها حنه يعني عندها مناسبة

طيب لية ما يتحنون من غير المناسبات ؟؟

في حفل خطوبة اخوي ضايع امي وخواتي كلهم تحنوا بصراحة ولا فكرة اني احط نقطة من الحنه ، اليوم الثاني واحنا في الكوفيرة وانواع الاستعدادات وأمي كل ما مريت جمبها تقول لي شوفي وش حلوهم كلهم حاطين حنه الا انتي شوفي بنات خالاتك فلانه وفلانه ………الخ المهم من الظهر الى العصر وامي تعيد نفس الكلام وتلومني لية ماتحنيتي مو فرحانه حق اخوك [ يعني لازم اعبر عن فرحتي واحط حنه في يوم واحد وابتلش بيدي لمدة شهر كامل ] ،، المهم بالصدفة جات الحناية للكوفيرة تعدل حنه وحده من البنات قلت لها عندك حنه سودة ” لانها تطير اسرع ومافيها ريحة ” قالت ان عندها خليتها تحط لي في يد وحده ومن فوق اليد مو داخل على شان بسرعه يطير مع الغسيل ( وبطريقة خنفشارية رفعت يد وحده حق امي وقلت لها كذا زين ماما ، قالت امي اي وش حلووووووك الحين احلى ) يعني بدون حنه كنت شينة ولما تحنين صرت حلوة وش هالخرابيط بس ، اليوم الثاني بعد ما انتهت الحفلة انتبهت امي لي اني بس يد وحده اللى حاطة فيها ولا كلفني حتى 20 ريال :haha:

وليه يعني الحنه الكثيرة تدل على انك من اهل العرس ؟؟؟

طيب لو كنتي عروس ومش متحنية يعني ماتدل على الفرحة ؟؟ >> ايش الخرابيط هذي بس  [ احد صديقاتي قالت لنا بنات لما تتزوجون لحد يحط حنه لما تسافرون شهر العسل تتوهقون بيدكم والكل يعرف انج عروس ] وهل فقط العروس اللى تتحنى ؟؟

ولية الوحده لما تتحنى يقولون لها عليج بالعافية ؟؟

* انا بعلمكم طريقة توخر الحنه عندي بنت خال تموت على شئ اسمة حنه تقول انها قبل لا يبدأ الدوام تطير الحنة بفرشاة الاسنان مع روب وقيل زبادي وتجلس تفركة وبعدين يطير ، بس انا بقولكم شغلة فرشاة الاسنان والمعجون تطير الحنه و اذا ما طارت معاك هالله هالله بالصنفرة يا بنات :up2:

-  قبل الختام :

في المعهد اتذكر وحده من البنات جاية حاطة حنه لين فوق كوعها قلت لها مبروك  تزوجتي ؟؟ >> والله ما اعرف البنت ولا شئ و اول محاضرة كانت لي معاها بس من باب قط الميانة ، اضحكت البنت وقال : لاااوووء انا ملكت انمبارااااااح  >> اترجم لكم ( لا ما تزوجت بس أمس كانت ملكتها) ،، قلت لها ماشاء الله تجنن الحنه >> ما احب الحنه ولا هم يحزنون بس من باب المجاملة …

- ولية ماتعلقون على الموضوع على يدينكم نقش الحنه

اكيد كلكم مريتوا بفترة من غير انترنت والحياة تتغير معاك بشكل غريب ممكن في البداية تكون حلوة بس المدة لما تطول تصير ممللة وصعبة ومتعبة …

مشكلتنا هذي المرة اعزائي الزوار مع الانترنت كانت مع بداية شهر رمضان كان حلو رمضان من غير انترنت على شان تجلس تتعبد بس رمضان السنة كان مليئ بالاحداث حتى ما قدرت اكمل ختمتي الثانية للأسف الشديد ولكن الحمدلله ع كل حال …

بدينا بمعركة مع شركة الاتصالات وشوي هندي جاي يصلح وشوية واحد من الموظفين الاتصالات وشوية مضيع قالب الاسلاك ويبحث عن المشكلة في قاع البحار وكان الحل هو الاستسلام ..

بفضل من الله والحمدلله ان خواتي متزوجات وتم اخذ مودم زوج اختي الله يجزاه الف خير بوعبدالرحمن ماقصر وحل والله مشكلة كبير وشوية صار الوضع تمام ،،، وبعشر الأوخر وجاء المودم الثاني حق زوج اختي ضايعه الله يجزاه مليون الف خير وحل مشكلة اكبر واكبروصار في مودمين وليس واحد …

المودمات ارجعت حق اصحابها واشتغل الدي اس ال المزيون تبع بيتنا بس المشكلة كانت مختلفة انه مايشبك الا على جهاز مضيع ولا ودي ياجماعه اسيئ الظن في اخوي او احط في ذمتي وذمتكم اتوقع ان مضيع حايس بالاعدادات ومخلية حصري بس على جهازة وانا المسكينة الفقيرة متوهقة من غير انترنت ..

رجعت للحياة القديمة اطق باب غرفة مضيع وادخل واستخدم جهازة بس والللللللللللله انه وضع متعب معقولة بسجل دخول في كل حسباتي على شان اشيك واشوف بعض الاشياء وش هالتعب ..

افتح فقط الاشياء المهما ، والرسايل متراكمة في بريدي واذا قريتها مايمديني ارد عليها 

- في السابق كنت عايش من غير انترنت لية الان ما نقدر نعيش من غيرة وش اللى تغير في الحياة ،، بس عن نفسي احس صار عندي تبلد احساس انه يمر يوم كامل من غير انترنت لاني احاول ابتعد عنه بعض الشئ  على شان يمديني انجز ما اريد انجازة ، ولكن ما اريد انجازة ايضاً مرتبط مع الانترنت …

وعلى شان اكتب عن الحياة من غير انترنت لازم انترنت على شان اقولكم كيف هي الحياة

ليه مانشبك النت باسطوانة الغاز ??? :uh:

وانا اجمع ايميلات البنات وكان امامي عدد هائل من الايميلات في الصفحة الواحدة فما بالكم بالصفحات الثانية

وفجاءة احصل ايميل وحده من البنات

caw.for.ever@ xxxxxxx .com

معناته [ بقــرة إلى الإبد ] …!!!!

علامات استفهامات وتعجب كانت مرسومة على وجهي وبعدين انفجرت من الضحك وسكرت الجهاز ..

وكنت اسئل نفسي :- هل هي صحيح راح تظل بقرة لمدى الحياة ؟؟؟؟

احياناً تعتقد انه من باب التسلية ولا تتوقع انه راح يكون هذا اسمها الى يناديها فيه الملايين من البشر بعد سنوات ..

هل هناك ناس ” بقر” غير هالبقرة ؟؟

وكل ما اتذكر الايميل اقول صج انها بقرة اللى سوت هالايميل كيف تسمح لنفسها الناس تناديها ( بقرة للأبد ) ..

- ملاحظة / لم يكتب الايميل بهذي االطريقة ولكن لا استطيع ان اكتبة كما هو لان من الصعب ان انشير ايميل اي انسانه في الحياة ولكن نفس المعنى ..

::

الصورة الاولى من الفلكر ( yasssaf )

الصورة الثانية من الفلكر ( ЯФн ĂŁĂĶŘĂҒ )

الحياة القرف بنظري هي الحياة اللى الشخص قالب ( ليلة نهار و نهارة  ليل )على قلت سنع ..

هذي اسميها بالحياة القرف ، لو يوم واحد اقلب ليلي نهار ونهاري ليل راح اسمية [ يوم مقرف ] ..

اذا كنت من هذي الفئة فانت حياتك [ قرف ] وستظل وتبقى [ قرف ] ..

كل البنات اسئلهم وينكم مختفين بالعطلة يطلع ان حياتهم ليل نهار وقالبين اوقاتهم، ما ادري كيف يستحملون ..

صحيح انام عند اذان الفجر هذي الايام الا اني قبل الساعه 11 اكون صاحية حتى لو كان النوم يقتلني ، لو اقوم الساعه 10 ونص الصباح احس ان العطلة انتهت واليوم كلة راح على وضاااااااااع ..

لو بجلس انام كان ما بصحى الا يوم القيامة ، لان النوم يجر النوم وايش المقولة البايخه اللى يرددونها البنات “ يا زين العطلة والنوم ” كلام فاضي وخرابيط ،، صحيح هو يازين النوم بس كثرت النوم يخرب [ مزاج ] الواحد ..

يختي معقولة طول العطلة ماعندك هدف واحد ؟؟

معقولة ما عندك شئ تسوينة ؟؟

معقولة ماحصلتي مركز او اي شئ تنظمين لة ؟؟؟

مستحييييييييييل مافي ..

احس في شغلات كثيرة ممكن تتعلمينها بالصيف وتستفيدين منها وتكتسبينها احسن من جلستك بالبيت ونوم وأكل  وزي ما يقولون [ أكل ومرعى وقلت صنعه ] …

لو جلسنا نفكر انك طول النهار نايمة وصحيتي على اذان العصر ،، ووقت العصر تبغين تشوفين اساسا نفسك واذا امداك الوقت وفجاءة يجي الليل ومجرد مايدخل الليل اعتبري اليوم انتهى ، وين تبغين تروحين بالليل وايش تبغين تسوين ..

بس خلونا نقول لو صحيتي من بدري الصباح وشفتي امورك بالبيت ، والعصر ريحتي فية والليل ممكن تنجزين شغلك اللى حابة تنجزية بداخل البيت وتكملي الباقي ونامي بدري واصحي بدري وكملي حياتك بطريقة طبيعيه وجمــــــيلة ..

والله ثم والله من خلال تجربتي طول حياتي حلات العطلة ( الصبــــــــاح ) اذا ماصحيتي الصباح وقت العطلة انتي ماتحسين بالعطلة ..

سوي لك كوب كافي مع سندويش توست يا سلااااام على الصباح اللى زي كذا

ولا احلى من الصباح لما يكون كوب شاي مع بانكيك ( هذا صباحي المفضل )

يقولون ان العطلة خلصت بسرعه وماحسينا فية ( صحيح الايام تمر بسرعه ) بس مو معناته ان الايام تمر بسرعه وانت ما امداك تنجزين شئ ، اكيد ما انجزتي شئ دامك نايمة يختي طول اليوم ..

غيرتي حياتك ، و نامي الليل واصحي الصباح

~{  كلماتي بالبوست غير مرتبة لاني مرة معصبة ادور وحده من البنات وقابلة حياتها الى قرف ولما حاولت احصلها انتهت الشغلة  …

احذري حياة القرف ..

في كل سنة وقبل دخول شهر رمضان بايام قليلة ، نسمع خبر وفات الكثير الكثير من الناس ..

من بداية الاسبوع الماضي واللى قبلة والى اليوم وانا بس اسمع فلان مات وفلانه ماتت وبنت فلان مات وولد فلان مات ..

شئ مـــــــؤلم ومحزن ..

صحيح رمضان فرصة والواحد مايدري هل راح يعيش لين رمضان هذا العام او لين رمضان السنة اللى بعده والى بعده ..

الله يصبر كل من فقد له غالي وعزيز قبل هذا الشهـــــر

الله يرحمهم ويغفر لهم ويدخلهم فسيح جناته …

اللهم بلغنا رمضان ، وإعنا على صيامه وقيامه ، وأرزقنا قيام ليلة القدر إيمانا ..

سئلت الملايين ، وماقصروا والله معاي كل شخص عنده خبرة اعطاني من خبرته ولكن الى اليوم مو قادرة اقتنع بشئ ..

راح اشتري كاميرا احترافية ..

هل اشتري canon أو Nikon

وبإيش تنصحوني ؟؟

ياليت تكتبون لي الفرق بين كانون ونيكون ؟؟

وهل راح اندم لو أخذت canon D500  ؟؟

ايش يميز نيكون عن كانون واشوف كل الناس تاخذ نيكون وهذا السبب اللى مخليني احتار ؟؟

- اتمنى افادتي ولو بالقليل ..

———————

تحديث :

اشكركم جميعاً على نصائحكم و تعليقاتكم ،، لاني اشتريت كاميرا canon  والحمدلله

=)

اكرر شكري لكل من ساعدني عن طريق المدونة او التلفون او المسن او بالجوال ..

كنت من زمان  اقول حق اهلي لية بس انا الوحيده في البيت مش توئم احتاج توئم معاي ،، او استنسخ نفسي [ نسخه ثانية مني ]

كانوا يقولون لي : اعوذ بالله انتي وحده يلله متحملينك بعد وحده ثانية ..

>>

ماكان عندي هدف ان يكون في نسخه ثانية مني كان مجرد كلام لا اكثر ولا اقل واعتقد من الاسباب اني ايام الدراسة كان الهدف اني ما اروح المدرسة ان اخلي [ نسختي ] تروح بالنيابة عني لما يكون مالي خلق اداوم

لكن الان اختلف الوضع ….

من فترة وانا احس ودي اقطع عمري 10 قطع وكل قطعه تسوي شغلة لان في اشياء تصير فوق طاقتي واحيانا في اشياء اتمنى اسويها لكن ما يمديني ابداً ..

بحثت عن فتاة بالحياة تكون نفس تفكيري ونفس اهتماماتي وكانها انا [ ولم أجد ولن أجد ] ..!!

تطلب مني امي اشياء كثير وانا ابغى اسوي شغلة ثانية اتمنى اقطع نفسي قطعتين واخلص الشغلتين ،، واحيانا اتمنى اطلع اغير جو و ابغى اجلس بالبيت اكمل شغل وودي احد ينجز بعض الشغلات اللى في بالي وودي انام لاني حارمة نفسي من النوم بشكل كبير والسبب الانجازات اللى ابي انجزها..

[ بديت اقرأ كتب لتنظيم الوقت واطلع على بعض المواقع رسمت جدول حطيت نوت على المراية حاولت اكتب الاشياء الاولويات اللى لازم انجزها ]

بدون اي فايده ….!!

ما اخفي عليكم استفدت من الورق اللى يتعلق على المراية بشكل كبير اقدر اقولكم بنسبة 80% (( نسبة ممتازة جداً )) ، ولا تتخيلون السعاده لما ارمي الورقة في ” الزبالة ” اكرمكم الله , واللى مكتوب فيها كلة تم انجازة بنجاح ..

في بعض الاحيان وخصوصا هالفترة احتاج نسخه ثانية مني او 5 نسخ على الاقل [ لان هنا الكثير من الاشياء ابغى انجزها واتمنى انجزها وخاطري وودي انجزها ] ..

احيانا تطلب مني احد خواتي اني اروح معاها مشوار وانا من 7 ونص في المعهد لحد الساعه 4 العصر مو معقولة برجع البيت اتغداء واطلع من جديد وخصوصا ان عندي اشغال ابي اسويها بالبيت ولازم انجزها ،، واحيانا ارجع البيت واحصل امي تطلب شغلات تبغاني اطلع معاها او اسويها احس ودي اصيح وبعض الاحيان اخليها لين يوم الخميس ، الى اليوم والى بكرة واللى بعدة احد احلامي يراودني واتمنى تحقيقية ولم استطيع تحقيقة لان شغلات جديده تطلع عندي تمنعني من اني اكمل هذا الحلم ..

عندي افكار كثير وعندي شغلات بسيطة ابغى انزلها في المدونة ماتصدقون ان [ برنت سكرين ] يحتاج لوقت من عندي على شان ارتب وانزل واسوي والى الان لم اكتب اي موضوع في المدونة من المواضيع اللى ابغى انزلها ..

انقطعت عن الماسنجر الفترة الاخيرة بشكل كبير والسبب لا اجد اي شئ من الوقت للدخول الماسنجر [ افتقدت الكثير الكثير الكثير من البنات واشتقت لهم ولا املك الوقت للحديث مع اي احد ، وافتقدت تواصلي مع ناس يهموني بحياتي ] ..

من احب الاشياء الى قلبي [ الريدر ] لي فترة طويلة انقطعت عن الريدر ودخولي متقطع، ولما ادخل ما اقدر اكمل الباقي ، ولما جلست عليه يوم كامل اشوف اخبار العالم انصدم بشغلات كثير فاتتني ووصلت متأخر ..

في بعض الاعمال اتمنى انجزها لحالي لاني احس ما بوصل الفكرة للاشخاص اللى قدامي واحس مابينجزون اللى انا ابغى انجزة ..في ملتقى التدخين للسيدات بعد ماوزعت 26 بنت في القاعة كلها وكان في بنات زيادة مع هذا احس اني ابغى اكون في المسرح وابغى اوقف بالركن وابغى اكون في الدور الثاني مع بنات في غرفة التحكم ، واللى صار اني ماجلست ولا دقيقة غير اوقف دقايق بالركن ودقايق في المسرح وبعض من الدقايق في غرفة الكنترول وهاكذا ادور على شان يبرد قلبي واحس ان كل الوضع اللى حولي تمام  ،، [ لهذا السبب ابغى نسخه مني ] ..

- في بعض الاحيان احرم نفسي من النوم مقابل اني اخلص بعض الشغلات ولما يجي وقت النوم انصدم ان هناك من يطلب مني بعض الطلبات وبدون نقاش اسويها ، احيانا يكون في عمل تافة يطلبونة مني وانا اتمنى انى انام هالنص ساعه بدل هالطلب البايخ [ احتاج وبقوة نسخه ثانية مني ]

- اتصلت على احد صديقاتي من فترة وقالت لي مضيعه احتاج بنت تسوق لي لشغلة قالتها لي ، جلست افكر بالبنات اللى عندي افتح ايميلي ادور بجوالي واعرف الشغلة اللى اهي تبغاها مافي بنت وانا اقدر اسويها لها بس انا مشغولة ولا اقدر اضغط على نفسي واعتذرت منها وسويت لها تسويق عبر الانترنت بشكل سريع وبسيط ، اطلبت شغلة ثانية ونفس الشئ اقدر اسويها لها بس انا مرتبطة بشغل ثاني ولم اجد لها فتاة لاني اللى حصلتهم كانوا مسافرين والبعض مشغول [ احتاج نسخة ثانية مني ]

- هل فكرة بنفس فكرتي ان يكون منك نسخه ثانية ، وهل تحس لو كان في نسخه ثانية راح تقدم الكثير في الحياة …

* شكراً ندووو على الصورة

تم كتابة التدوينة في :-  19 / مايو / 2009 م

بعد الخبيصة اللى سويتها في مدونتي ( يعطيني الف عافية يارب ) ،، جلست احوس اكثر ولم اجد اي حل للمدونة ..

وتوهقت ما ادري وش اسوي في مدونتي :angr:  لدرجة فكرة ارجع الى الورد برس المجاني من كثر ما طفشت ..

::

اشكر المدونة ( Menox ) لتقديمها المساعده لي ..

ماقصرت والله تعبتها معاي :luv: ولا بعد كانها مسوية شئ حلو بالمدونة :shy2: ..

الله يجزاك الف خير إن شاء الله ..

وهاكذا سيداتي وسادتي تعود نشرتنا الاخبارية مع حر الصيف والعج ..

:flower:

في منتدى وجهة قامت المشرفة ( الجوري ) بوضع موضوع وهو مجموعه من الاسئلة كل بنت تعطية امها وتجاوب امها على الاسئلة وكان الهدف هو ان الامهات يشاركون بناتهم في المنتدى والمكان اللى يحبونة ..

طبعاً توقعت من عاشر المستحيلات ان امي تشارك بس بعد ما صاروا البنات ينزلون ردود امهاتهم الا انا امي مستحيل بتجاوب على الاسئلة اتفاجئ ان مضيع شاف الموضوع بالمنتدى وطلب من أمي الفجر انها تجاوب على الاسئلة واني انزل مشاركة امي زي باقي البنات ، ماتتخيلون سعادتي وكان في مجلس امهات في المدرسة وامي جاية >> علماً ان امي كانت نادر ماتيجي لمجلس الامهات لي بالمدرسة كانت تحضر اكثر شئ اختي ام عبدالرحمن الله يجزاها الف خير ..

وانا اقلب مواضيع المنتدى شفت الموضوع وقلت خلني انزل نسخه من الرد في مدونتي ليظل مدى الحياة ناقوس يدق في عالم النسيان >> برااا مضيعه ..

اجمل مافي الموضوع ان في بعض الامهات اللى يدخلون للمنتديات سجلوا بعضويات و اجابوا على الاسئلة والبعض منهم تفاجاءة بوجودهم من بيننا في المنتدى وكان فجاءة تنزل رد وفيه تعليق وردها ورايها عن بنتها ..

وهذا ما كتبته أمي عن ابنتها ( اللى هي أنا )

و أأكد للجميع ان لم يتم حذف اي حرف او كلمة كتبتها امي على الورقة والشاهد مضيع لان اهو اللى كان يكتب وتركوا الورقة على طاولتي ..

::

السؤال الأول /

ماهي نظرتك للنت ؟ وهل فعلا النت سرق أبنائكِ من الجلوس معكِ ؟

نص سلبيه ونص اجابية هي بالمعنى نظرة محايده ..
نعم،، وكل الامهات على حق .. وهذا صحيح

السؤال الثاني /

هل تدليل الفتاة يدمرها ؟ وكيف تجمعين بين حبك وحنانكِ لها وبين تدليلها اللذي ربما يكون في غير مصلحتها ؟

اذا كانت زائدا عن اللزوم فذلك سيدمرها بالتأكيد ، الحنان لا موازن فية ، فالحنان والعطف دوما يطغى لدى الام ولكن اسع للموازنة وعدم الافراط في التدليل وعندما لا ابى لها بعض طلبات فيجب ان تعلم البنت بان ذلك ليس تقليلا في حب الام لها .. وابنتي صديقتي واختي ..

السؤال الثالث /

هل تثقين بابنتك الثقة الكاملة في ظل التطور والعولمة ؟

نعم ,, فانا اثق بها جيدا لانني أثق بتربيتي لأبنائي ..

السؤال الرابع /

من وجهة نظرك .. ماذا أضاف النت لإبنتك ؟

المعلومات الواسعه والتعرف على الصديقات الجدد الممتازين ..كذلك مصدر واسع للقراءة ،فقد قل كثيرا مستوى القراءة لدى هذا الجيل واعتقد بأن النت يعوض ولو جزء يسير من هذا النقص ..

السؤال الخامس /

هل أنتِ راضية عن حجم المساعدة التي تقدمها لكِ ابنتك ؟

نعم .. انا راضية ..فعندما أحتاج لهــم اجدهم دوما بقـــربي ..

السؤال السادس /

ماهي نظرتكِ لبنات الجيل الجديد ؟

يهتمون بالتفاهات والأمور الثانوية ،، لم تعد البنت كما كانت البنات في الزمن القديم،، فقد كانت حينما تبلغ العاشرة من عمرها تصبح مسؤولة عن أمور كثيرة في المنزل وتستحق لقب ( ســـت بيت ) ..

>> الحمدلله احنا من الجيل القديم ههههههههه

السؤال السابع /

أمي هل أنا مرتبة أم فوضوية ؟ وماهو السبب ؟

مرتبة ونظيفة وتحبين الترتيب الزائد .. ولكن في بعض الأحيان ……………………..

>>> مادري لية ماكملة الفراغ الله يستر بس وربي للحين مرتبة

السؤال الثامن /

ماهو الحلم و الأمنيه اللتي تتمنينها لابنتكِ اللتي تقرأ عليك هذه الأسئله ؟

اتمنى لها حفظ القران والتمسك بالدين والثبات عليه .. واتمنى حصولها على اعلى الشهادات العلمية…

السؤال التاسع /

لو طلبت ابنتكِ منكِ نصيحة من أم … بماذا تنصحينها ؟

انصحها بان تتقبل نصائح والديها وتستمع لها جيدا،، وابنتي تتحلى بالصفات الجميلة والاخلاق الرفيعه .. الا انها بعض الاحيان تصر على العناد

>> اووه ماي قاد قتلكم بتطلع الفضايح خخخخخخ في كلمة الحمدلله امي ما قالتتها ..

لمشاهدة المزيد من ردود الامهات ( هـــنا رابط الموضوع ) ..

- جميل ان تشارك الام أو الاب ابنه او ابنته بما تحب ، وان تتواجد معاها اينما كانت بشرط [ بدون نقد زايد ولا ملاحظات مالها داعي ]

اشكر امي على مشاركتها وشكراً وجهة وثانكس الجوري

والله لا يحرمني منك يا ماما

طاب يومكم ..